ރީ-ރަޖިސްޓްރޭޝަން އަދަދު 45 އިންސައްތައަށް އިތުރު ވާންވީ ސަބަބެއް ނެތް، އީސީއަކަށް އޮޅުވައެއް ނުލެވޭނެ: ރައީސް ނަޝީދު

ރީ-ރަޖިސްޓްރޭޝަން އަދަދު 45 އިންސައްތައަށް އިތުރުވާންވީ ސަބަބެއް ނެތްކަމަށް ވިދާޅުވެ ކުރީގެ ރައީސް މުހައްމަދު ނަޝީދު، އިލެކްޝަންސް ކޮމިޝަނަށް ފާޑުވިދާޅުވެއްޖެ އެވެ.

އިންތިޚާބު އޮޅުވާލުމަށް އިލެކްޝަންސް ކޮމިޝަނުން މަސައްކަތްކުރާކަމަށް ގިނަ ފަރާތްތަކަކުން ތުހުމަތު ކުރަމުންދަނިކޮށް، ރައީސް ނަޝީދު އަންގާރަ ދުވަހު ކުރެއްވި ޓުވީޓެއްގައި ވިދާޅުވީ މި ފަސް އަހަރު ވޯޓުލުމުގެ ހައްޤު ލިބިގެންވާ މީހުން އިތުރުވީ 10% އަށް ކަމަށެވެ. އަދި މާލޭގެ ސުކޫލްތަކުގެ އެންރޯލްމެންޓް އިތުރުވީވެސް 10% އަށް ކަމަށާއި، ރިސޯޓުތަކުގައި ބަހައްޓާ ވޯޓު ފޮށީގެ އަދަދު 50% އަށް ދަށްކޮށްފައިވާކަމަށެވެ.

އެ އަދަދުތައް އެހެން ހުރުމާއެކު ރީ-ރެޖިސްޓްރޭޝަން އަދަދު 45% އަށް އިތުރުވާންވީ ސަބަބެއް ނެތްކަމަށް ރައީސް ނަޝީދު ވިދާޅުވި އެވެ. އަދި ވިދާޅުވީ އިލެކްޝަންސް ކޮމިޝަނަށް އޮޅުވާ ނުލެވޭނެ ކަމަށާއި، އިބްރާހިމް މުހައްމަދު ސޯލިހް (އިިބޫ) އިިންތިޚާބު ކާމިޔާބުކުރައްވާނެ ކަމަށެވެ.

އިލެކްޝަންސް ކޮމިޝަނުން އެންމެފަހުން އާންމުކޮށްފައިވާ މައުލޫމާތުތަކުގައިވާގޮތުން އިންތިހާބުގައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލުމަށް ޖުމްލަ 95000 އަށްވުރެ ގިނަ ފޯމް ހުށައަޅާފައިިވެއެވެ. އެއީ މިދިޔަ އިންތިހާބުތަކުގައި ހުށައެޅުނު އަދަދަށްވުރެ ގާތްގަނޑަކަށް 2 ގުނަ އިތުރު އަދަދެކެވެ.

އިންތިހާބުގައި ވޯޓުލުމުގެ ހައްޤު 262000 އަށްވުރެ ގިނަ މީހުންނަށް ލިބިފައިވާއިރު، އިންތިހާބުގައި އަލަށް 23000 އަށްވުރެ ގިނަ ޒުވާނުން ވޯޓުލާނެކަމަށް ވަނީ ލަފާކޮށްފަ އެވެ.

ވޯޓަރސް ލިސްޓުގައި އޮޅުވާލުންތަކެއް އުޅޭކަމަށް ގިނަ ފަރާތްތަކަކުން ތުހުމަތު ކުރަމުންދާއިރު، ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިިބޫ) ވަނީ ސައްހަކަން ކަށަވަރު ނުވާ ވޯޓަރސް ލިސްޓެއްގައި ސޮއިނުކުރައްވާނެކަމަށް ވިދާޅުވެފަ އެވެ.