މޫދަށް ފުންމާލީ މަޖަލަކަށް، އެކަމަކު މިހާރު އެއީ ޗެމްޕިއަނެއް!

"ޤައުމަށް ނޯޓިސްވީތާ އިމްއާންވެސް ކުރާ ހިތްވަރު. ވަރަށްބޮޑު ހިތްވަރެއް އެއީ ކުރިއަށްދާން. "މޯލްޑިވްސް ސްޕޯރޓްސް އެވޯޑްސްގެ އެންމެ މޮޅު ފިރިހެން ފެތުންތެރިޔާ އަލީ އިމްއާންއަށް އެއެވޯޑް ލިބުމުން އޭނާ ބުނި ވާހަކައެވެ. އެކަމަކު މިއީ އޭނާ މޫދަށް ފުންމާލިއިރު ދެކުނު ހުވަފެނެއް ނޫނެވެ. ކުރި އުއްމީދެއްވެސް ނޫނެވެ.

ކުޑައިރު ކޮންމެ ހުކުރު ދުވަހަކު އިމްއާން ބައްޕައާއެކު އާޓިފިޝަލް ބީޗަށް މޫދަށް ދިޔައީ މަޖަލަށެވެ. މޫދަށް އެރޭހިތުންނެވެ. މޮޅު ފެތުންތެރިއަކަށްވުމުގެ ހުވަފެނެއް ނުދެކެއެވެ. ޤައުމީ ޓީމަށް އެރުމަކީ އަމުދުން ޚިޔާލަށްވެސް އައި ކަމެއް ނޫނެވެ. އިންޓަރ ސްކޫލް ފެތުމުގެ މުބާރާތުގައި ބައިވެރިވިއިރުވެސް އެފަދަ ވިސްނުމެއް ނެތެވެ. އެކަމަކު އިންޓަރ ސްކޫލް މުބާރާތަށްފަހު 2016 ވަނަ އަހަރު ޤައުމީ ޓީމުން ޖާގަ ލިބުންވީ އޭނާގެ ވިސްނުން މުޅިން ބަދަލުކޮށްލި ކަމަކަށެވެ. 16 ވަރަކަށް އަހަރުގައި ޤައުމީ ސްކޮޑްގައި ހިމެނުމުން ވަނަ ހޯދަން ފަތަން އޭނާގެ ވިސްނުން ބަދަލުކޮށް, އަމާޒުތަކެއް ކަނޑައަޅައިގެން މަސައްކަތް ފެށިއެވެ.

ޤައުމީ ފަތާ ޓީމުން ފުރުޞަތު ލިބުމުގެ ކުރިން ފުޓްބޯޅައާއި ބާސްކެޓްބޯޅަވެސް ކުޅުނު އިމްއާން ހަމައެކަނި ފެތުމަށް ހުސްވީ ޤައުމީ ޓީމުގް ދޮރުން އެތެރެވުމުންނެވެ. އޭގެ ފަހުން އޭނާގެ ހަމައެކަނި ކުޅިވަރަކީ ފެތުމެވެ. މިހާރު އޭނާ ފަތަނީ ވަނަ ހޯދާށެވެ. ޗެމްޕިއަނަކަށް ވުމަށެވެ. އެހެން ކުޅިވަރެއް ކުޅުމުގެ ވިސްނުމެއްވެސް ނެތެވެ.

މިހާރު 19 އަހަރުގެ ފެތުންތެރިޔާ ހުޅުމާލޭގައި ޤާއިމްކޮށްފައިވާ ޕޫލްގައި ދުވާލަކު ފަސް ގަޑިއެއްހާއިރު ހޭދަކުރެއެވެ. ދެ އިރު ޕްރެކްޓިސް ކުރެއެވެ. އެއީ ސްވިމިންއިން މެޑެއްޔެއް ހޯދައިދޭން ކުރާ މަސައްކަތެވެ. ރާއްޖެއަށް ސްވިމިންއިން މެޑެއްޔެއް ގެނައުމަކީ އޭނާގެ މިހާރުގެ އެންމެ ބޮޑު އަޒުމެވެ. އެކަން ކުރަން ފަހިވި އެންމެ ބޮޑު ފުރުޞަތަކީ ޕޫލްގައި ޕްރެކްޓިސް ކުރަން ފަހިވި ފުރުޞަތެވެ. ކުރިން ޓްރެކްގައި ފަތަމުން އައި 25 މީޓަރުގެ ޕޫލެއްގައި ފަތަން ލިބުމަކީ ކާމިޔާބީއަށްދާން ފަހިވި ވަރަށް ބޮޑު ފުރުޞަތެއްކަމަށް އިމްއާން ޤަބޫލުކުރެއެވެ.

ޕޫލްއާއެކު ދެން އިމްއާން ފާހަގަކުރީ ރާއްޖޭގެ ފެތުންތެރިންގެ މެދުގައި މިހާރު އޮތް ވާދަވެރިކަމެވެ. ކޮންމެ އިވެންޓެއްގައި, ކޮންމެ އުމުރު ފުރާއެއްގައިވެސް ބޮޑު ވާދަވެރިކަމެއް އޮތުމަކީ ވަރަށް ބޮޑު ކުރިއެރުމެއްކަން އިމްއާން ފާހަގަކުރިއެވެ. އޭނާ ބުނީ މިހާރު ކޮންމެ ފެތުންތެރިއަކަށްވެސް ވަނަ ހޯދޭނީ "އެންމެ ބެސްޓް" ދީގެންކަމަށެވެ.

އިމްއާން ވަނީ ޒުވާން އުމުރުގައި ރާއްޖެއިން ބޭރުންވެސް ތަމްރީނު ހޯދާފައެވެ. ސްކޮލާރޝިޕްގައި ބޭރުގައި ހޭދަކުރި މުއްދަތުގައި 50 މީޓަރު ޕޫލްގައި ތަމްރީނު ހޯދަން ލިބުނު ފުރުޞަތަކީވެސް އޭނާގެ ކުރިއެރުންތަކުގެ ވަރަށް ބޮޑު ސަބަބެކެވެ. އެކުރިއެރުންތައް ދަމަހައްޓަން, އަދި އިތުރު ކުރިއެރުން ހޯދަން އޭނާ ހުރީ އަޒުމް ކަނޑައަޅައިގެންނެވެ. އެހުރިހާ ކަމެއް ގޮސް ގުޅެނީ ބައިނަލްއަޤްވާމީ މެޑެއްޔެއް ކަރުގައި އަޅުވާލުމާ ހަމައަށެވެ. އަދި އެންމެ 19 އަހަރެވެ. އެހެންވީމާ އިމްއާނަށް އެކާމިޔާބީ ރާއްޖެއަށް ހޯދައިދެވިދާނެއެވެ.