އައިޖީއެމްއެޗްއިން ސީޓީ ސްކޭންގެ ޚިދުމަތް މެދުކަނޑާލައިފި
10 މެއި 2022 | އަންގާރަ 03:47އައިޖީއެމްއެޗް އާއި ދަރުމަވަންތަ ހޮސްޕިޓަލުގެ ސީޓީ މެޝިންތަކުގެ މެއިންޓަނެންސް މަސައްކަތް ދަނީ ކުރަމުން
އައިޖީއެމްއެޗް
އައިޖީއެމްއެޗްއިން ދެމުން އައި ސީޓީ ސްކޭންގެ ޚިދުމަތް މެދުކަނޑާލައިފިއެވެ.
އެ ހޮސްޕިޓަލުން ހޯމަ ދުވަހުގެ ރޭ ނެރުނު ބަޔާނެއްގައި ބުނީ އެ ޚިދުމަތް މެދުކަނޑާލަން ނިންމީ އައިޖީއެމްއެޗް އާއި ދަރުމަވަންތަ ހޮސްޕިޓަލުގައި މިވަގުތު ބޭނުން ކުރަމުން އަންނަ ސީޓީ މެޝިންތަކުގައި މައްސަލަ ދިމާވެގެން ކަމަށެވެ. އެ މެޝިންތަކުގެ މެއިންޓަނެންސްގެ މަސައްކަތް މިހާރު ކުރިއަށްދާ ކަމަށް ވެސް އައިޖީއެމްއެޗް އިން ބުނެއެވެ.
އައިޖީއެމްއެޗްގައި ސީޓީ ސްކޭން ޚިދުމަތް މެދުކަނޑާލާފައިވާއިރު އިމަޖެންސީ ހާލަތްތަކުގައި އެ ހޮސްޕިޓަލުން ސީޓީ ސްކޭން ހައްދާނީ ހުޅުމާލެ ހޮސްޕިޓަލުން ކަމަށް ވެސް މިބަޔާނުގައި ވަނީ ބުނެފައެވެ.
އައިޖީއެމްއެޗްއިން މައުލޫމާތު ދޭ ގޮތުގައި ސީޓީ މެޝިންތަކުގެ މެއިންޓަނެންސް މަސައްކަތް ނިންމަން ހަފުތާއެއް ވަރު ނަގާނެއެވެ. އެ މަސައްކަތް ނިމުމާއެކު ޚިދުމަތް އަލުން ފަށާނެ ކަމަށް ވެސް އެ ހޮސްޕިޓަލުން ބުނެއެވެ.
ސީޓީ ސްކޭންގެ ޚިދުމަތް މެދުކެނޑުމުގެ ސަބަބުން ދިމާވެދާނެ ދަތިތަކަށް އައިޖީއެމްއެޗްއިން ވަނީ މައާފަށް އެދިފައެވެ.
