ލިވަޕޫލް ފައިނަލަށް، ކްލޮޕްގެ ނަޒަރުގައި ބޮޑު މޮޅެއް

ޔުއެފާ ޗެމްޕިއަންސް ލީގުގެ ސެމީ ފައިނަލުގެ ދެވަނަ މެޗުގައި ވިޔަރެއާލް ކައިރިން ހޯދުނީ ބޮޑު މޮޅެއްގެ ގޮތުގައި ލިވަޕޫލްގެ ކޯޗު ޖާގެން ކްލޮޕް ސިފަކޮށްފިއެވެ.

ސެމީ ފައިނަލުގެ ދެވަނަ މެޗުގައި ވިޔަރެއާލްގެ މައްޗަށް ލިވަޕޫލް ކުރިހޯދީ 3-2 ންނެވެ. މިއާއެކު ލިވަޕޫލް ފައިނަލުގެ ޖާގައެއް ކަށަވަރުކުރީ 5-2ން އެގްރިގޭޓުން ކުރިހޯދައިގެންނެވެ. ވިޔަރެއާލްގެ ދަނޑުގައި ކުޅުނު މި މެޗުގައި ފުރަތަމަ ލަނޑު ޖަހާ ލީޑު ނެގީވެސް ވިޔަރެއާލްއިންނެވެ. ފުރަތަމަ ހާފުގެ ތިންވަނަ މިނެޓުގައި ބޯލޭ ޑިއާ ލަނޑެއްޖަހާ ވިޔަރެއާލްއަށް ލީޑު ނަގައިދިން އިރު، ފުރަތަމަ ހާފު ނިމެނިކޮށް އެޓީމަށް ލީޑު ފުޅާކޮށްދިނީ ފްރެންސިސް ކޮކޭލިންއެވެ.

ދެވަނަ ހާފު ފެށިގެންވެސް ރަނގަޅަށް ކުޅެމުންއައި ވިޔަރެއާލްގެ މައްޗަށް ލިވަޕޫލް ކުރިހޯދީ ފަހަތުން އަރާ ތިން ލަނޑު ޖަހައިގެންނެވެ. ލިވަޕޫލްގެ ލަނޑުތައް ދެވަނަ ހާފުގައި ޖަހައިދިނީ ފަބީނިއޯ، ލުއިސް ޑިއާޒް އަދި ސަޑިއޯ މާނޭއެވެ.

މެޗަށްފަހު ލިވަޕޫލްގެ ކޯޗު ކްލޮޕް ބުނީ ވިޔަރެއާލްއިން ދެލަނޑުގެ ލީޑެއް ނަގާ މޮޅަށް ކުޅެމުން ދަނިކޮށް ފަހަތުން އަރާ މޮޅުވެވުމަކީ ބާސެލޯނާ އަދި ޑޯޓްމަންޑް ކައިރިން ފަހަތުން އަރާ މޮޅުވުން ފަދަ ކާމިޔާބީއެއް ކަމަށެވެ. އަދި ދެވަނަ ހާފުގައި ނަތީޖާ އަނބުރާލުމަށް ޓީމުގެ ކުޅުންތެރިންގެ ފަރާތުން ފެނުނު މޮޅު ކުޅުމަށް ކްލޮޕް ތައުރީފު ކުރިއެވެ.

ކްލޮޕް ބުނީ ފައިނަލުގައި މޮޅުވާނީ ކޮންމެސް އެއް ޓީމެއް ކަމަށާއި، ތިން މުބާރާތެއްގެ ފައިނަލަށް ޓީމު ދަތުރުކޮށްފައި ވާއިރު، މިއީ ކިހާ އުނދަގޫ ކަމެއްކަން އެނގޭ ކަމަށެވެ. އެހެންކަމުން ޓީމު ތައްޔާރުވެފައި އޮތީ ކިހާ ވަރަކަށްކަން އިދިކޮޅު ޓީމަށް ދައްކާލާނެ ކަމަށްވެސް ކްލޮޕް ބުންޏެވެ.

ޗެމްޕިއަންސް ލީގުގެ ފައިނަލަށް ލިވަޕޫލް ދަތުރުކުރުމާއެކު ކްލޮޕްވެފައި ވަނީ އެއް ސީޒަނެއްގައި އެފްއޭ ކަޕް، ލީގު ކަޕް އަދި ޗެމްޕިއަންސް ލީގުގެ ފައިނަލަށް ޓީމު ގެންގޮސްދިން ހަމައެކަނި ކޯޗަށެވެ.