ހޮނިހިރު ދުވަހު ކުރިއަށްދިޔަ، މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ވިލިމާލެ ދާއިރާގެ ބައި އިލެކްޝަންގެ ނަތީޖާ އަލުން ގުނައިދިނުމަށް އެދެން ނިންމާފައިވާކަމަށް މޯލްޑިވްސް ނެޝަނަލް ޕާޓީން ބުނެފިއެވެ.
މޯލްޑިވްސް ނެޝަނަލް ޕާޓީގެ ސްޕޯކްސް ޕަރސަން އަސްރާ އަހުމަދު ވިދާޅުވީ، ހޮނިހިރު ދުވަހު ބޭއްވި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި އިލެކްޝަންގެ ނަތީޖާއަށް ބެލުމަށްފަހުގައި އަލުން ވޯޓު ގުނައިދިނުމަށް އެމްއެންޕީން އިލެކްޝަންސް ކޮމިޝަނުގައި އެދުމަށް ނިންމާފައިވާ ކަމަށެވެ.
މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ވިލިމާލެ ދާއިރާގެ ބައި އިލެކްޝަންގައި ޕީޕީއެމްއިން ކުރިމަތިލި ފާތިމަތު ނާޒިމާއަށް 359 ވޯޓް ލިބިފައިވާއިރު، އާމިނަތު ޝީޒާއަށް ލިބުނީ 353 ވޯޓެވެ.
މި އިންތިޚާބުގައި އެމްޑީޕީން ވާދަކޮށްފައެއް ނުވެއެވެ. އޭގެ ބަދަލުގައި އެ ޕާޓީން ތާއީދުކޮށްފައިވަނީ އެމްއެންޕީގެ ކެނޑިޑޭޓަށެވެ.
މާލެ ސިޓީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ވިލިމާލެ ތަމްސީލްކުރާ ގޮނޑި ހުސްވީ އެ ގޮނޑި ފުރަމުން ގެންދިޔަ އާމިނަތު އީމާން ނިޔާވުމާގުޅިގެންނެވެ.
