މަތީ ތައުލީމާއި ތަމްރީނުގެ ދާއިރާއިން ކިޔަވަން ބޭނުންވާ ދަރިވަރުންނަށް ސަރުކާރުން ކުރިއަށްގެންދާ ހުރިހާ ސްޓޫޑަންޓް ލޯނެއްގެ އެޑްމިނިސްޓޭޝަން ފީ 1 އިންސައްތައަށް ކުޑަކޮށްފިއެވެ.

އެޑްމިނިސްޓްރޭޝަން ފީ ކުޑަކުރަން ނިންމެވުމާގުޅިގެން ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވީ، އިދާރީ ފީ %1 އަށް ކުޑަކުރުމުގެ ސަބަބުން ދަރިވަރުންނަށް ވަރަށް ބޮޑު ލުއިފަސޭހަކަމާއި ހިތްހަމަޖެހުމެއް ލިބިގެންދާނެކަމަށް ގަބޫލުކުރައްވާކަމަށެވެ. އަދި ކިޔަވާ ނިމިގެން އެނބުރި އައިސް، އެއްބަސްވެފައިވާގޮތަށް ފައިސާ އަނބުރާ ދެއްކުމުގެ ކަންކަން ޒިންމާދާރުކަމާއެކު ކުރިއަށްގެންދާނެކަމަށް ޔަގީން ކުރައްވާކަމަށް ވިދާޅުވިއެވެ.

ހުރިހާ ސްޓޫޑެންޓް ލޯނެއްގެ އެޑްމިނިސްޓްރޭޝަން ފީ ކުޑަކުރުމާގުޅިގެން، ކަމާގުޅުންހުރި އިދާރީ މަސައްކަތްތައް ކުރަން ފަށާފައިވާކަމަށް މިނިސްޓްރީން ބުނެއެވެ. ލޯނު ނަގާފައިވާ ހުރިހާ ދަރިވަރުންނަށް ލޯނަށް ގެނެވުނު ބަދަލު ލިޔުމަކުން އަންގަމުން ގެންދާނެ ކަމަށް ހަޔަރ އެޑިއުކޭޝަން މިނިސްޓްރީން ބުނެފައިވެއެވެ. އަދި މަތީ ތައުލީމާއި ތަމްރީނު ހާސިލްކުރުމަށް، މިނިސްޓްރީ އޮފް ހަޔަރ އެޑިޔުކޭޝަން މެދުވެރިވެގެން، ބޭންކް އޮފް މޯލްޑިވްސްއިން ލޯނު ނަގާފައިވާނަމަ، މި ޚިދުމަތައް އެދެން ބޭނުން ފަތާތްތަކުން ސިޓީއަކުން ނުވަތަ އީމެއިލް މެދުވެރިކޮށް [email protected] އަށް އަ.އި.ޑީ ކާޑު ކޮޕީއާއެކު ހުށަހެޅުމަށް މިނިސްޓްރީން އެދެއެވެ.

މިސަރުކާރު ވެރިކަމާ ހަވާލުވި ފަހުން ފުރަތަމަ އަހަރުވެސް އެޑްމިނިސްޓްރޭޝަން ފީ ވަނީ %5 އިން %3 އަށް ކުޑަކޮށްފައެވެ. އެއީ 16 ޖޫން 2019ގައެވެ.

ރާއްޖޭގައި މިވަގުތު ސްޓޫޑެންޓް ލޯނުގެ ދަށުން 9،054 ދަރިވަރުން ދަނީ ކިޔަވަމުންނެވެ.