އަންހެނުންގެ ޝިކާރައަކަށްވާ ފިރިހެނުންވެސް މަދެއް ނޫން

ގެވެށި އަނިޔާއޭ ބުނެފިނަމަ އާންމުގޮތެއްގައި ގިނަ ބަޔަކަށް ހީވެފައި އޮންނަނީ އެ އަނިޔާގެ ޝިކާރައަކަށް ވަނީ ހަމައެކަނި އަންހެނުން ކަމެވެ. އަދި ގިނައިން އިވެނީވެސް އަންހެނަކަށް ގެވެށި އަނިޔާ ލިބިގެން އުޅޭ ވާހަކައެވެ. ގިނަފަހަރަށް މުޖުތަމައު ތެރޭގައި "ނުލަފާ" މީހުންގެ ގޮތުގައި ލޭބަލް ކުރެވިފައިވަނީވެސް ފިރިހެނުންނެވެ. މިގޮތަށް ލޭބަލްވަމުން އައިސް ގެވެށި އަނިޔާވެސް ލިބެނީ ހަމައެކަނި އަންހެނުންނަށްކަމަވެސް ވަނީ ކަނޑައެޅި ނިމިފައެވެ.

ފިރިހެނުންނަކީ "ނުލަފާ" ބައެއްގެ ގޮތުގައި ލޭބަލް ވަމުން އައިނަމަވެސް އަންހެނުންގެ ފަރާތުން ފިރިހެނުންނަށް ގެވެށި އަނިޔާ ލިބޭ ވާހަކައަކީ މުޖުތަމައުގެ ތެރޭގައި ނުދައްކާ ވާހަކަތަކެވެ. އެކި އިންސާނުންގެ އުޅުން އެކި ގޮތަށް ބައްޓަންކުރައްވާފައިވާއިރު، ގޯސް އުޅުން ދެއްވާފައިވަނީ ހަމައެކަނި ފިރިހެނުންނަށް ނޫންކަން މިއަދު ގަބޫލުކުރަންޖެހެއެވެ. އަޑުހަރުކޮށް އެ ވާހަކަ ނުދެއްކި ނަމަވެސް ގެވެށި އަނިޔާ ތަހަމައްމަލުކުރަމުންދާ އެތައް ފިރިހެނުންނެއް މިއަދުވެސް މި މުޖުތަމައުގައި އެބަތިއްބެއެވެ.

ރާއްޖޭގެ ތަފާސްހިސާބުތަކަށް ބަލާއިރު ފިރިހެނުންނަށް ގެވެށި އަނިޔާ ލިބިގެން މަދުން ނަމަވެސް ރިޕޯޓުކޮށްފައި އެބަހުއްޓެވެ. ދުނިޔޭގެ ތަފާސްހިސާބުތަކަސް ބަލާއިރު އަހަރަކު 757،000 ފިރިހެނުންނަށް ގެވެށި އަނިޔާލިބިގެން ރިޕޯޓުކޮށްފައި އެބަހުއްޓެވެ. ގެވެށި އަނިޔާގެ ޝިކާރައަކަށްވެގެން ރިޕޯޓުކުރާ ކޮންމެ ތިން މީހެއްގެ ތެރެއިން އެކަކީ ފިރިހެނެކެވެ. އަދި އަހަރެއްގެ މައްޗަށް 1.5 މިލިއަން އަންހެނުން ގެވެށި އަނިޔާގެ ޝިކާރައަކަށްވާކަމީވެސް ކަންބޮޑުވާންޖެހޭ ކަމެކެވެ.

ގެވެށި އަނިޔާގެ ވާހަކަތައް އަބަދުވެސް ދެކެވޭއިރު ފިރިހެނުންނަށް ގެވެށި އަނިޔާ ލިބޭ ވާހަކަ ގިނަ ބަޔަކު ދައްކަންފެށީ މަޝްހޫރު އެކްޓަރ, ލަވަލިޔުންތެރިޔާ އަދި ޕްރޮޑިއުސަރ ޖޯނީ ޑެޕް އޭނާގެ ކުރީގެ އަނބިމީހާ އެމްބަރ ހަރޑްއަށް އަނިޔާކުރި ކަމަށްބުނެ އެ މައްސަލައިގެ ޝަރީއަތްތައް ކުރިއަށްދާވަރަކުން އަސްލު ކަން ހިނގާފައިއޮތްގޮތް އެނގި މައްސަލަ އެހެން ކޮޅަކަށް އެނބުރުނު ހިސާބުންނެވެ.

ހަރޑް ވަނީ މީގެ އަހަރުތަކެއް ކުރިން ޑެޕް އޭނާއަށް އަނިޔާކުރާ ކަމަށްބުނެ އެ ވާހަކަތައް މީޑިއާއާވެސް ހިއްސާކޮށްފައެވެ. މިކަން ވެގެންދިޔައީ އާންމުންގެ ތެރޭގައި ބޮޑު މަގުބޫލުކަމެއް ހޯދާފައިވާ ކެރެކްޓަރ "ޖެކް ސްޕެރޯ" ގެ ކެރިއަރަށްވެސް ނުރަނގަޅު އަސަރުތަކެއް ކުރަން ފެށި ކަމަކަށެވެ. އެހުރިހާ ކަމެއް ވީއިރުވެސް ޑެޕްއަށް ވާހަކަދެއްކުމުގެ ފުރުސަތެއް ނުލިބުނެވެ. އޭނާއަށް ހަރޑްގެ ފަރާތުން ލިބެމުންދިޔައީ މަލާމާތާއި، އިހާނެތި ބަސްތަކެވެ. އަނބިމީހާގެ ކުރިމަތީގައި ވާހަކަދެއްކުމުގެ ފުރުސަތެއް އޭނާއަކަށް ނުލިބުނެވެ. އަހަރުތަކަކަށް އުނދަގޫ އެތައް ކަމެއް އޭނާ ވަނީ ތަހައްމަލުކުރަންޖެހިފައެވެ. އަދި އާޚިރުގައި ގެވެށި އަނިޔާކުރާކަމަށް ނަންވީވެސް ޚުދު އޭނާއެވެ.

މިއީ ގެވެށި އަނިޔާ ތަހައްމަލުކުރަމުދިޔަ އެންމެ ފިރިހެނެއްގެ ވާހަކައެވެ. އަދި އަނިޔާއަކީ ވަކި ޖިންސަކަށް، ވަކި ޝަޚުސަކަށް ވީތީ ލިބޭ އެއްޗެއް ނޫންކަންވެސް މިއަދު މިވަނީ އެނގިފައެވެ. މިގޮތަށް އަމިއްލަ ދިފާއުގައި ވާހަކަދެއްކުމުގެ ހިތްވަރު ނުލިބި ކިހާ ބަޔަކު ތިބޭނެތޯއެވެ؟ މުޖުތަމައުން އެމީހުންގެ ވާހަކަ ގަބޫލުނުކޮށްފާނެތީ އެވާހަކަ ނުދައްކާ ކިހާ ބަޔަކު ތިބޭނެތޯއެވެ؟ އުނދަގޫވި ނަމަވެސް މި ވާހަކަތައް ދައްކަންޖެހެއެވެ. ކޮންމެ މީހަކީވެސް މުޖުތަމައަށް މުހިންމު މީހެކެވެ.