އިންތިޚާބަށްފަހު އެމްޑީޕީ އެކަތިގަނޑަކަށް ވާނެ: އަލީ ނިޔާޒް
12 މެއި 2022 | ބުރާސްފަތި 10:08އިންތިޚާބުގެ ކޮންމެ ކަމެއް ކުރަންވެސް ތިބީ އެމްޑީޕީ މެމްބަރުން
އިންތިޚާބާއި ބެހޭ ކޮމިޓީން ބޭއްވި ނޫސްވެރިންގެ ބައްދަލުވުމުގައި މެމްބަރު އަލީ ނިޔާޒު
ކުރިއަށް އޮތް އެމްޑީޕީގެ އެތެރޭގެ އިންތިޚާބަށްފަހު އެޕާޓީ އެކަތިގަނޑަކަށް ވާނެ ކަމާމެދު އެއްވެސް ޝައްކެއް ނުކުރައްވާކަމަށް އެމްޑީޕީގެ ޗެއާޕަރސަންގެ ނައިބު އަދި ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެއެވެ.
އެމްޑީޕީގެ އެތެރޭގެ އިންތިޚާބާ ދިމާކޮށް އެ ޕާޓީގެ މެމްބަރުންގެ މެދުގައި ގިނަ ޚިޔާލުތަފާތުވުންތަކެއް އެބަހުއްޓެވެ. އަންނަ ހޮނިހިރު ދުވަހު މި އިންތިޚާބު ބޭއްވުމަށް ތަވާލުކޮށްފައިވާއިރު، އިންތިޚާބާ ބެހޭ އެންމެ ފަހުގެ މައުލޫމާތުތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން ނިޔާޒު ވިދާޅުވީ މި އިންތިޚާބަށް ފަހު އެމްޑީޕީގެ މެމްބަރުން އެކަތިގަނޑަކަށް ވާނެ ކަމާމެދު ޝައްކު ނުކުރައްވާ ކަމަށެވެ.
މި އިންތިޚާބު ކިތަންމެ ވާދަވެރިކޮށް ދިޔަ ނަމަވެސް މިއީ އެމްޑީޕީ ކަމަށާއި، އިންތިޚާބުގެ ކޮންމެ ކަމެއް ކުރަންވެސް ތިބީ އެމްޑީޕީގެ މެމްބަރުން ކަމަށެވެ. ވާދަވެރި އިންތިޚާބެއްގެ ތެރޭގައި ތުހުމަތުތަކާއި، ވާދަވެރިކަމާއެކު ކެމްޕޭން ކުރުމާއި، ޚިޔާލު ތަފާތުވުންތައްވެސް ހުންނާނެ ކަމަށް ނިޔާޒު ވިދާޅުވިއެވެ. އެހެންނަމަވެސް ވޯޓު ލާ ނިމުނީމަ ކުރިއަށްއޮތް ފަސް އަހަރަށް އެ ހޮވުނީ އެމްޑީޕީ މެމްބަރުން ބޭނުންވާ މެމްބަރެއް ކަން ޕާޓީގެ ހުރިހާ މެމްބަރުންވެސް ގަބޫލުކުރާނެ ކަމަށް ނިޔާޒް ވިދާޅުވިއެވެ.
ޕާޓީތެރޭގައި ޚިޔާލުތަފާތުވުންތަކާއި، ވާދަވެރިކަން އޮތް ނަމަވެސް ޕާޓީ ބައިބައިވެގެން ނުދާނެ ކަމަށް އެމްޑީޕީގެ ގިނަ މެމްބަރުން ދަނީ ބުނަމުންނެވެ. މިގޮތުން މި އިންތިޚާބުގައި އެމްޑީޕީގެ ޗެއާޕަރސަންގެ މަގާމަށް ވާދަކުރައްވާ ދެ މެމްބަރުންވެސް ވަނީ މިހެން ވިދާޅުވެފައެވެ.
ބުރާސްފަތި ދުވަހު ރާއްޖެޓީވީން ކުރިއަށްގެންދިޔަ "ޗެއާޕަރސަން ބަހުސް 2022"ގައި މި އިންތިޚާބަށްފަހު އެމްޑީޕީގެ އެތެރެއިން އިތުރު ޕާޓީއެއް އުފެދިދާނެތޯ ކުރި ސުވާލަށް ޖަވާބުދެއްވަމުން ޗެއަރޕާސަންގެ މަގާމަށް ވާދަކުރައްވާ ކެންޑިޑޭޓް ނަމްބަރު 1 މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އަދި ކެންޑިޑޭޓް ނަމްބަރު 2 އިކޮނޮމިކް މިނިސްޓަރު ފައްޔާޒު އިސްމާއިލް ވެސް ވަނީ އިތުރު ޕާޓީއެއް ނުއުފެދޭނެ ކަމަށް ވިދާޅުވެފައެވެ.
މިހާ ހިސާބުން އެމްޑީޕީގެ އެތެރޭގައި މިވަގުތު ޚިޔާލު ތަފާތުވުންތަކެއް ހުރިނަމަވެސް އެ ޕާޓީ ރޫޅިގެން ނުދާނެކަމުގެ އިޝާރާތެއް ވަނީ ލިބިފައެވެ.
