ޕާކިސްތާނުގެ ބޮޑުވަޒީރު ޝަހްބާޒް ޝަރީފްގެ ޚާއްސަ އެސިސްޓެންޓުގެ މަގާމަށް ހަނަފީ އައްބާސީ ހަމަޖައްސަވައިފިއެވެ.
ޓައިމްސް އޮފް އިސްލާމްއާބާދުގައި ރިޕޯޓުކޮށްފައިވާގޮތުން މިމަގާމަށް ހަނަފީ އައްބާސީ އައްޔަނުކުރެއްވިކަން ރަސްމީކޮށް އެނގިގެން ގޮސްފައިވަނީ ބުދަ ދުވަހުއެވެ.
ހަނަފީ އައްބާސީއަކީ ވިޔަފާރިވެރިއެކެވެ. އަދި ޕާކިސްތާން މުސްލިމް ލީގު ނަވާޒު ޕާޓީގެ މެމްބަރެކެވެ. އޭނާ ވަނީ މީގެ ކުރިން 2002ން 2008ށް އަދި 2008ން 2013 ވަނަ އަހަރަށް ޕާކިސްތާންގެ ނެޝަނަލް އެސެމްބްލީގެ މެމްބަރުކަން ކުރައްވާފައެވެ. ނަމަވެސް 2018 ވަނަ އަހަރުގެ އޭޕްރީލް މަހު ހަނަފީ އައްބާސީއަށް ވަނީ (ޑްރަގްގެ މައްސަލައަކާ ގުޅިގެން) އުމުރު ދުވަހުގެ ޖަލު ހުކުމެއް ކޮށްފައެވެ.
ހަނަފީ އައްބާސީގެ އިތުރުން ޕާކިސްތާނުގެ ކުރީގެ ސަފީރެއް ކަމަށްވާ މުހައްމަދު ސާދިގުވެސް ވަނީ މި މަގާމަށް އައްޔަނުކުރައްވާފައެވެ.
ހަނަފީ އައްބާސީ އަދި މުހައްމަދު ސާދިގުގެ މިމަގާމަކީ ފެޑެރަލް މިނިސްޓަރުކަމާ އެއްވަރުގެ މަގާމެއް ކަމަށް ޓައިމްސް އޮފް އިސްލާމްއާބާދުން ފާހަގަކުރެއެވެ.
