ޏ.ފުވައްމުލަކު ނެރުކައިރިއަށް ޑައިވްކުރަނިކޮށް ގެއްލުނު މުޙައްމަދު ސަޢީދު ހޯދުމުގެ މަސައްކަތް މެދުކަނޑާލައިފިއެވެ.

އެމްއެންޑީއެފް އިން ބުނީ މެއި 2 ވަނަ ދުވަހު ފުވައްމުލަކު ބޭރުން ޑައިވްކުރަނިކޮށް ގެއްލުނު މުޙައްމަދު ސަޢީދު ހޯދުމަށް ކުރިއަށް ގެންދިޔަ ސާރޗް އެންޑް ރެސްކިއު އޮޕަރޭޝަން އެމްއެންޑީއެފް ކޯސްޓްގާޑުން މެދުކަނޑާލާފައިވާ ކަމަށެވެ.

މުޙައްމަދު ސަޢީދު ހޯދުމަށް ކޯސްޓްގާޑުގެ ސިފައިން ވަނީ ހަތް ދުވަހުގެ ތެރޭގައި، ވައިގެ މަގުން 2960 ސްކެއަރ މޭލު، ކަނޑުގެ މަގުން (ސާރފޭސް ސަރޗު) 760 ސްކެއަރ މޭލު އަދި ކަނޑުގެ އަޑިން 1000 މީޓަރުގެ (ފުންމިން 85 މީޓަރު) ސަރަހައްދެއް ބަލާފައެވެ.

ޑައިވިންއަށް ގޮސް އުޅެނިކޮށް ޏ. ފުވައްމުލަކުން ގެއްލުނު އުމުރުން 35 އަހަރުގެ މުހައްމަދު ސައީދު ގެއްލިފައިވަނީ ހޯމަ ދުވަހުއެވެ. ސައީދު ޑައިވިންއަށް ފޭބީ ހޯމަ ދުވަހުގެ 14:30ހާއިރު ކަމަށާއި، ފީނަން ފޭބިއިރު އޭނާ ލައިގެން ހުރީ ކަޅުކުލައިގެ ޑައިވިން ސޫޓަކާއި ކަޅުކުލައިގެ ފިންސެއް ކަމަށާއި، އަޅައިގެން ހުރީ ކަޅުކުލައިގެ މާސްކެއްކަމަށް އެމްއެންޑީއެފުން ބުނެއެވެ.

ސައީދުއާއެކު ޑައިވިންއަށް އިތުރު މީހަކު ވެސް ދިޔައެވެ. އޭނާގެ ހާލު ސީރިއަސްވެ ހޯމަ ދުވަހުގެ ރޭގެ ވަގުތެއްގައި ވަނީ ދ. އަތޮޅުގައި އޮންނަ ކަނޑިންމަ ރިސޯޓަށް ގެންގޮސްފައެވެ. އެ ރިސޯޓަށް އޭނާ ގެންދިޔައީ އެތަނުގައި ހުންނަ ޑީކޯވާ މީހުންނަށް ފަރުވާދިނުމަށް ބޭނުންވާ ޚާއްސަ ޗެމްބަރުގައި ފަރުވާ ދިނުމަށެވެ.