އިނގިރޭސި އެފްއޭ ކަޕްގެ ޗެމްޕިއަންކަން ލިވަރޕޫލުން ހޯދުމާއެކު އެ ޓީމުގެ ކޯޗު ޔާގަން ކްލޮޕަށް ބޮޑު ކާމިޔާބީއެއް ލިބިއްޖެއެވެ.
ލިވަރޕޫލުން ވަނީ އެފްއޭ ކަޕްގެ ފައިނަލްގައި ރޭ ޕެނަލްޓީ ޝޫޓްއައުޓްގައި 6-5ން ޗެލްސީ ބަލިކޮށް، މުބާރާތުގެ ތަށި އުފުލާލާފައެވެ.
އެއާއެކު ކްލޮޕް ވަނީ ލިވަރޕޫލާއެކު ޔޫރަޕުގެ ބޮޑު ހަ މުބާރާތް އެންމެ ހަތް ސީޒަންގެ ތެރޭގައި ހޯދާފައެވެ. އެއީ ޔުއެފާ ޗެމްޕިއަންސް ލީގާއި، ޔުއެފާ ސުޕަރ ކަޕާއި، ފީފާ ކުލަބް ވޯރލްޑް ކަޕާއި، އިނގިރޭސި ޕްރިމިއަރ ލީގާއި، ލީގު ކަޕްގެ އިތުރުން އެފްއޭ ކަޕެވެ.
ކްލޮޕް ލިވަރޕޫލްގެ ކޯޗުކަމާ ހަވާލުވެފައިވަނީ 2015 ވަނަ އަހަރުގެ ތެރޭގައެވެ. އޭގެ ފަހުން ކްލޮޕް ލިވަޕޫލާއެކު އެންމެ ފުރަތަމަ ކާމިޔާބުކޮށްފައިވަނީ 2019 ވަނަ އަހަރު ޗެމްޕިއަންސް ލީގެވެ. އަދި އޭނާ ވަނީ ލިވަރޕޫލާއެކު އެ އަހަރުގެ ޔުއެފާ ސުޕަރ ކަޕްގެ އިތުރުން ކުލަބް ވޯރލްޑް ކަޕް ވެސް ހޯދާފައެވެ. އޭގެ ފަހުން ޖެހިގެން އައި އަހަރު ކްލޮޕް ވަނީ ލިވަރޕޫލާއެކު އިނގިރޭސި ޕްރިމިއަރ ލީގުގެ އިތުރުން ލީގު ކަޕް ވެސް ހޯދާފައެވެ. އެންމެ ފަހުން ލިވަރޕޫލާއެކު ކްލޮޕް ހޯދާފައިވަނީ އެފްއޭ ކަޕެވެ.
މި ސީޒަންގައި ލިވަރޕޫލާއެކު އެފްއޭ ކަޕްގެ އިތުރުން އެހެނިހެން ތަށި ކާމިޔާބުކުރުމުގެ ފުރުސަތު ކްލޮޕަށް އެބަ އޮތެވެ. އޭގެ ތެރޭގައި ޔުއެފާ ޗެމްޕިއަންސް ލީގާއި އިނގިރޭސި ޕްރިމިއަރ ލީގު ހިމެނޭއިރު، ޕްރިމިއަރ ލީގު ކާމިޔާބުކުރެވެން އޮތީ ހަނި ފުރުސަތެކެވެ. ޔުއެފާ ޗެމްޕިއަންސް ލީގުގެ ފައިނަލްގައި ލިވަރޕޫލް ނުކުންނާނީ ރެއާލް މެޑްރިޑާ ދެކޮޅަށެވެ. ޕްރިމިއަރ ލީގުގައި ލިވަރޕޫލް ދެ ވަނައިގައި އޮތީ ސިޓީއަށްވުރެ އެއް މެޗު މަދުން ކުޅެ 86 ޕޮއިންޓާއެކުއެވެ. އަންގާރަ ދުވަހުގެ ރޭ ކުޅޭ މެޗުން މޮޅުވެ އެއް ޕޮއިންޓަށް ފަރަގު ކުޑަކުުރުމުގެ ފުރުސަތު ލިވަރޕޫލަށް އެބަ އޮތެވެ.
