ޖަލު ބަލަހައްޓާ ގިނަ އަދަދެއްގެ އޮފިސަރުން ހޯދަން އިއުލާންކޮށްފި
6 މެއި 2022 | ހުކުރު 02:50180 އޮފިސަރުން ހޯދަން ވަނީ އިއުލާންކޮށްފައި
ޕްރިޒަންސް އޮފިސަރުންތަކެއް
ޖަލު ބަލަހައްޓާ ގިނަ އަދަދެއްގެ އޮފިސަރުން ހޯދަން މޯލްޑިވްސް ކަރެކްޝަނަލް ސާވިސަސް (އެމްސީއެސް) އިން އިއުލާންކޮށްފިއެވެ.
އެގޮތުން ޖަލުތައް ބެލެހެއްޓުމަށް 180 އޮފިސަރުން ހޯދަން އިއުލާނުކޮށްފައިވެއެވެ. އަދި ދެ ޖިންސުގެ މީހުންނަށް ވެސް އެމަޤާމަށް ކުރިމަތިލެވޭނެކަން ވެސް ވަނީ ހާމަކޮށްފައެވެ.
ޖަލު ބަލަހައްޓާ އޮފިސަރުންގެ ގޮތުގައި ނަގާ މީހުންނަށް ހުވާ ކުރުމަށްފަހު މުސާރައިގެ ގޮތުގައި މަހަކު މަދުވެގެން 15،000 ރުފިޔާ ލިބޭނެ ކަމަށާއި އެ މަޤާމަށް އުމުރުން 18 އަހަރާއި 35 އަހަރާ ދެމެދުގެ މީހުންނަށް ކުރިމަތިލެވޭނެ ކަމަށް އެމްސީއެސްއިން ބުނެއެވެ.
ރާއްޖޭގެ ޖަލުތައް ބަލަހައްޓަން ގިނަ އަދަދެއްގެ އޮފިސަރުން ހޯދަން އިއުލާންކޮށްފައިވާއިރު އެ މުއައްސަސާގެ ކަންކަން ހަރުދަނާ ކުރުމަށް ގިނަ ކަންކަން ކުރަމުންދާ ކަމުގައި އެމްސީއެސްއިން ވަނީ ބުނެފައެވެ. އެގޮތުން އެކި ދާއިރާތަކުގެ އިލްމުވެރި އަދި ފަންނީ އޮފިސަރުންނާއި މުވައްޒަފުން ބިނާކުރުމަށް މަސައްކަތް ކުރަމުންދާކަމުގައި އެމުއައްސަސާއިން ބުނެފައިވެއެވެ.
އިތުރު އޮފިސަރުން ހޯދަން އިއުލާން ކޮށްފައިވާއިރު ރާއްޖޭގެ ޖަލުތަކުގެ ޖާގަ ފުރެމުންދާތީ އިތުރު ޖަލުތަކެއް އެޅުމުގެ މަސައްކަތްވެސް އަންނަނީ ކުރަމުންނެވެ. އެގޮތުން، ކ. މާފުށީ ޖަލުގައި 50 ގޮޅީގެ އިތުރު ޔުނިޓެއް ހަދަން ނިންމާފައިވާއިރު ކ. ކާށިދޫ އާއި ހދ. ނޭކުރެންދޫގައި ޖަލު އެޅުމަށް އަންނަނީ މަސައްކަތް ކުރަމުންނެވެ.
