އދ. ދިގުރަށް، އއ. އުކުޅަސް އަދި ށ. މާއުނގޫދޫ ބަނދަރު ތަރައްޤީކުރުމުގެ މަސައްކަތް އެމްޓީސީސީއާ ހަވާލުކޮށްފިއެވެ.

މި ތިންރަށުގެ ބަނދަރުގެ މަސައްކަތް އެމްޓީސީސީއާ ހަވާލުކޮށްފައިވަނީ މިކަމަށްޓަކައި ބުރާސްފަތި ދުވަހު ބޭއްވި ރަސްމިއްޔާތެއްގައެވެ. މި ތިން މަސައްކަތުގެ އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމްއެވެ. އަދި ޕްލޭނިން މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޕަރމަނަންޓް ސެކެޓްރީ ޒީނިޔާ އަހުމަދު ހަމީދެވެ.

ދިގުރަށު ބަނދަރު ތަރައްޤީކުރުމުގެ މަސައްކަތުގެ ތެރެއިން 64،416 ކިއުބިކް މީޓަރުގެ ބަނދަރު ފުންކުރުމާއި، 6،770 މީޓަރުގެ ނެރު ފުންކުރުމާއި، 294 މީޓަރު އެއްގަމު ތޮށި އަދި 287 މީޓަރުގެ ބޭރުތޮށި ލުމާއި، 98 މީޓަރުގެ ރިވެޓްމެންޓް ޖެހުމުގެ އިތުރުން، މޫރިންގ ބޮއެ ހަރުކުރުމާއި، 2،324 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމާއި، ނެރުބައްތި އާއި މަގުބައްތި ހަރުކުރުމުގެ މަސައްކަތް ހިމެނެއެވެ.

މި މަސައްކަތާއެކު ދިގުރަށުގެ ބަނދަރުގެ މިހާރު އޮތް ޖާގަ ދެގުނައަށް ބޮޑުވެގެން ދާނެއެވެ. އަދި މީގެ އިތުރުން ކޮންކްރީޓް ޖެޓީއެއް ހެދުމާއި، ރޭމްޕެއް ހެދުމުގެ މަސައްކަތްވެސް ކުރެވިގެންދާނެއެވެ. މި ކޮންކްރީޓް ޖެޓީގެ ސަބަބުން ޑިންގީތަކާއި ކުދި ލޯންޗްފަހަރު އެޅުމުގައި އިތުރު ޖާގައިގެ ތަނަވަސްކަން ލިބި އަދި ރޭމްޕަށް މުދާ ހިފައިގެން އަންނަ ކޮޅުވެއްޓި ފަދަ އުޅަނދުތަކަށް ކައިރިކޮށް މުދާ ބޭލުމަށް ފަސޭހަވެގެންދާނެއެވެ.

މިއީ 53،025،367.58 (ފަންސާންތިން މިލިއަން ފަންސަވީސްހާސް ތިންސަތޭކަ ފަސްދޮޅަސް ހަތް ރުފިޔާ ފަންސާންއަށް ލާރި) ގެ މަޝްރޫއެކެވެ. މި މަޝްރޫއު ނިންމުމަށް ހަމަޖެހިފައިވަނީ 570 ދުވަސް ތެރޭގައެވެ.

އުކުޅަސް ބަނދަރު ތަރައްޤީކުރުމުގެ މަޝްރޫއުގެ ތެރެއިން 4،954 ކިއުބިކް މީޓަރުގެ ބަނދަރު ފުންކުރުމާއި، ބަނދަރު ބޮޑުކުރުމަށް 264 މީޓަރު އެއްގަމު ތޮށި އަދި 5 މީޓަރުގެ ބޭރުތޮށި ލުމުގެ އިތުރުން 553 މީޓަރު ރިވެޓްމެންޓް ޖެހޭނެއެވެ. އަދި 1،640 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި، ނެރުބައްތި އާއި މަގުބައްތި ހަރުކުރުމުގެ މަސައްކަތްވެސް ކުރެވިގެންދާނެއެވެ. އަދި މީގެ އިތުރުން ކޮންކްރީޓް ޖެޓީއެއް ހެދުމާއެކު ކަނެކްޓިވިޓީ ބްރިޖެއްގެ މަސައްކަތްވެސް ކުރެވިގެންދާނެއެވެ. މި ކޮންކްރީޓް ޖެޓީގެ ސަބަބުން ޑިންގީތަކާއި ކުދި ލޯންޗްފަހަރު އެޅުމުގައި އިތުރު ޖާގައިގެ ތަނަވަސްކަން އުކުޅަހު ރައްޔިތުންނަށް ލިބިގެންދާނެއެވެ.

