ރައީސްގެ ޤަރާރަށް ސިޔާސީ ޕާޓީތަކުންވެސް ބޯލަނބަން ޖެހޭ: ފުއާދު ތައުފީޤު

ސިޔާސީ ބޭނުމެއްގައި ވަކި ޤައުމަކާއި ދެކޮޅަށް ރާވައިގެން ހިންގާ ކެމްޕޭނުތަކަކީ ޤައުމީ ސަލާމަތާ ގުޅުންހުރި ކަމެއްކަމަކަށްވާތީ އެފަދަ ހަރަކާތްތައް ހުއްޓުވުމަށް ކަނޑައަޅައި، ތަންފީޛުކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނެރުއްވާފައިވާ ޤަރާރަށް ސިޔާސީ ޕާޓީތަކުންވެސް ބޯލަނބަން ޖެހޭކަމަށް އިލެކްޝަންސް ކޮމިޝަނުގެ ރައީސް ފުއާދު ތައުފީޤު ވިދާޅުވެއްޖެއެވެ.

އިންޑިޔާއާ މެދު ނަފުރަތު އުފެއްދުމަށް ހިންގާ ހަރަކާތަކީ ޤައުމީ ސަލާމަތަށް ހުރި ނުރައްކަލެއް ކަމުގައި، ޤައުމީ ސަލާމަތާބެހޭ މަޖިލީހުގެ މިއަހަރުގެ 3 ވަނަ ބައްދަލުވުމުގައި ކަނޑައަޅާފައިވާކަން ބަޔާން ކުރައްވައި، ރައީސް އެ ޤަރާރު ނެރުއްވާފައިވަނީ 21 އޭޕްރީލް 2022 ގައެވެ.

ރައީސް އެގޮތަށް ޤަރާރު ނެރުއްވުމާއެކު އިދިކޮޅު ޕްރޮގްރެސިވް ކޯލިޝަނުން ގެންދަނީ އިންޑިޔާ އައުޓް ލިޔުމުގައި އަކުރުތައް ބަދަލުކޮށްގެން އަނެއްކާވެސް ގޭއްގޭގައި ބެނަރތައް ހަރުކުރަމުންނެވެ. އެ ބެނަރތައްވެސް ފުލުހުން ގެންދަނީ ނަގަމުންނެވެ. ނަމަވެސް އެ ޙަރަކާތް ނުހުއްޓުވޭނެކަމަށް ބުނެ ޕީޕީއެމްއިން ވަނީ ޓްވީޓުކޮށްފައެވެ.

އެކަމާ ގުޅޭގޮތުން ރާއްޖެއެމްވީން ކުރި ސުވާލަކަށް ޖަވާބުދެއްވަމުން، އީސީގެ ރައީސް ފުއާދު ތައުފީޤު ވިދާޅުވީ، އެ މައްސަލައާ ގުޅޭގޮތުން އީސީން ވަކި ގޮތެއް ނިންމަވާނީ ކޮމިޝަނުގެ މެމްބަރުންގެ މެދުގައި މަޝްވަރާ ކުރެއްވުމަށްފަހު ކަމަށެވެ. ނަމަވެސް އީސީގެ ރައީސްގެ ޙައިސިއްޔަތުން އޭނާގެ އަމިއްލަފުޅު ވިސްނުމަކީ، ރައީސް ޤަރާރެއް ނެރުއްވާފައިވާނަމަ ސިޔާސީ ޕާޓީތަކުންވެސް އެ ޤަރާރަކަށް ބޯލަނބަން ޖެހޭނެ ކަމަށެވެ.

ފުއާދު ވިދާޅުވީ، އެ ޤަރާރާމެދު ޝަރުއީ ކޯޓަކުން އެހެން ގޮތަކަށް ޙުކުމެއް ނުނެރޭހާ ހިނދަކު، އެ ޤަރާރަށް ބޯލަނބަން ޖެހޭނެކަމަށް އޭނާ ދެކިވަޑަައިގަންނަވާ ކަމަށެވެ.

ފުއާދު އެހެން ވިދާޅުވެފައިވާއިރު، ޚިޔާލު ފާޅުކުރުމަކީ އަސާސީ ޙައްޤެއް ކަމަށާއި، އަސާސީ ޙައްޤެއް ހަނިކުރެވޭނީ ރައްޔިތުންގެ މަޖިލީހުން ފާސްކުރާ ޤާނޫނަކުން ކަމަށް ބަޔާންކޮށް، އިދިކޮޅު ފަރާތްތަކުން ގެންދަނީ އެ ޤަރާރު ސައްޙަ ނޫންކަމަށް ބުނަމުންނެވެ.

ރައީސްގެ ޤަރާރުގައި ބަޔާން ކޮށްފައިވަނީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ޤައުމަކާއި ދެކޮޅަށް ރާވައިގެން ހިންގާ ކެމްޕޭނުތަކަކީ ޤައުމީ ސަލާމަތާ ގުޅުންހުރި، އަދި ނުރައްކާ އޮތް ކަމެއްކަމަށާއި، ވަކިވަކި ޤައުމުތަކާއި ދެކޮޅަށް ނަފުރަތު އުފެއްދުމަށް ހިންގޭ މިފަދަ ހަރަކާތްތަކަކީ ޤާނޫނު ތަންފީޛުކުރާ އިދާރާތަކުން ހުއްޓުވަން ޖެހޭނެ ހަރަކާތްތަކެއް ކަމުގައި ކަނޑައެޅުމަށް މަޖިލީހުން ނިންމައިފައިވާ ކަމަށެވެ.

ވުމާއެކު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާގެ (ނ) އާއި، (ރ) އާއި (މ) އިން ރައީސުލްޖުމްހޫރިއްޔާއާ މަތިކޮށްފައިވާ ބާރުތަކާއި މަސްއޫލިއްޔަތުތަކުގެ ދަށުން، މި ފަދަ ހަރަކާތްތައް ހުއްޓުވުމަށް ކަނޑައަޅައި، މިކަން މިގޮތުގެ މަތީން ތަންފީޛުކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ޤަރާރު އެކަށައެޅުއްވީކަން ވަނީ ބަޔާން ކުރައްވާފައެވެ.