ދައުލަތަށް ލިބެންޖެހޭ 1.5 މިލިއަން ރުފިޔާ އަނބުރާ ހޯދުމަށް އޭސީސީން ކަމާގުޅުން ހުރި އިދާރާތަކަށް އަންގައިފި
އެއީ ވޭތުވެދިޔަ 01 މަސްދުވަހުގެ ތެރޭގައި ތަޙްޤީޤުކޮށް ނިންމި މައްސަލަތަކުގައި ހިމެނޭ ފައިސާ
އެންޓި ކޮރަޕްޝަން ކޮމިޝަން (އޭސީސީ)
ދައުލަތަށް ލިބެންޖެހޭ މިލިއަނަަކަށްވުރެ ގިނަ ރުފިޔާ އަނބުރާ ހޯދުމަށް އޭސީސީން ކަމާގުޅުން ހުރި އިދާރާތަކަށް އަންގައިފިއެވެ.
އޭސީސީން ބުނީ، އެއީ އެ ކޮމިޝަނުން ވޭތުވެދިޔަ 01 މަސްދުވަހުގެ ތެރޭގައި ތަޙްޤީޤުކޮށް ނިންމި މައްސަލަތަކުގައި ހިމެނޭ ފައިސާ ކަމަށެވެ. އެގޮތުން 1,570,814.44 (އެއްމިލިއަން ފަސްސަތޭކަ ހަތްދިހަހާސް އަށްސަތޭކަ ސާދަ ރުފިޔާ ސާޅީސް ހަތަރު ލާރި) އަނބުރާ ހޯދުމަށް އެދި، ކަމާގުޅުން ހުރި އިދާރާތަކަށް ވަނީ އަންގާފައެވެ.
މިކަމާ ގުޅޭގޮތުން ރާއްޖެއެމްވީން ސުވާލުކުރުމުން އޭސީސީން ބުނީ، ދައުލަތަށް އަނބުރާ ހޯދުމަށް އަންގާފައިވާ ފައިސާ ހިމެނޭ މައްސަލަތަކުގެ ތެރޭގައި ރ.އަލިފުށީ އެކި ސަރަހައްދުތަކުން ދޫކޮށްފައިވާ ކުލީ ބިންތަކުން ކުލި ނުލިބިވާ މައްސަލައެއް ހިމެނޭ ކަމަށެވެ.
އެއީ ސެޕްޓެންބަރު 2020އާ ހަމައަށް ނުލިބިވާ ފައިސާކަން ފާހަގަކޮށް އޭސީސީން ބުނީ، އޭގެ ތެރޭގައި 10 ފަރާތަކަށް ދޫކޮށްފައިވާ 12 ބިމެއްގެ ކުލީގެ ފައިސާ ހިމެނޭ ކަމަށެވެ. އެއީ 1.4 މިލިއަން ރުފިޔާއެވެ.
މީގެ އިތުރުން، ރައީސުލްޖުމްހޫރިއްޔާގެ ރަސްމީ ގެކޮޅު، މުލީއާގެއަށް ދޫކޮށްފައިވާ ކޯޕަރޭޓް ކްރެޑިޓް ކާޑު ބޭނުންކުރުމުގެ އުސޫލާ ޚިލާފަށް، 2007 ވަނަ އަހަރުގައި ކޮށްފައިވާ ޚަރަދުތަކެއް އަނބުރާ ހޯދުމަށްވެސް ވަނީ އަންގާފައެވެ.
ހަމައެއާއެކު، ހއ. ބާރަށު ކައުންސިލާއި އަމިއްލަ ފަރާތަކާ ދެމެދު 2015 ވަނަ އަހަރުގައި ވެފައިވާ އެއްބަސްވުމަކާއި ގުޅިގެން އަނބުރާ ލިބެން ޖެހޭ ފައިސާވެސް ހިމެނެއެވެ.
ކޮރަޕްޝަން ޢަމަލުތައް ހިންގާ ފަރާތްތަކާމެދު އިންސާފުވެރި ޝަރީޢަތެއްކޮށް, އަދަބު ދިނުމުގެ އިތުރުން ދަޢުލަތަށް ގެއްލިގެންދާ މުދަލާއި ފައިސާ އެއްވެސް ޝަރުތެއްނެތި ދައުލަތަށް އަނބުރާ ލިބެންޖެހޭކަމަށް އޭސީސީން ވަނީ ބުނެފައެވެ.
ދައުލަތަށް ގެއްލިގެންދާ ފައިސާ ހޯދުމަށް ހުރި ހުރަސްތައް ނައްތާލުމަށް ގާނޫނީ ހުރަހެއް އޮތްތޯ ބެލުމަށް ދިރާސާއެއް ހަދަމުން އަންނަ ކަމަށްވެސް އެ ކޮމިޝަނުން ދާދި ފަހުން ވަނީ ބުނެފައެވެ.
ގެއްލިގެންދާ ފައިސާ ހޯދުމަށް ގުޅުން ހުރި މުއައްސަސާތައް ގުޅިގެން މަސައްކަތް ކުރަން ޖެހޭކަން ފާހަގަކޮށް ކޮމިޝަނުގެ އައު މެމްބަރުން ވަނީ ފުލުހުންނާއި، ދައުލަތުގެ ޕްރޮސެކިއުޓަރުންނާ އެކުވެސް ބައްދަލުކުރައްވާފައެވެ. އެ ބައްދަލުވުންތަކުގެ ނަތީޖާ ރަނގަޅު ކަމަށް އޭސީސީން ބުނެއެވެ.
އައު މެމްބަރުން ކޮމިޝަނާއި ހަވާލުވެ މަސައްކަތް ފަށާފައިވަނީ މާރޗު މަހުގެ 17 ވަނަ ދުވަހުއެވެ. އޭސީސީގެ އައު މެމްބަރުންނަކީ ކޮމިޝަންގެ ރައީސް އާދަމް ޝާމިލް، ނާއިބު ރައީސް އަބްދުއްސަލާމް އާއި ތާހާ މުހައްމަދު، ޝަޒްނާ ހާޝިމް އަދި ޝިޔާމާ މުހައްމަދު އެވެ.
