ޑައިވިންއަށް ގޮސް އުޅެނިކޮށް ގެއްލުނު މީހާ އަދިވެސް ނުފެނޭ
3 މެއި 2022 | އަންގާރަ 07:49މިހާތަނަށް ދެ ހާބާ ކްރާފްޓެއް ބޭނުން ކޮށްގެން 55 ސްކޮޔާ ނޯޓިކަލް މައިލްސްގެ ސަރަހައްދެއް ވަނީ ބަލާފައި
ޑައިވިންއަށް ގޮސްއުޅެނިކޮށް ގެއްލުނު ސައީދު
ހޯމަ ދުވަހު ޑައިވިންއަށް ގޮސް އުޅެނިކޮށް ޏ. ފުވައްމުލަކުން ގެއްލުނު އުމުރުން 35 އަހަރުގެ މުހައްމަދު ސައީދު އަދިވެސް ނުފެންނަ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އެމްއެންޑީއެފް އިން ބުނީ ސައީދު ހޯދުމުގެ އޮޕަރޭޝަނުގައި މިހާތަނަށް ދެ ހާބާ ކްރާފްޓެއް ބޭނުން ކޮށްގެން 55 ސްކޮޔާ ނޯޓިކަލް މޭލުގެ ސަރަހައްދެއް ބަލާފައިވާ ކަމަށެވެ. އަދި މިހާރު ވެސް އެ ދެ ކްރާފްޓުން އަންނަނީ އޭނާ ހޯދުމުގެ މަސައްކަތް ކުރަމުން ކަމަށެވެ. މި އޮޕަރޭޝަނުގައި އެމްއެންޑީއެފް ޑޯނިއާ ފްލައިޓުވެސް ބައިވެރިވެއެވެ.
ސައީދު ޑައިވިންއަށް ފޭބީ ހޯމަ ދުވަހުގެ 14:30ހާއިރު ކަމަށާއި، ފީނަން ފޭބިއިރު އޭނާ ލައިގެން ހުރީ ކަޅުކުލައިގެ ޑައިވިން ސޫޓަކާއި ކަޅުކުލައިގެ ފިންސެއް ކަމަށާއި، އަޅައިގެން ހުރީ ކަޅުކުލައިގެ މާސްކެއްކަމަށް އެމްއެންޑީއެފުން ބުނެއެވެ.
ސައީދުއާއެކު ޑައިވިންއަށް އިތުރު މީހަކު ވެސް ދިޔައެވެ. އޭނާގެ ހާލު ސީރިއަސްވެ ހޯމަ ދުވަހުގެ ރޭގެ ވަގުތެއްގައި ވަނީ ދ. އަތޮޅުގައި އޮންނަ ކަނޑިންމަ ރިސޯޓަށް ގެންގޮސްފައެވެ. އެ ރިސޯޓަށް އޭނާ ގެންދިޔައީ އެތަނުގައި ހުންނަ ޑީކޯވާ މީހުންނަށް ފަރުވާދިނުމަށް ބޭނުންވާ ޚާއްސަ ޗެމްބަރުގައި ފަރުވާ ދިނުމަށެވެ.
ސައީދު ހޯދުމުގެ މަސައްކަތް ކުރަމުން އަންނައިރު އެ ސަރަހައްދުން ދަތުރު ކުރާ ދޯނިތަކުގެ އެހީއަށް ވެސް އެމްއެންޑީއެފުން ވަނީ އެދިފައެވެ. މީގެ އިތުރުން ފުވައްމަލަކުގެ ޑައިވަރުން ވެސް ދަނީ ސައީދު ހޯދުމުގައި އެމްއެންޑީއެފް އާއެކު މަސައްކަތް ކުރަމުންނެވެ.
