ދެ އަހަރަށްފަހު، ގަރލް ގައިޑް އެސޯސިއޭޝަންގެ އީދު ޕްރޮޖެކްޓަށް ގުރައިދޫއަށް

ދެއަހަރަށްފަހު މޯލްޑިވްސް ގަރލް ގައިޑް އެސޯސިއޭޝަންގެ "އީދު ޕްރޮޖެކްޓް" ގުރައިދޫ މަރުކަޒަށް ގޮސް ބާއްވަން ނިންމައިފިއެވެ.

މި ޕްރޮޖެކްޓަކީ 2000 ވަނަ އަހަރުން ފެށިގެން ގަރލް ގައިޑް އެސޯސިއޭޝަންގެ ޒުވާން ލީޑަރުން އިސްނަގައިގެން، ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒަށް ގޮސް އެތަނުގައި ތިބޭ މީހުންނަށް ހަދިޔާ ދިނުމަށް ކުރިއަށްގެންދާ ޕްރޮޖެކްޓެކެވެ. ކޮވިޑް-19ގެ ހާލަތުގައި އެރަށަށް ގޮސް ހަދިޔާ ދެވޭގޮތް ވެފައެއް ނުވެއެވެ.

Advertisement

މި ޕްރޮޖެކްޓާ ގުޅިގެން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ގަރލް ގައިޑް އެސޯސިއޭޝަންގެ ޕަބްލިކް ރިލޭޝަންސް އޮފިސަރ ސަދާ މުހައްމަދު ވިދާޅުވީ، ކޮވިޑް-19ގެ ހާލަތުގައި މި ޕްރޮޖެކްޓު ކުރިއަށްގެންގޮސްފައިވަނީ އޮންލައިންކޮށް ކަމަށެވެ. ޚާއްސަ ހުއްދައިގެ ދަށުން ހަދިޔާ ފޮނުވައި، އޮންލައިންކޮށް އެމީހުންނާ ބައްދަލުކޮށްފައިވާކަމަށެވެ.

ޖެހިޖެހިގެން ދެ އަހަރު އޮންލައިންކޮށް މި ޕްރޮޖެކްޓު ހިންގުމަށްފަހު މިއަހަރު ގުރައިދޫއަށް ގޮސް ޕްރޮޖެކްޓު ކުރިއަށްގެންދިއުމަށް އެ އެސޯސިއޭޝަނުން ވަނީ ނިންމާފައެވެ. ސަދާ ވިދާޅުވީ، ވަޅުއީދު ދުވަހު އެމީހުން ހޭދަކޮށްލަނީ އެތަނުގައި ތިބޭ މީހުންނާއެކު ކަމަށެވެ. އެދުވަހު އެމީހުންނަށް ހަދިޔާ ދީ، މުނިފޫހި ފިލުވުމަށް އެކި ހަރަކާތްތައް ކުރިއަށްގެންދާނެކަމަށް ސަދާ ވިދާޅުވިއެވެ.

ސަދާ ވިދާޅުވީ މި ހަރަކާތަކީ ދުރާލައި ތައްޔާރުވެގެން ކުރިއަށްގެންދާ ހަރަކާތެއް ކަމަށެވެ. މިގޮތުން ހަދިޔާ ހޯދުމާއި، ޕެކްކުރުން ފަދަ ކަންކަން ކުރިއަށްގެންދެއެވެ. ހަދިޔާ ހޯދާއިރު އެމީހަކަށް އެންމެ ބޭނުންވަނީ ކޮން އެއްޗެއްތޯ ބަލާކަމަށް އޭނާ ވިދާޅުވިއެވެ.

ސަދާ ވިދާޅުވީ 2000 ވަނަ އަހަރުން ފެށިގެން މި ޕްރޮޖެކްޓު ކުރިއަށްގެންދާއިރު، ކޮންމެ އަހަރަކުވެސް ލިބޭ ތަރުހީބު ވަރަށް ބޮޑުކަމަށެވެ.

މި ޕޮޖެކްޓާ ގުޅިގެން ވާހަކަދައްކަވަމުން އެ އެސޯސިއޭޝަންގެ އިންޓަރނޭޝަނަލް ކޮމިޝަނަރ އާއިޝަތު ތޮއިފާ ވިދާޅުވީ، މި ޕްރޮޖެކްޓުގެ އެންމެ ބޮޑު މަގުސަދަކީ މުޖުތަމައަށް ޚިދުމަތް ކޮށްދިނުން ކަމަށެވެ. އަދި އެ އެސޯސިއޭޝަންގެ އެންމެ މުހިންމު އެއް އަމާޒަކީ މުޖުތަމައުގައި އަންހެނުންނާއި އަންހެން ކުދިން ބިނާކުރުން ކަމުގައިވާއިރު، މިފަދަ ކަމެއްގައި ޒުވާން ލީޑަރުން ހަރަކާތްތެރިވުމަކީ އެކުދިން ބިނާކުރުމަށް ލިބޭ ވަރަށް ބޮޑު ފުރުސަތެއްކަމަށް އޭނާ ވިދާޅުވިއެވެ.

އެކުދިންނަށް، މުޖުތަމައުގައި ބޭނުންޖެހިފައިވާ މީހުން ތިބިކަމާއި، އެމީހުންނަށް އެހީތެރިކަން ފޯރުކޮށްދެވުމުގެ އިތުރުން، އެކުދިންގެ ރޭވުންތެރިކަމާއި ހިންގުންތެރިކަން ވަރަށް ބޮޑަށް ކުރިއަރައިގެންދާކަމަށާއި، ދާއިމީ ގޮތެއްގައި މި ޕްރޮޖެކްޓުގައި މަސައްކަތް ކުރަމުންދާ ކުދިންތަކެއް މިހާރުވެސް އެބަތިބިކަމަށް ތޮއިފާ ވިދާޅުވިއެވެ.

މިއީ މުޖުތަމައުގައި ހުރި މައްސަލަތައް ދެނެގަނެވި މުޖުތަމައުގެ ހޭލުންތެރިކަން އިތުރުކުރުމަށްވެސް ލިބޭ ވަރަށް ބޮޑު ފުރުސަތެއް ކަމަށްވެސް އޭނާ ވިދާޅުވިއެވެ.