ދުނިޔޭގައި ދިރިހުރި އެންމެ އުމުރު ދިގު މީހާ ކަމަށްވާ ޖަޕާނުގެ ކާނޭ ތަނާކާ ވަނީ އެޕްރިލް 19 ވަނަ ދުވަހު މަރުވެފައެވެ. އޭނާ މަރުވެފައިވަނީ މި ރިކޯޑް ހާސިލްވިތާ ނުވަ ދުވަސް ފަހުންނެވެ. ތަނާކާއަކީ ދުނިޔޭގައި މިހާތަނަށް ހުރި ދެވަނައަށް އެންމެ އުމުރު ދިގު މީހާވެސް މެއެވެ.

ޖަޕާނުގެ ފުކުއޯކާ ޕްރީފެކްޗަރަށް ނިސްބަތްވާ ތަނާކާ ދުނިޔޭގެ އަލިކަން ދެކެފައިވަނީ 1903 ވަނަ އަހަރުގެ ޖެނުއަރީ މަހުގެ ދެވަނަ ދުވަހުއެވެ. އެއީ ދުނިޔޭގައި ފުރަތަމަ މަތިންދާ ބޯޓު އުފެއްދި އެމެރިކާގެ ރައިޓް ބްރަދާސް އެކަން ކުރުމުގެވެސް އަހަރެއްހާދުވަސް ކުރިއެވެ. ކާނޭ ތަނާކާ އެޕްރިލް 19 ވަނަ ދުވަހު މަރުވިއިރު އުމުރަކީ 119 އަހަރާ 107 ދުވަހެވެ.

އޭނާގެ ދިގު އުމުރުގެ ސިއްރަކީ ކޮބާތޯ އެހުމުން އޭނާ ބުނެފައިވަނީ ބޮޑު އާއިލާއެއް އޮވެ އާއިލާގެ އެހީތެރިކަން ލިބެމުން ދިއުމާއި، ރަގަޅަށް ނިދުމާއި، އަބަދުވެސް ޕޮޒިޓީވް އަދި އުންމީދީ ވިސްނުމެއް ގެންގުޅުމާއި، ރަނގަޅު ކާނާ ބޭނުން ކުރުމާއި އަދި ސިކުޑީގެ ކަސްރަތެއްގެ ގޮތުން ހިސާބުގެ އެކި ޕަޒްލްތައް ހެދުމަށް ލޯބި ކުރާތީ އެކަން އޭނާގެ އުމުރު ދިގުވުމަށް އެހީތެރި ވެދިން ކަމުގައެވެ. މީގެ އިތުރުން ކާނޭ ތަނާކާ އަކީ ފަތިހު ތެދުވުމަށް ލޯބި ކުރި މީހެކެވެ. މިގޮތުން އެންމެ ލަސްވެގެންވެސް ހައެއްޖަހާއިރު އޭނާ ތެދުވެ ދުވަހުގެ މަސައްކަތް ފަށާކަމަށް ވެއެވެ.

ކާނޭ ތަނާކާ މަރުވިކަން އިއުލާން ކޮށްފައިވަނީ ފުކުއޯކާގެ އޮފިޝަލެކެވެ. އޭނާ މަރުވީ ހޮސްޕިޓަލްގައި ކަމަށާއި މަރުވީ މުސްކުޅިވުމުގެ ސަބަބުން ކަމަށް އިއުލާނުކޮށްފައިވެއެވެ. ކާނޭ ތަނާކާ ގެންގުޅެމުން އައީ ނަރސިންގ ހޯމް އެއްގައެވެ. އެނާއަށް ވަނީ ދެ ޕެންޑަމިކް އަދި ބޮޑު ދެހަގުރާމަ ފެނިފައެވެ. އޭނާގެ ސިއްހަތު އާންމު ގޮތެއްގައި ރަނގަޅެވެ. އަދި ބޯޑް ގޭމްސްފަދަ ކުޅިވަރުތައް ކުޅެ ހިސާބުގެ އެކި މަސައްކަތްކޮށް އަދި ސޯޑާ އާއި ޗޮކްލެޓްފަދަ އެއްޗެތި ބޭނުންކުރުމަށް ލޯބި ކުރިއެވެ.

ގިނިސް ބުކް އޮފް ވަރލްޑް ރިކޯޑްސްގައި ދުނިޔޭގައި ހުރި އެންމެ އުމުރުދިގު މީހާގެ ގޮތުގައި އޭނާގެ ނަން ރިކޯޑް ކުރީ 2019 ވަނަ އަހަރުއެވެ. އޭނާގެ ހަޔާތުން އެންމެ އުފާވެރި ދުވަސްވަރަކީ ކޮބާތޯ ސުވާލު ކުރުން އޭނާ ބުނެފައިވަނީ "މިހާރު" ކަމަށެވެ.

ދެވަނަޔަށް އެންމެ އުމުރު ދިގު މީހާގެ ރިކޯޑް ކުރިން އޮތީ އެމެރިކާގެ ރައްޔިތެއްކަމަށްވާ ސާރާ އަށެވެ. އެއީ 119 އަހަރާ 97 ދުވަހެވެ. މިރިކޯޑް ފަސްދީ ތަނާކާ ދިޔައީ އެޕްރިލް ދިހަވަނަ ދުވަހުއެވެ.

ދުނިޔޭގައި މިހާތަނަށް ހުރި އެންމެ އުމުރު ދިގު މީހާއަކީ ފްރާންސްގެ ރައްޔިތެއް ކަމަށްވާ ޖާން ކަލްމެންޓް އެވެ. އެއީ 122 އަހަރާ 164 ދުވަހެވެ.

މިވަގުތު ދިރިހުރި އެންމެ އުމުރުން ދުވަސްވީ މީހަކީ ފްރާންސްގެ ރައްޔިތެއް ކަމަށްވާ ލުސީލް ރެންދަން އެވެ. އޭނާގެ އުމުރަކީ 118 އަހަރެވެ.