ސަރުކާރުގެ ވައުދަކީ ހުރިހާ މަސައްކަތްތެރިންނަށް މުސާރައިގެ ހަމަހަމަކަން ޤާއިމުކުރުން: އަމީރު

ސަރުކާރުގެ ވައުދަކީ ހުރިހާ މަސައްކަތްތެރިންނަށް މުސާރައިގެ ހަމަހަމަކަން ޤާއިމުކުރުންކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

މިނިސްޓަރ އަމީރު އެހެން ވިދާޅުވީ ތައުލީމީ ދާއިރާގެ މުވައްޒަފުންގެ މުސާރައަށް އައި ބަދަލުތަކާގުޅޭ މައުލޫމާތު ހިއްސާ ކުރުމަށް އާދިއްތަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

މިނިސްޓަރ ވިދާޅުވީ، ސަރުކާރުގެ ވައުދަކީ ރާއްޖޭގެ ހުރިހާ މަސައްކަތްތެރިންނަށް މުސާރައިގެ ހަމަހަމަކަން ޤާއިމުކުރުން ކަމަށެވެ. އެގޮތުން އެއް މަސައްކަތެއް ކުރާ ތަފާތު ވުޒާރާތަކުގައި މުސާރައިގެ ފަރަޤު ހިމެނޭއިރު، އެއް ފަންތީގެ ވަޒީފާތަކުގެ މުސާރައިގެ ހަމަހަމަކަން ޤާއިމުކުރަން ޖެހޭކަމަށް މިނިސްޓަރ ވިދާޅުވިއެވެ.

އެ މަސައްކަތަށް މަޑުޖެހުމެއް އައީ ކޮވިޑުގެ ޙާލަތުގެ ސަބަބުންކަމަށް މިނިސްޓަރ ވިދާޅުވިއެވެ.

ނޭޝަނަލް ޕޭ ކޮމިޝަނުން ސިއްޙީ ދާއިރާގެ ހުރިހާ ފަންނުވެރިންނާ ބައްދަލުކޮށް މަޝްވަރާ ކުރެވެމުންދާކަން ފާހަގަ ކުރައްވައި މިނިސްޓަރ އިތުރަށް ވިދާޅުވީ، ދާދި އަވަހަށް ސިއްޙީ ދާއިރާގެ އޮނިގަނޑުވެސް އެކުލަވާލެވިގެންދާނެ ކަމަށެވެ. އެ މަސައްކަތް ނިމުމާއެކު، ސިއްޙީ ދާއިރާގެ އައު މުސާރައިގެ ފްރޭމްވޯކު އެކުލަވާލެވޭނެކަމަށް މިނިސްޓަރ ވިދާޅުވިއެވެ.

މިނިސްޓަރ ވަނީ އެކި ދާއިރާތަކުގެ މުސާރައިގެ އޮނިގަނޑުތަކަށް ގެންނަ ބަދަލުތަކާއެކު، ބަޖެޓަށް އަންނާނެ ބުރައަށްވެސް ކުރިމަތިލެވޭނެ ކަމުގެ ޔަޤީންކަން އޮތްކަމަށް ވިދާޅުވެފައެވެ.

ޓީޗަރުންގެ މުސާރައަށް އަލިއަޅުވާލައްވައި މިނިސްޓަރ ވިދާޅުވީ، މިހާރު ޓީޗަރުންނަށް ލިބޭ މުސާރައަކީ ކުރާ މަސައްކަތާ އެކަށީގެންވާ މުސާރައެއް ނޫން ކަމަށެވެ.

ޓީޗަރުންގެ މުސާރައަށް މި އަންނަ ބަދަލުތަކާއެކު، ޕަރފޯމަންސް އެޕްރައިސަލް ނިޒާމުވެސް އިތުރަށް ހަރުދަނާވާން ޖެހޭކަމަށް މިނިސްޓަރ ވިދާޅުވިއެވެ.

ޓީޗަރުންގެ މުސާރައިގެ އައު ފްރޭމްވޯކަށް ބަލާއިރު، ޓީޗަރުން 5 ރޭންކަކަށް ވަނީ ބަހާލާފައެވެ.

އޭގެ ތެރެއިން ޑިޕްލޮމާ ފެންވަރުގެ ޓީޗަރެއްގެ މުސާރަ 10،000ން 13،000ށް އިތުރުވެގެންދާއިރު، ޑިގްރީ ފެންވަރުގެ ޓީޗަރުންގެ މުސާރަ 13،000ން 19،000ށް ބޮޑުވެގެންދެއެވެ.

އޭގެ އިތުރުން، މާސްޓަރސް ފެންވަރުގެ ޓީޗަރުންގެ މުސާރަ 15،000ން 20،000ށް އިތުރުވެގެންދެއެވެ.