ލެވަންޑޯސްކީއާ ގުޅޭ ގޮތުން މި ވަގުތު ވާހަކަ ދައްކާކަށް ބޭނުމެއް ނޫން: ޒަވީ
15 މެއި 2022 | އާދީއްތަ 07:58އުމުރަކީ ފުޓުބޯޅަ ކުޅުމަށް އޮތް ދަތި ހުރަހެއް ނޫން
ބާސެލޯނާގެ ކޯޗު ޒަވީ ހެނާންޑޭޒް
ޖަރުމަނު ލީގުގެ ބަޔާން މިއުނިކަށް ކުޅެމުން އަންނަ ޕޮލޭންޑުގެ ފޯވާޑް ރޮބާޓް ލެވަންޑޯސްކީއާ ގުޅޭ އެއްވެސް ވާހަކައެއް މި ވަގުތު ދައްކަން ބޭނުންނުވާ ކަމަށް ބާސެނޯލާގެ ކޯޗު ޒަވީ ހެނާންޑޭޒް ބުނެފިއެވެ.
ޒަވީ މިހެން ބުނެފައިވާއިރު، ބާސާއިން ލެވަންޑޯސްކީ ހޯދުމުގެ މަސައްކަތް ކުރަމުން އަންނަ ކަމަށް މީޑިއާތަކުގައި ވަނީ ރިޕޯޓުކޮށްފައެވެ. އަދި މި ސީޒަނަށްފަހު ލެވަންޑޯސްކީ ބަޔާން ދޫކޮށްލާނެ ކަމުގެ އަޑުތަކެއް އޭރު ފެތުރެމުން ދިޔަ ނަމަވެސް ބަޔާނުން ބުނީ މި ސީޒަނަށްފަހު ވެސް ލެވަންޑޯސްކީ ބަޔާނުގައި މަޑުކުރާނެކަމަށެވެ. ނަމަވެސް އިތުބާރުހިފޭ ކުޅިވަރު ނޫސްވެރިޔާ ފެބްރީޒިއޯ ރޮމާނޯ ހާމަކޮށްފައިވާ ގޮތުގައި ލެވަންޑޯސްކީ ވަނީ ބަޔާނާއެކު އިތުރު އެއްބަސްވުމެއްގައި ސޮއި ނުކުރާނެކަމަށް ބުނެފައެވެ. އަދި ދެ ފަރާތުން ވެސް އެންމެ ރަނގަޅު ހައްލެއް ހޯދުމަށް ލެވަންޑޯސްކީ ބޭނުންވާ ކަމަށް ވެސް އޭނާ ހާމަކޮށްފައިވެއެވެ.
ބާސާއިން ލެވަންޑޯސްކީ ގެނައުމަށް މަސައްކަތް ކުރާ ކަމަށް އަޑުތައް ފެތުރެމުން ދާ ދަނޑިވަޅެއްގައި ބާސާގެ ކޯޗު ޒަވީ ބުނީ މި ވަގުތު އެ ވާހަކަ ދައްކަން ބޭނުންނުވާ ކަމަށެވެ.
އުމުރުން 33 އަހަރުގެ ލެވަންޑޯސްކީ ބަޔާނުގައި މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް އެ ކުލަބަށް 373 މެޗު ކުޅެދީ 343 ގޯލު ޖަހާފައެވެ. އޭނާ ވަނީ ބަޔާނާއެކު ޖަރުމަނުގެ ބުންޑެސް ލީގާ، ޑީއެފްބީ ޕޯކަލް، ޑީއެފްއެލް ސުޕަ ކަޕް، ޔުއެފާ ސުޕަ ކަޕް އަދި ފީފާ ކުލަބް ވޯލްޑްކަޕްގެ އިތުރުން ޔުއެފާ ޗެމްޕިއަން ލީގު ވެސް ހޯދާފައެވެ. މީގެ އިތުރުން އޭނާ ވަނީ ފީފާއިން ދޭ ފީފާ ބެސްޓް ޕްލެޔާ އޮފް ދަ އިޔާ ދެ އަހަރު ހޯދާފައެވެ.
ބާސާއިން ލެވަންޑޯސްކީ ހޯދުމުގެ މަސައްކަތް ކުރާ ނަމަވެސް އޭނާގެ ރިލީޒް ކްލޯސްގެ ގޮތުގައި ބޮޑު އަދަދެއް ދައްކަން ޖެހޭނެއެވެ. އެހެންކަމުން މާލީ ދަތިކަން ދިމާވެފައިވާ ބާސާއަށް އޭނާ ހޯދުމަކީ އުނދަގޫ ކަމަކަށް ވާނެއެވެ.
