މިއީ ބަޔާންގައި ކުޅުނު ފަހު މެޗަށްވުން ގާތް: ލެވަންޑޯސްކީ
ލެވަންޑޯސްކީ ބުނީ މަސައްކަތް ކުރަނީ ޓީމާއި އޭނާއަށް އެންމެ ރަނގަޅުވާނެ ގޮތަކަށް ނިންމަން ކަމަށް
ބަޔާންގެ ތަޖުރިބާކާރު ފޯވާޑް ލެވަންޑޯސްކީ
ބުންޑެސްލީގާގައި ބަޔާން މިއުނިކާއި ވުލްވްސްބާގް ބައްދަލުކުރި މެޗަކީ ބަޔާންގެ ލެވަންޑޯސްކީ އެޓީމުގައި ކުޅޭނެ ފަހު މެޗަށްވުން ވަރަށް ގާތްކަމަށް އޭނާ ބުނެފިއެވެ.
ހޮނިހިރު ދުވަހުގެރޭ މި ދެޓީމު ބައްދަލުކުރި މެޗަކީ މި ސީޒަންގެ ފަހު މެޗެވެ. މި މެޗު ނިމުނީ 2-2 ން އެއްވަރުވެގެންނެވެ. ލެވަންޑޯސްކީ މި މެޗުގައި ޖެހި ލަނޑާއެކު ލީގުގައި އެންމެ ގިނަ ލަނޑުޖެހި ކުޅުންތެރިޔާގެ މަގާމުގައި އޭނާ އޮތީ 35 ލަނޑު ޖަހައިގެންނެވެ.
މި މެޗަށްފަހު ލެވަންޑޯސްކީ ބުނީ މިއީ އޭނާ ބަޔާންގައި ކުޅޭނެ އެންމެ ފަހު މެޗަށްވުން ވަރަށް ގާތް ކަމަށެވެ. ނަމަވެސް މިކަމަށް 100 އިންސައްތަ ޔަގީންކަން ނުދެވޭނެ ކަމަށާއި، ދެފަރާތުން މަސައްކަތް ކުރަމުންދަނީ ޓީމަށާއި އޭނާއަށް އެންމެ ރަނގަޅު ގޮތަށް ނިންމުމަށް ކަމަށްވެސް ލެވަންޑޯސްކީ ބުންޏެވެ. މީގެ ކުރިންވެސް އޭނާ ވަނީ ޓީމުގައި އިތުރަށް މަޑުކުރަން ބޭނުން ނުވާކަން ޓީމަށް އަންގާފައެވެ.
ލެވަންޑޯސްކީ ވަނީ މިހާތަނަށް ބަޔާނަށް ކުޅެދިން 374 މެޗުން 344 ގޯލު ޖަހާފައެވެ. ބަޔާނާއެކު 19 ތަށި ހޯދިއިރު، އޭގެ ތެރޭގައި ޗެމްޕިއަންސް ލީގާއި ކްލަބް ވޯލްޑް ކަޕް އެއް ފަހަރު، އަދި ޖަރުމަނު ލީގު އަށް ފަހަރު ހޯދުން ހިމެނެއެވެ.
