ނައިބު ރައީސް އާއި ފަސްޓް ލޭޑީ، ލިޓްލް ޖެމްސް ޕްރީ ސްކޫލުގެ ކުޑަކުދިންގެ ދުވަހުގެ ހަަރަކާތުގައި ބައިވެރިވެވަޑައިގެންފި
15 މެއި 2022 | އާދީއްތަ 10:58ބައެއް ސްކޫލްތަކުގައި ކުޑަކުދިންގެ ދުވަހުގެ ހަރަކާތްތައް ކުރިއަށްދަނީ 15 މެއިގައި
ފަސްޓްލޭޑީ ލިޓްލް ޖެމްސް ޕްރީސްކޫލަށް ވަޑައިގަތުމުން ކުއްޖަކު ހަދިޔާއެއް ދެނީ
ނައިބު ރައީސް ފައިސަލް ނަސީމް އާއި ރައީސުލް ޖުމްހުރިއްޔާގެ އަނބިކަނބަލުން ފަޒްނާ އަހުމަދު ލިޓްލް ޖެމްސް ޕްރީސްކޫލްގެ ކުޑަކުދިންގެ ދުވަހުގެ ހަރަކާތްތަކުގައި ބައިވެވަޑައިގެންފިއެވެ.
ލިޓްލް ޖެމްސް ޕްރީ ސްކޫލްގައި ކުޑަކުދިންގެ ދުވަސް ފާހަގަ ކުރީ އާދީއްތަ ދުވަހުއެވެ. ކުލަގަދަކޮށް އެ ދުވަސް ފާހަގަ ކޮށްފައިވާއިރު ނައިބު ރައީސް އާއި ފަސްޓްލޭޑީ ފަޒްނާގެ އިތުރުން އެޑިއުކޭޝަން މިނިސްޓަރު އައިޝަތު އަލީ ވެސް އެ ހަރަކާތްތަކުގައި ބައިވެރިވެވަޑައިގެންނެވިއެވެ.
ނައިބު ރައީސް އާއި ފަސްޓްލޭޑީ ފަޒްނާ އެ ސްކޫލަށް ވަޑައިގަތީ ވަކިންނެވެ. އެގޮތުން ވަކި ކްލާސްރޫމްތަކަށް ވަޑައިގެން ކުދިންނާ ބައްދަލު ކުރައްވާފައިވާއިރު ކުޑަކުދިންގެ ދުވަސް ފާހަގަ ކުރުމަށް އެ ސްކޫލުގައި ކުރިއަށްގެންދިޔަ ކުޅިވަރުތައް ބައްލަވާލެއްވިއެވެ.
މީގެ އިތުރުން ނައިބު ރައީސް ފައިސަލް ނަސީމް ވަނީ ލިޓިލް ޖެމްސް ޕްރީސްކޫލުގެ އިސް ފަރާތްތަކާ ބައްދަލު ކުރައްވައި ސްކޫލުގެ ކަންކަން ކުރިއަށްދާ ގޮތާ ގުޅޭ ގޮތުން މަޝްވަރާ ކުރައްވާފައެވެ.
ރާއްޖޭގައި ކުޑަކުދިންގެ ދުވަސް މެއި 10 ވަނަ ދުވަހު ފާހަގަ ކުރި ނަމަވެސް ބައެއް ސްކޫލްތަކުގައި އެ ދުވަހުގެ ހަރަކާތްތައް ބާއްވާފައިވަނީ 15 ވަަނަ ދުވަހުއެވެ.
ހުޅުމާލޭ ފޭސްޓޫގައި ދިރިއުޅޭ އާއިލާތަކުންވެސް ކުޑަކުދިންގެ ދުވަސް ފާހަގަ ކުރުމަށް ހުކުރު ދުވަހު ވަރަށް ކުލަގަދަ ހަރަކާތެއް ބާއްވާފައި ވެއެވެ.
