ރަމަޟާން މަސް އަލްވަދާއުކިޔަސް، ހެޔޮ ކަންކަމުގައި ދެމިތިބެން ބޭނުން ބަޔަކަށް ފުރުސަތު ގިނަ: ޚުތުބާ
29 އެޕްރީލު 2022 | ހުކުރު 08:32ރަމަޟާން މަސް ނިމުމުންވެސް ހެޔޮ ކަމުގައި ދެމިތިބުން މުހިންމު
ޚުތުބާ
ރަމަޟާން މަސް މުސްލިމުންނާ އަލްވަދާއު ކީނަމަވެސް، ހެޔޮ ކަންތައް ކުރުންމަތީ ދެމިހުންނަން އެދޭ ބަޔަކަށްޓަކައި އިސްލާމް ދީނުގައި ލައްވާފައިވާ ހެޔޮކަމުގެ ފުރުސަތުތައް ވަރަށް ގިނަ ކަމުގައި ހުކުރު ޚުތުބާގައި ބުނެފިއެވެ.
"ހެޔޮކަމުގައި ދެމި ތިބުމުގެ މުހިންމުކަން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ޚުތުބާގައި ވަނީ އަހަރެމެންގެ ތެރެއިން ބައެއް މީހުން ރަމަޟާން މަހު ހެޔޮ ކަންތައްތަކުގައި ޝާމިލުވެ އުޅެ، ރަމަޟާން މަސް ނިމުމުން އެކަންކަމަށް ފަރުވާ ކުޑަކުރާމަކީ އެކަމާމެދު ވިސްނަންޖެހިފައިވާ ކަމެއް ކަމަށް ބުނެފައެވެ. މިއީ މީހަކު އެތައް ޚަރަދަކާއި، އެތައް މަސައްކަތެއް ކޮށްގެން ރަނގަޅު ބިނާއެއް ކުރުމަށްފަހު އެ ބިނާ އަމިއްލަ އަތުން ފުނޑުފުނޑުކޮށްލުން ފަދަ ކަމެއް ނޫންތޯ ޚުތުބާގައި ވަނީ ސުވާލުކޮށްފައެެވެ. އަދި ފާފަތަކަށް އެނބުރި ދިއުމަށް ގަސްތުކުރާ ހާލު ކުރާ ހެޔޮ އަމަލުން ކުރާނީ ކޮން ފައިދާއެއްތޯވެސް ސުވާލުކޮށްފައިވެއެވެ.
އަޅުން ކުރާ ހެޔޮ އަމަލު މާތް ﷲ ގަބޫލުކުރެއްވިކަމުގެ ނިޝާންތަކުގެ ތެރޭގައި ފާފަތަކަށް އަރައިނުގަނެ ހެޔޮ އަމަލުކުރުންމަތީ ދެމިހުރުން ހިމެނޭކަމަށް އިލްމުވެރިން ބަޔާންކުރައްވާފައިވާކަމަށް ޚުތުބާގައި ބުނެފައިވެއެވެ. އަދި ރަމަޟާން މަހު ރޯދަ ހިފައި، ރޭއަޅުކަން ކޮށް، ހެޔޮ އަމަލުތައްކޮށް އުޅުނު މީހާ އެކަންތައްތަކާއިމެދު ބޮޑާވެ ނުގަތުމަށް ޚުތުބާގައި ނަސޭހަތްތެރިވެފައިވެއެވެ.
ރަމަޟާން މަސް މުސްލިމުންނާ އަލްވަދާއު ކީނަމަވެސް ހެޔޮ ކަންތައް ކުރުންމަތީ ދެމިހުންނަން އެދޭ ބަޔަކަށްޓަކައި އިސްލާމް ދީނުގައި ލައްވާފައިވާ ހެޔޮކަމުގެ ފުރުސަތުތައް ވަރަށް ގިނަ ކަމުގައި ޚުތުބާގައި ބުނެފައިވެއެވެ. އޭގެ ތެރެއިން އެންމެ މުހިންމު އެއް ފުރުސަތަކީ ޝައްވާލް މަހުގެ ހަ ރޯދަ ކަމަށް ބުނެފައިވެއެވެ.
ރަމަޟާން މަސް އަލްވަދާއު ކިޔުމުގެ ކުރިން ފިތުރު ޒަކާތް ދެއްކުމަށް ޚުތުބާގައި ނަސޭހަތްތެރިވެފައިވެއެވެ. ފިތުރު ޒަކާތަކީ ރަމަޟާން މަހުގެ ދުވަސްތަކުގައި ރޯދައަށް ތިބިއިރު އަޅުތަކުންނަށް ކުރެވިފައިވާ ކުށްފާފަތަކުގެ ކައްފާރާއެއްގެ ގޮތުގައާއި، ނިކަމެތި ފަޤީރުންނާއި މިސްކީނުންގެ ބޭނުންތައް ފުއްދައިދީ އީދުގެ އުފަލުގައި އެބައިމީހުން ބައިވެރިކުރުމަށްޓަކައި ޝަރްޢު ކުރައްވާފައިވާ ކަމެއް ކަމުގައި ޚުތުބާގައި ބުނެފައިވެއެވެ.
މިރެއަކީ ބަރަކާތްތެރި ރަމަޟާން މަހުގެ އެންމެ ފަހު އޮނަހިރި ވިލޭރޭކަމަށް ޚުތުބާގައި ވަނީ ހަނދާން އާކޮށްދީފައެވެ. ލައިލަތުލްޤަދްރީގެ މާތްކަމާއި މަތިވެރި ދަރުމައަށް އެދިގެން އަޅުކަމުގައި ހީވާގިވުމަށްވެސް ޚުތުބާގައި ނަސޭހަތްތެރިވެފައިވެއެވެ.
