ޖުލައި މަސް ނިމެންވާއިރަށް ފަރެސްމާތޮޑާ އެއަރޕޯޓުގެ ބޮޑުބައެއް ނިންމުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން އަމާޒު ހިފައިފިއެވެ.
ފަރެސްމާތޮޑާ އެއަރޕޯރޓްގެ މަސައްކަތް އެމްޓީސީސީއާ ހަވާލުކޮށްފައިވަނީ 10 ނޮވެމްބަރ 2020ގައެވެ. މި މަޝްރޫއުގެ ދަށުން، ރަންވޭގެ ސަބްގްރޭޑް އަދި ސަބްބޭސް މަސައްކަތްކުރުމާއި، ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ގާއިމުކުރުމާއި، ފަޔަރ ބިލްޑިންގެއް އިމާރާތްކުރުމުގެ އިތުުރުން ޓާރމިނަލް ބިލްޑިންގެއް އިމާރާތްކުރުމުގެ މަސައްކަތް އެމްޓީސީސީއާ ވަނީ ހަވާލުކޮށްފައެވެ.
މި މަސައްކަތް ކުރިއަށްދިޔަ ހިސާބު ބައްލަވާލެއްވުމަށް އެމްޓީސީސީގެ ސީއީއޯ އާދަމް އާޒިމް ވަނީ އެ އެއަރޕޯޓަށް ވަޑައިގެންފައެވެ. މި މަސައްކަތް ބައްލަވާލައްވައި ވާހަކަފުޅުދައްކަވަމުން އާޒިމް ވިދާޅުވީ ފަރެސްމާތޮޑާ އެއަރޕޯޓުގެ ރަންވޭގެ މަސައްކަތް ޖޫން މަހުގެ މެދުތެރޭގައި އެއްކޮށް ނިންމާލެވޭނެ ކަމަށެވެ. ފަޔަރ ބިލްޑިންއާއި ޓަރމިނަލް ބިލްޑިންގެ މަސައްކަތް ކުރިއަށް އެބައޮތް ކަމަށާއި، އެ މަސައްކަތްތައްވެސް ވަރަށް ބާރަށް ކުރިއަށްދާކަމަށް އާޒިމް ވިދާޅުވިއެވެ.
އެއަރޕޯޓުގެ ރަންވޭއާއި، ފަޔަރ ބިލްޑިންގ އަދި ޓަރމިނަލް ގެ މަސައްކަތް ޖުލައި އެންޑަށް ނިންމާލެވޭތޯ މި މަސައްކަތްކުރަނީއެމްޓީސީސީގެ ސީއީއޯ އާދަމް އާޒިމް
މީގެ އިތުރުން ފަރެސްމާތޮޑާއާ އެއަރޕޯޓާ ދެމެދު އަޅާ ކޯޒްވޭގެ މަސައްކަތަށް އިޝާރަތްކުރައްވައި އާޒިމް ވިދާޅުވީ އެ މަސައްކަތްވެސް މިހާރު ފަށާފައިވާކަމަށެވެ. އެއީ ފުދޭވަރަކަށް ބޮޑު މަސައްކަތެއް ކަމަށާއި، އެ މަސައްކަތުގެ ބޭނުންވާ ޑިޒައިން މަރުހަލާ މިހާރު ފަށާފައިވާކަމަށެވެ.
އާޒިމް ވިދާޅުވީ ކޯޒްވޭގެ މަސައްކަތަކީ ފަހުން ހަވާލުކުރި މަސައްކަތެއް ކަމަށެވެ. އެ މަސައްކަތް ޑިޒައިންކުރުމާއި އީއައިއޭގެ މަސައްކަތާއި، މެޓީރިއަލް ހޯދުމުގެ މަސައްކަތް ކުރަމުންދާއިރު ހައެއްކަ މަސް ތެރޭގައި މި މަސައްކަތްވެސް ނިންމޭނެ ކަމަށް ގަބޫލުކުރައްވާކަމަށް އާޒިމް ވިދާޅުވިއެވެ. އެހެންނަމަވެސް ދުނިޔޭގައި ހިނގަމުންދާ ކަންކަމުގެ ސަބަބުން ބޭނުންވާ ސާމާނު ގެނައުމަށް ދަތިވާކަމަށް އާޒިމް ވިދާޅުވިއެވެ. އެހެންނަމަވެސް ބާރު ސްޕީޑުގައި މަސައްކަތްތައް ނިންމުމަށް މަސައްކަތްކުރަމުންދާކަމަށް ވިދާޅުވިއެވެ.
