ޔޫއެންއޯޑީސީގެ ފަރާތުން އެމްއެންޑީއެފަށް ބައެއް އާލާތްތައް ހަދިޔާކޮށްފި
ރަސްމިއްޔާތު ނިމިގެން ދިޔައީ ރިބް ދުއްވުމުގެ ދައްކާލުމަކުން
މި ރަސްމިއްޔާތުގައި ޖަޕާނު ސަރުކާރާ ދިވެހިއަސްކަރިއްޔާއާ ދެމެދު ވަނީ ހަނދާނީ ފިލާ ބަދަލުކުރެވިފައި
ޖަޕާނު ސަރުކާރުގެ ހިލޭ އެހީގެ ދަށުން ޔޫ.އެން.އޯ.ޑީ.ސީގެ ފަރާތުން އެމް.އެން.ޑީ.އެފް ކޯސްޓްގާޑަށް 2 ރިބާއި، ކޯސްޓްގާޑް އުޅަނދުތަކުގެ ނިޔަމިކަމަށް ބޭނުންވާ އާލާތްތަކާއި، މެރިޓައިމް ޑޮމެއިން އެވެއަރނެސްއަށް ބޭނުންވާ ބައެއް އާލާތްތައް ހަދިޔާކޮށްފިއެވެ.
ހުޅުމާލޭ ކޯސްޓްގާޑް ސަރަހައްދުގައި ބޭއްވި މިރަސްމިއްޔާތުގައި ޗީފް އޮފް ޑިފެންސް ފޯރސް، ވައިސް ޗީފް އޮފް ޑިފެންސް ފޯރސް، ޔޫއެންއޯޑީސީ ޕްރޮގްރާމް ކޯޑިނޭޓަރ އަދި ޖަޕާނުގެ އެމްބެސެޑަރ ބައިވެރިވެވަޑައިގެންނެވިއެވެ.
ޖަޕާނު ސަރުކާރާއި ޔޫއެންއޯޑީސީގެ ފަރާތުން އެމްއެންޑީއެފް ކޯސްޓްގާޑަށް ފާއިތުވި އަހަރުތަކުގެ ތެރޭގައި އެކި ގޮތްގޮތުން ވަރަށް ގިނަގުނަ އެހީތަކެއް ފޯރުކޮށްދީފައިވާކަމަށް އެމްއެންޑީއެފުން ބުނެއެވެ. މިގޮތުން ދިވެހި ރާއްޖޭގެ ކަނޑުގެ ސަރަހައްދު މޮނީޓަރކުރުމުގެ އިތުރުން ސަލާމަތްތެރިކަން ދެމެހެއްޓުމަށް ވަރަށް ގިނަގުނަ ވަސީލަތްތައް ފޯރުކޮށްދީފައިވެއެވެ.
ދިވެހި ސިފައިންނާއި ކަނޑުމަތީގައި ހަރަކާތްތެރިވާ އެހެން މުއައްސަސާތަކަށް ވިޒިޓް، ބޯޑް، ސަރޗް އެންޑް ސީޒަރ ޓްރެއިނިންގް ފަދަ ތަމްރީނުތައް ވަނީ ކުރިއަށް ގެންގޮސްފައެވެ. މިފަރާތްތަކުން ދީފައިވާ އެހީގެ ސަބަބުން، ދިވެހި ރާއްޖޭގެ ކަނޑުގެ ސަރަހައްދުތައް ހިމާޔަތްކުރުމާއި ސަލާމަތްތެރިކަން ދެމެހެއްޓުމުގައި އެމް.އެން.ޑީ.އެފް ކޯސްޓްގާޑްގެ ގާބިލިއްޔަތުކަން ވަނީ އިތުރަށް ވަރުގަދަވެފައެވެ.
މި ރަސްމިއްޔާތުގައި ޖަޕާނުގެ އެމްބެސެޑަރ ޓަކެއުޗީ މިޑޯރީއާއި، ޔޫއެންއޯޑީސީގެ ޕްރޮގްރާމް ކޯޑިނޭޓަރ ޕަރނިލް ރަސްމުސެންގެ އިތުރުން ކޯސްޓްގާޑް ކޮމަންޑަންޓް ކާނަލް އިބްރާހީމް ހިލްމީ ވަނީ ރަސްމިއްޔާތުގައި ވާހަކަފުޅުދައްކަވާފައެވެ. މީގެ އިތުރުން މި ރަސްމިއްޔާތުގައި ޖަޕާނު ސަރުކާރާ ދިވެހި އަސްކަރިއްޔާއާ ދެމެދު ވަނީ ހަނދާނީ ފިލާ ބަދަލުކުރެވިފައެވެ. ރަސްމިއްޔާތު ނިމިގެން ދިޔައީ ރިބް ދުއްވުމުގެ ދައްކާލުމަކުންނެވެ.