މިއީ 37،282،051.06 (ތިރީސްހަތް މިލިއަން ދެލައްކަ އަށްޑިހަދެހާސް ފަންސާސް އެއް ރުފިޔާ ހަ ލާރި)ގެ މަޝްރޫއެކެވެ. އަދި މަޝްރޫއު ނިންމުމަށް ހަމަޖެހިފައިވަނީ 365 ދުވަހުގެ ތެރޭގައެވެ.

މާއުނގޫދޫ ބަނދަރު ތަރައްޤީކުރުމުގެ މަސައްކަތުގެ ތެރެއިން 59،013 ކިއުބިކް މީޓަރުގެ ބަނދަރު ފުންކުރުމާއި، 3،245 މީޓަރުގެ ނެރު ފުންކުރުމާއި، 312 މީޓަރު އެއްގަމު ތޮށި އަދި 362 މީޓަރުގެ ބޭރުތޮށި ލުމާއި، 105 މީޓަރުގެ ރިވެޓްމެންޓް ޖެހުމުގެ އިތުރުން، 1،509 އަކަމީޓަރުގެ ސަރަޙައްދެއްގައި ޕޭވްމަންޓް ހެދުމާއި، މޫރިންގ ބޮއެ ހަރުކުރުމުގެ އިތުރުން ނެރުބައްތި އާއި މަގުބައްތި ހަރުކުރުމުގެ މަސައްކަތް ހިމެނެއެވެ. މި މަސައްކަތް ނިމުމާއެކު، މާއުނގޫދޫގެ ބަނދަރުގެ ޖާގަ ދެގުނައަށް ބޮޑުވެގެން ދާނެއެވެ.

މީގެ އިތުރުން ކޮންކްރީޓް ޖެޓީއެއް ހެދުމާއި، ރޭމްޕެއް ހެދުމުގެ މަސައްކަތްވެސް ކުރެވިގެންދާނެއެވެ. މި ކޮންކްރީޓް ޖެޓީގެ ސަބަބުން ޑިންގީތަކާއި ކުދި ލޯންޗްފަހަރު އެޅުމުގައި އިތުރު ޖާގައިގެ ތަނަވަސްކަން ލިބި އަދި ރޭމްޕަށް މުދާ ހިފައިގެން އަންނަ ކޮޅުވެއްޓި ފަދަ އުޅަނދުތަކަށް ކައިރިކޮށް މުދާ ބޭލުމަށް ފަސޭހަވެގެންދާނެއެވެ. މިއީ 59،713،156.38 (ފަންސާސް ނުވަމިލިއަން ހަތްލައްކަ ތޭރަހާސް ސަތޭކަ ފަންސާސް ހަ ރުފިޔާ ތިރީސް އަށް ލާރި) ގެ މަޝްރޫއެކެވެ. މި މަޝްރޫއު ނިންމުމަށް ހަމަޖެހިފައިވަނީ 475 ދުވަސް ތެރޭގައެވެ.

ވޭތުވެދިޔަ ތިން އަހަރުތެރޭގައި އެމްޓީސީސީން ވަނީ ޒަމާނީ ފެންވަރުގެ ބަނދަރު ތަރައްޤީކުރުމުގެ ގިނަ މަޝްރޫއުތަކެއް ފުރިހަމަ ކޮށްފައެވެ. 1980 ވަނަ އަހަރު ކުންފުނި އުފެދުނީއްސުރެ ރާއްޖޭގެ އުމްރާނީ ތަރައްޤީ އާއި އިޖުތިމާޢީ ވަސީލަތްތައް ބިނާކުރުމުގައި އެމްޓީސީސީން ވަނީ މުހިއްމު ދައުރެއް އަދާކޮށްފައެވެ.