މި ރޯދަމަހު ރެކޯޑު އަދަދަކަށް މުދާ ކްލިއަރކޮށްފި
ފާއިތުވި ތިން އަހަރަށްވުރެ ގިނައިން މިއަހަރު މުދާ ކްލިއަރކޮށްފައިވޭ
އެމްޕީއެލްގެ ސީއީއޯ ޝާހިދު އަލީ
މި ރަމަޟާންމަހު ރެކޯޑު އަދަދަކަށް ރާއްޖެއަށް މުދާ އެތެރެކޮށްފައިވާކަން މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ހާމަކޮށްފިއެވެ.
ރަމަޟާން މަހު އެމްޕީއެލްގެ މަސައްކަތްތައް ކުރިއަށްދާ ގޮތާ ގުޅޭގޮތުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެކުންފުނީގެ ސީއީއޯ ޝާހިދު އަލީ ވިދާޅުވީ ފާއިތުވި 3 އަހަރާ އަޅާ ބަލާއިރު މިއަހަރުގެ ރަމަޟާން މަހު ރެކޯޑު އަދަދަކަށް ރާއްޖެއަށް މުދާ އެތެރެކޮށްފައިވާކަމަށެވެ.
މިގޮތުން ކާބޯތަކެތީގެ ބާވަތްތައް ވީހާވެސް އަވަހަށް ކްލިއަރ ކުރުމަށް ޚާއްސަ އިސްކަމެއް ދީފައިވާނެ ކަމަށާއި، މިކަން ހާސިލްކުރުމަށް ޕޯޓުގެ މަސައްކަތްތަކަށްވެސް ބަދަލު ގެނެސްފައިވާކަން ޝާހިދު ފާހަގަކުރެއްވިއެވެ. އަދި އެއްވެސް ދައްޗެއް ނެތި ހުރިހާ ޝިޕްމަންޓެއް ކްލިއަރ ކުރެވިފައިވާކަމަށާއި، ގެނައި ހުރިހާ އެއްޗެއް ބާޒާރާ ހަމައަށް ފޯރުކޮށްދެވިދައިވާކަމަށް އޭނާ ވިދާޅުވިއެވެ.
ޝާހިދު ވިދާޅުވީ މިދިޔަ 3 ހަފްތާގެ ތަފާސްހިސާބުތަކަށް ބަލާއިރު ވަރަށް ރަނގަޅު މަސައްކަތްތަކެއް ކުރެވިފައި ހުރިކަން ދައްކާ ކަމަށެވެ. މިގޮތުން ކޮންޓެއިނަރު ކާގޯ ކްލިއަރ ކުރެވިފައި ހުރި ވަރު 2021 ވަނަ އަހަރަށްވުރެ މިއަހަރުގެ ރަމަޟާން މަހުގެ ފުރަތަމަ ތިން ހަފްތާ ރަނގަޅުކަމަށް ޝާހިދު ވިދާޅުވިއެވެ. 2019 ވަނަ އަހަރާ އަޅާ ބަލާއިރު ކުޑަކޮށް ދަށްވިނަމަވެސް ރަމަޟާން މަސް ނިމޭއިރު 2019 ވަނަ އަހަރު މުދާ އެތެރެކުރެވުނު މިންވަރާ ކައިރި ކުރާނެ ކަމަށް ޝާހިދު ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޕީއެލްގެ ޗީފް އޮޕަރޭޓިން އޮފިސަރ މުހައްމަދު މަސީހު ވިދާޅުވީ ފާއިތުވި 3 ހަފްތާގައި އެމްޕީއެލްގެ މަސައްކަތްތައް ކުރިއަށްދިޔައީ ވަރަށް ބާރުބޮޑުކޮށް ކަމަށެވެ. ދުވާލަކު ބޯޓެއް ކޯލްކޮށްފައި އެބަހުރި ކަމަށާއި، ކޮންޓެއިނަރަށް ބަލާއިރު ކޮންމެ ތިން ދުވަހަކުން އެއް ދުވަހު ބޯޓެއް ކޯލްކޮށްފައިވާކަމަށް މަސީހު ވިދާޅުވިއެވެ.
