އެމްޓީސީސީގެ އަހަރީ އާންމު ޖަލްސާ މެއި 19ގައި
30 އެޕްރީލު 2022 | ހޮނިހިރު 09:17މި ޖަލްސާގައި ބައިވެރިވެވޭނީ އޭޕްރީލް 18ގެ ނިޔަލަށް ކުންފުނީގެ ހިއްސާދާރުންގެ ގޮތުގައި ތިބި ފަރާތްތަކަށް
އެމްޓީސީސީގެ 2020 ވަނަ އަހަރުގެ އަހަރީ އާންމު ޖަލްސާގެ ތެރެއިން
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ 2021 ވަނަ އަހަރުގެ އަހަރީ އާންމު ޖަލްސާ މެއި 19 ވަނަ ދުވަހު ބާއްވަން ނިންމައިފިއެވެ.
އެމްޓީސީސީން ވަނީ އެ ކުންފުނީގެ އަހަރީ އާންމު ޖަލްސާއަށް ކުންފުނީގެ ހިއްސާދާރުންނަށް ދައުވަތު އަރުވާފައެވެ. އަހަރީ އާންމު ޖަލްސާ ބޭއްވުމަށް ހަމަޖެހިފައިވަނީ މެއި 19ވާ ދުވަހުގެރޭ 20:30ގައެވެ.
މިއަހަރުގެ އޭޕްރީލް 18ގެ ނިޔަލަށް އެކުންފުނީގެ ހިއްސާދާރުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް މި ޖަލްސާގައި ބައިވެރިވެވޭނެކަމަށް އެމްޓީސީސީން ބުނެއެވެ. މި ޖަލްސާގައި 2020 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ފާސްކުރުމާއި، 2021 ވަނަ އަހަރުގެ ޑިރެކްޓަރުންގެ ރިޕޯރޓް ހުށަހަޅައި ފާސްކުރުމާއި، 2021 ވަނަ އަހަރުގެ އޮޑިޓްކޮށްފައިވާ ކުންފުނީގެ ބެލެންސް ޝީޓާއި، ފައިދާއާއި ގެއްލުމުގެ ހިސާބު ހުށަހަޅައި ފާސްކުރުމާއި، 2021 ވަނަ އަހަރުގެ ފައިދާއިން ހިއްސާދާރުންނަށް ބެހުމަށް ޑިރެކްޓަރުންގެ ބޯޑުން ހުށަހަޅާފައިވާ އަދަދު ފާސްކުރުން ހިމެނެއެވެ. 2022 ވަނަ އަހަރަށް ކުންފުނީގެ އޮޑިޓަރުން ހޮވައި، އެފަރާތުގެ އުޖޫރަ ކަނޑައެޅުމާއި، ކުރިއަށް އޮތް ދައުރަށް ސަރުކާރުގެ ފަރާތުން ޑިރެކްޓަރުން އިންތިޚާބުކުރުމުގެ އިތުރުން، ކުރިއަށް އޮތް ދައުރަށް އާންމު ހިއްސާދާރުންގެ ފަރާތުން ޑިރެކްޓަރުން އިންތިޚާބު ކުރުމާއި، ހިއްސާދާރުންގެ ސުވާލުތަކަށް ޑިރެކްޓަރުންގެ ބޯޑުން ޖަވާބު ދިނުން ހިމެނެއެވެ.
މި ޖަލްސާގައި ބައިވެރިވާން ބޭނުން ހިއްސާދާރުންނަށް ރަޖިސްޓްރީވުމުގެ ފުރުސަތު މިހާރު ވަނީ ހުޅުވާލާފައެވެ. މެއި 17 ދުވަހުގެ ރޭ 20:30ގެ ކުރިން ރަޖިސްޓްރީވެވޭނެ ކަމަށް އެމްޓީސީސީން ބުނެއެވެ.
2021 ވަނަ އަހަރު އެމްޓީސީސީއަށް ލިބުނު ފައިދާއިން ހިއްސާއަކަށް 3.50 ރުފިޔާ ބެހުމަށް އާންމު ޖަލްސާ ލއަށް ހުށަހެޅުމަށް ކުންފުނީގެ ބޯޑުން މިހާރު ވަނީ ފާސްކޮށްފައެވެ. ޖުމްލަ ހިއްސާގެ ފައިދާގެ ގޮތުގައި 28.13 މިލިއަން ރުފިޔާ ބެހުމަށް އަހަރީ އާންމު ޖަލްސާއަށް ހުށަހެޅުމަށް އެ ކުންފުނިން ވަނީ ނިންމާފައެވެ.
