ސަލާހް ހުރީ ބަދަލުހިފުމުގެ ރޫހުގައި!
2018 ވަނަ އަހަރުގެ ފައިނަލުގައި ސަލާހްއަށް އަނިޔާވެގެން ވަނީ ބަދަލުކޮށްފައި
2018 ވަނަ އަހަރުގެ ފައިނަލުގައި ސަލާހްއަށް ރާމޯސްކުރި ފައުލް
ލިވަޕޫލްއަށް ކުޅެމުން އަންނަ މުހައްމަދު ސަލާހް ހުރީ ރެއާލް މެޑްރިޑު ކައިރިން ބަދަލު ހިފުމުގެ ރޫހުގައިކަން އޭނާ ހާމަކޮށްފިއެވެ.
މެންޗެސްޓަރ ސިޓީގެ މައްޗަށް ސެމީ ފައިނަލުގެ ދެވަނަ މެޗުގައި ކުރި ހޯދައިގެން ރެއާލް މެޑްރިޑް ވަނީ މުބާރާތުގެ ފައިނަލުގެ ޖާގަ ކަށަވަރުކޮށްފައެވެ. ވިޔަރެއާލް ބަލިކޮށްގެން ފައިނަލުގެ ފުރަތަމަ ޖާގަ ޔަގީން ކުރީ ލިވަޕޫލްއިންނެވެ. ލިވަޕޫލްއަށް ފައިނަލް ޔަގީންވުމާއެކު ސަލާހް ބުނީ އޭނާ ބޭނުންވަނީ ފައިނަލުގައި ރެއާލް އާއި ދެކޮޅަށް ކުޅެން ކަމަށެވެ. އޭނާގެ އެއުންމީދު މިހާރު މިވަނީ ފުރިހަމަވެފައެވެ.
ސަލާހް ރެއާލްއާއި ދެކޮޅަށް ކުޅެން ބޭނުންވަނީ ބަދަލުހިފުމުގެ ރޫހުގައެވެ. ރެއާލް ފައިނަލުގެ ޖާގަ ޔަގީންކުރުމާއެކު ސަލާހް ވަނީ "ވީ ހޭވް އަ ސްކޯ ޓު ސެޓްލް" ކަމަށް ބުނެ ޓްވީޓު ކޮށްފައެވެ.
2018 ވަނަ އަހަރު ޗެމްޕިއަންސް ލީގުގެ ފައިނަލުގައި ވެސް ބައްދަލުކުރީ ރެއާލް އާއި ލިވަޕޫލްއެވެ. އެމެޗުގައި ރެއާލްއަށް އޭރު ކުޅެމުން އައި ސާޖިއޯ ރާމޯސް ކުރި ނުރައްކާތެރި ފައުލަކާއި ގުޅިގެން ސަލާހްއަށް އަނިޔާވެ، އޭނާ ވަނީ ބަދަލުކޮށްފައެވެ. އެފަހަރުގެ މުބާރާތުގައި ލިވަޕޫލް ބަލިކޮށް ތަށި ކާމިޔާބުކުރީ ރެއާލްއެވެ.
މިހާރު ރެއާލްގައި ރާމޯސް ނެތް ނަމަވެސް ސަލާހް ބޭނުންވަނީ ރެއާލް ކައިރިން ބަދަލު ހިފުމަށެވެ. އަދި މި މަހުގެ 28 ވަނަ ދުވަހު ޕެރިސްގައި އޮންނަ ފައިނަލް މެޗުން މޮޅުވެ ސަލާހްގެ އުންމީދަކީ ލިވަޕޫލްއިން މުބާރާތް ކާމިޔާބުކުރުމެވެ.
