ތ. ދިޔަމިގިލީގައި މުދިމަކަށް ވަޅިން ހަމަލާދިންކަމަށް ތުހުމަތު ކުރެވޭ މީހާގެ މައްޗަށް ޕްރޮސެކިއުޓަރ ޖެނެރަލް އޮފީހުން ދައުވާ އުފުލައިފިއެވެ.

އެކަމާ ގުޅޭގޮތުން ޕީޖީ އޮފީހުގެ މީޑީއާ އޮފިޝަލު އަދި ޕަބްލިކް ޕްރޮސެކިއުޓަރ އަހުމަދު ޝަފީއު ވިދާޅުވީ، ތ. ދިޔަމިގިލި، މޯނިންގސްޓަރ ޙަސަން ސާމިދު ޙުސައިން 13 މާރޗު 2022 ވަނަ ދުވަހު މީހަކަށް ވަޅިން ހަމަލާދީ މާރާމާރީ ހިންގިކަމަށް ތުހުމަތުކުރެވުނު މައްސަލައިގައި އޭނާގެ މައްޗަށް، ޤާނޫނު ނަންބަރު: 2010/17 (ބިރުދެއްކުމާއި ނުރައްކާތެރި ހަތިޔާރާއި ތޫނުއެއްޗެހި ގެންގުޅުން މަނާކުރުމުގެ ޤާނޫނު) ގެ 5 ވަނަ މާއްދާގެ (ހ) އަދި (ބ) އާ ޙަވާލާދީ، އެ މާއްދާގެ (ޅ) ގެ ދަށުން، ތޫނު އެއްޗެއް ބޭނުންކޮށްގެން ގަސްދުގައި މީހަކު މަރަން އުޅުމުގެ ކުށުގެ ދަޢުވާ ހުށައަޅާފައިވާ ކަމަށެވެ.

މި ދައުވާ ހުށައަޅާފައިވަނީ 28 އެޕްރީލް 2022 ވަނަ ދުވަހު ތ. ދިޔަމިގިލީ މެޖިސްޓްރޭޓް ކޯޓަށްކަމަށް އޭނާ ވިދާޅުވިއެވެ.

ޕީޖީ އޮފީހުން މައުލޫމާތު ދޭ ގޮތުގައި މި މައްސަލައިގައި އަނިޔާ ލިބުނު މީހާ އެދުވަހު ތ.ދިޔަމިގިލި، ތާޖު ގެ ކައިރިން ބައިސްކަލެއްގައި ދުއްވާފައި ދަނިކޮށް، ޙަސަން ޞާމިދު ޙުސައިން އޭނާ ހުއްޓުވައި، އަނިޔާ ލިބުނު މީހާގެ ބޮލާއި، ކަރާއި، ބުރަކައްޓާއި، ކަނާއަތު ކޮނޑާއި، ވާއަތަށް ވަޅިއަކުން ހަމަލާދީފައިވާކަން ތަޙުޤީޤަށް ހޯދިފައިވާކަމުގައެވެ.

ޞާމިދު ވަޅިން ހަމަލާދީ ޒަޚަމްކޮށްލާފައިވަނީ އެރަށު މިސްކިތުގެ މުދިމެވެ. އޭނާ މުދިމަށް ހަމަލާދޭ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާންމުވެފައެވެ.

މި ވީޑިއޯއިން ފެންނަ ގޮތުގައި އޭނާ ހުންނަނީ މުދިމާ ވާހަކަ ދައްކާށެވެ. އެއަށްފަހު ކުއްލިއަކަށް ވަޅިން ހަމަލާދޭތަން ފެނެއެވެ. އެތައް ފަހަރަކު ވަޅި ހެރުމަށްފަހު ބައިސްކަލެއްގެ މަތީގަ އިން މުދިމު ބިންމައްޗަށް ވެއްޓުމުން ދޫކޮށްލާފައި ދެއެވެ. ނަމަވެސް އޭނާ ދުރަށް ގޮސްފަ، އެނބުރި ގޮސް ދެވަނަ ފަހަރަށް ވެސް، ވަޅިން މުދިމަށް ހަމަލާދެއެވެ.

އެއަށްފަހު އެ ހަމަލާ ދިނުމަށް ބޭނުންކުރި ވަޅީގައިހުރި ލޭތައް މަގުމަތީ އެއްޗެއް އަޅާފަހުރި ގޯންޏެއް ކަހަލަ އެއްޗެއްގައި ފޮހޭތަން ވެސް ވީޑިއޯއިން ފެނެއެވެ.

ޞާމިދުގެ މައްޗަށް އުފުލާފައިމިވާ ދަޢުވާތައް ސާބިތުވެއްޖެނަމަ ކަނޑައެޅޭނެ އަދަބަކީ 15 އަހަރާއި 25 އަހަރާ ދެމެދުގެ މުއްދަތަކަށް ޖަލަށްލުންކަންވެސް ޕީޖީ އޮފީހުން ފާހަގަކުރެއެވެ.

ޞާމިދު މިހާރު ހުރީވެސް ޝަރީއަތް ނިމެންދެން ބަންދުކޮށްފައެވެ. އެގޮތުން ފުލުހުން ބުނީ، ބަންދާމެދު ގޮތެއް ނިންމުމަށް މަޑިފުށި މެޖިސްޓްރޭޓް ކޯޓަށް ހާޒިރު ކުރުމުން އޭނާ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން އަމުރުކޮށްފައިވާ ކަމަށެވެ.