ފިތުރު އީދުގެ ޗުއްޓީއަކީ ގިނަ އަދަދެއްގެ ބަޔަކު ކަނޑުމަގުން އެއް ރަށުން އަނެއް ރަށަށް ދަތުރުކުރަމުންދާ ދުވަސްވަރެއްކަމުން, ކަނޑުމަގުން ދަތުރުކުރާ ފަރާތްތަކުން މޫސުމާބެހޭ އެންމެ ފަހުގެ މައުލޫމާތު ހޯދައިގެން ދަތުރުކުރުމަށް އެމްއެންޑީއެފުން އިލްތިމާސްކޮށްފިއެވެ.

އެމްއެންޑީއެފުން ބުނީ، އޮޑިވެރިންނާއި ކެޕްޓަނުންނާއި ފަޅުވެރިން އަދި ދަތުރުތަކުގައި ބައިވެރިވާ މީހުންވެސް، ދަތުރުކުރެވެނީ ސަލާމަތާއި ރައްކާތެރި އުޅަނދެއްގައިކަން ޔަގީންކޮށްގެން ކަނޑުމައްޗަށް އެރުމަށް އިރުޝާދުދޭކަމަށެވެ. އަދި ދަތުރުކުރާއިރު އެއްވެސް ކަމެއް ދިމާވެއްޖެނަމަ ލަސްނުކޮށް އެމްއެންޑީއެފް ކޯސްޓްގާޑުގެ ހިލޭ ގުޅޭ ނަންބަރު 191ށް ގުޅުމަށް ވަނީ އިލުތިމާސްކޮށްފައެވެ.

ދަތުރަށް ފެށުމުގެ ކުރިން މޫސުމަށް ބަލައި ރައްކާތެރި މަގެއް ޚިޔާރުކޮށްގެން ދަތުރުކުރުމަށް ވަނީ އިލްތިމާސްކޮށްފައެވެ. އަދި މޫދު ކުޅިވަރު ކުޅޭ ފަރާތްތަކުންވެސް ސަލާމަތީ ކަންކަމަށާއި މޫސުމަށް ބަލައިގެން ކަންކަން ރޭވުމަށް ވަނީ އެދިފައެވެ. ފާއިތުވި އަހަރުތަކެކޭ އެއްފަދައިން މިއަހަރުވެސް ކޯސްޓްގާޑުން ކަނޑުމަތީ އުޅަނދުފަހަރުގެ ސަލާމަތީ ކަންކަން ބަލަމުންދާނެކަމަށް އެމްއެންޑީއެފުން ބުނެއެވެ.

އީދު ބަންދާކޮށް ގިނަ ބަޔަކު ތަންތަނަށް ފުރައިގެންދާތީ، ކަނޑު އުޅަނދު ފަހަރުގެ ސަލާމަތީ ކަންކަން ހުރިނެތްގޮތް ބެލުމުގެ ހަރަކާތެއް މެރިން ޕޮލިސްއިންވެސް ވަނީ ފަށާފައެވެ. އޭޕްރީލް 26ން ފެށިގެން މެއި 2 ވަނަ ދުވަހުގެ ނިޔަލަށް ކުރިއަށް ގެންދާ މި ހަރަކާތަކީ، ފިތުރު އީދު ބަންދާ ދިމާކޮށް ގިނަ ބަޔަކު އަތޮޅުތެރެއަށް ކަނޑުމަގުން ދަތުރުކުރާއިރު، އެފަރާތްތަކުގެ ސަލާމަތާއި ރައްކާތެރިކަން ކަށަވަރުކޮށް، ކަނޑު އުޅަނދު ފަހަރުގެ ސަލާމަތީ ކަންކަން ހުރިނެތްގޮތް ބެލުމުގެގޮތުން، މެރިން ޕޮލިސްގެ މެރިން އިންވެސްޓިގޭޝަން ޑިޕާޓްމަންޓާއި މެރިން އެންފޯސްމަންޓް އެންޑް އޮޕަރޭޝަންސް ޑިޕާޓްމަންޓުން ކުރިއަށް ގެންދާ ހަރަކާތަކެވެ. 

މިފަހަރުގެ އީދު ބަންދުގައި ކޮންމެވެސް ވަރަކަށް ވިއްސާރަކުރާނެކަމަށް މެޓް އޮފީހުން ވަނީ މީގެކުރިން ބުނެފައެވެ.