ބަދަލުތަކެއް ނެތްނަމަ އެމްބާޕޭ ޕީއެސްޖީ ދޫކޮށްލާނެ: ރޯތަން
މިވަގުތު އެމްބާޕޭއަށް މުހިންމީ ގިނަ ފައިސާތަކެއް ނޫން
ޕީއެސްޖީއަށް ކުޅެމުން އަންނަ ފްރާންސްގެ ޒުވާން ތަރި ކީލިއަން އެމްބާޕޭ
ޕީއެސްޖީން އެޓީމުގެ ޒުވާން ތަރި ކީލިއަން އެމްބާޕޭއަށް, ބަދަލުތަކަކާއެކު ތަފާތު ސްޕޯޓިންގ ޕްރޮޖެކްޓެއް ނުދީފިނަމަ އޭނާ ކްލަބު ދޫކޮށްލާނެކަމަށް ފްރާންސަށް ކުރިން ކުޅުނު ޖެރޮމް ރޯތަން ބުނެފިއެވެ.
މިދިޔަ އަހަރުގެ ތެރޭގައި ރެއާލް މެޑްރިޑުން ވަނީ އެތައް ފަހަރެއްގެ މަތިން އެމްބާޕޭ ހޯދުމަށް މަސައްކަތް ކޮށްފައެވެ. ނަމަވެސް ޕީއެސްޖީން އޭނާ ދޫނުކުރީއެވެ. އޭގެ ފަހުން ރެއާލްއިން މަސައްކަތްކުރަމުން އަންނަނީ ކުރިއަށް އޮތް ސަމަރ ޓްރާންސްފަރ މާކެޓުގައި އެމްބާޕޭ ހޯދުމަށެވެ. މި ސީޒަންގެ ނިޔަލަށް އެމްބާޕޭއާއެކު ޕީއެސްޖީން ހަދާފައިވާ އެއްބަސްވުމުގެ މުއްދަތު ހަމަވާނެއެވެ. އެހެންކަމުން ކުރިއަށް އޮތް ސަމަރ ޓްރާންސްފަރ މާކެޓުގެ ފްރީ އޭޖެންޓެއްގެ ގޮތުގައި އެމްބާޕޭ ބޭނުން ކްލަބަކަށް ބަދަލުވުމުގެ ފުރުސަތު އެބައޮތެވެ.
ޕީއެސްޖީއާއެކު އިތުރު ދެއަހަރުގެ މުއްދަތަކަށް ކޮންޓްރެކްޓް ހަދަން އެމްބާޕޭ ނިންމާފައިވާކަމަށް މިދިޔަ ހަފުތާގައި ބޭރުގެ ބައެއް ނޫސްތަކުން ރިޕޯޓުކުރިއެވެ. ނަމަވެސް އެމްބާޕޭގެ މަންމަ ފައިޒާ ލަމޭރީ ވަނީ އެކަން ދޮގުކޮށްފައެވެ.
ނޫސްވެރިއެއްގެ ގޮތުގައި މިހާރު މަސައްކަތް ކުރަމުން އަންނަ ރޯތަން ބުނީ މިވަގުތު އެމްބާޕޭއަށް މުހިންމީ ގިނަ ފައިސާތަކެއް ނޫން ކަމަށެވެ. އަދި އޭނާއަށް މުހިންމީ ރަނގަޅު ސްޕޯޓިންގ ޕްރޮޖެކްޓެއް ކަމަށެވެ. އެހެންކަމުން ވަކި ގޮތެއް ނުނިންމައި އެމްބާޕޭ މިހާރު މަޑުކޮށްގެން އެހުރީ ރަނގަޅު ސްޕޯޓިންގ ޕްރޮޖެކްޓެއް ހުށަހެޅުމަށް ޕީއެސްޖީއަށް ފުރުސަތު ދިނުމުގެ ގޮތުން ކަމަށް ރޯތަން ބުންޏެވެ.
ރޯތަން ބުނީ ސަޕޯޓަރުންނަށް ވެސް އެނގެން ޖެހޭނެ އެންމެ މުހިންމު އެއްކަމަކީ ޕީއެސްޖީއަކީ އެމްބާޕޭއަށް ވަރަށް މުހިންމު ޓީމެއް ކަމަށާއި، އޭނާއާ ޓީމާ ދެމެދު ވަރަށް ރަނގަޅު ގުޅުމެއް އޮތްކަމަށެވެ.
