މިއަހަރުގެ ފުރަތަމަ ދައުރު ނިންމައި، މަޖިލިސް ޗުއްޓީއަށް

ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ މަސައްކަތް ނިންމައި، މަޖިލިސް ޗުއްޓީއަށް ހިނގައްޖެއެވެ.

ރައްޔިތުންގެ މަޖިލީހުގެ އިދާރާއިން އާއްމުކުރި ތަފާސް ހިސާބުތަކުން ދައްކާ ގޮތުގައި، ފުރަތަމަ ދައުރު ނިމުނުއިރު ގާތްގަނޑަކަށް 50 އިންސައްތަ މަސައްކަތްވަނީ ނިމިފައެވެ. މި އަހަރުގެ ފުރަތަމަ ދައުރު ކުރިއަށްދިޔައީ ފެބްރުއަރީ 3 ވަނަ ދުވަހުން ފެށިގެން އެޕްރީލް 25ށެވެ.

މި ދައުރުގައި ރައްޔިތުންގެ މަޖިލީހަށް 36 ބިލެއް ހުށަހެޅުމަށް ސަރުކާރުން ނިންމާފައިވީ ނަމަވެސް، މި ދައުރުގައި ހުށައަޅާފައިވަނީ 28 ބިލެކެވެ. އޭގެ ތެރެއިން 8 ބިލެއްގެ މަސައްކަތް ވަނީ ނިންމާފައެވެ. ތަޅުމަށް ހުށަހެޅުނު 10 ގަރާރުގެ ތެރެއިން 2 ގަރާރުގެ މަސައްކަތްވަނީ ނިންމާފައެވެ. ސަރުކާރުން ހުށައެޅި 8 މައްސަލައެއް އެޖެންޑާކޮށް 7 މައްސަލައެއް ނިންމިއެވެ.

މި ދައުރަށް ރިޔާސަތުންވެސް 8 މައްސަލައެއް ހުށައެޅިއެވެ. ނިމިފައިވަނީ ފަސް މައްސަލައެކެވެ. މެންބަރުން ހުށައަޅުއްވާފައިވާ 10 މައްސަލައިގެތެރެއިން ނިމުނީ ހަތަރު މައްސަލައެކެވެ. އެހެނިހެން މައްސަލަތަކާގުޅޭ 6 ރިޕޯޓެއް މި ދައުރަށް ހުށައެޅި, 1 ރިޕޯޓްގެ މަސައްކަތް ވަނީ ނިންމާފައެވެ.

ވަޒީރުންނާ ސުވާލު ކުރުމަށް މެންބަރުންނަށް ލިބޭ ފުރުސަތުގެ ދަށުން 46 ސުވާލެއް ކުރުމަށް ހުށަހެޅި، 26 ސުވާލެއް ޖަވާބު މިދައުރުގައި ހޯދާފައިވެއެވެ. ނިމިދިޔަ ދައުރުގައި 12 ކުއްލި މައްސަލައެއް ހުށަހެޅިއެވެ.

މިދިޔަ ދައުރުގައި ބާއްވާފައިވަނީ 35 ޖަލްސާއެވެ. އެ ޖަލްސާތަކަށް 71 ގަޑިއިރާއި 11 މިނެޓް ހޭދަކޮށްފައިވެއެވެ. ކޮމެޓީތަކުގައި މެންބަރުން ވަނީ 134 ގަޑިއިރާއި 18 މިނެޓް ހޭދަ ކުރައްވާފައެވެ. އެއީ ޖުމްލަ 170 ކޮމެޓީ ބައްދަލުވުމުގައެވެ. މުޅި ދައުރަށް 131 މަސައްކަތެއް ހުށަހެޅިފައިވެއެވެ. އޭގެ ތެރެއިން 65 މަސައްކަތެއް ނިންމާފައިވާ ކަމަށް މަޖިލީހުގެ އިދާރާއިން ބުނެއެވެ. އަދި ޖުމްލަ މަސައްކަތް ހާސިލުކުރެވުނު މިންވަރު ހުރީ 49.6 ޕަސެންޓްގައި ކަމަށް ބުނެއެވެ.