"މިންތީގެ ހަމަހަމަކަމަށް ލީޑަރޝިޕުން އިސްކަންދޭތީ، ސިފައިންގޭގަ އަންހެނުންގެ ބައިވެރިވުން ދަނީ އިތުރުވަމުން"

މިހާރުގެ ލީޑަރޝިޕުން މިންތީގެ ހަމަހަމަކަމަށް ދޭ އިސްކަމެއްގެ ސަބަބުން، ސިފައިންގެ މުއައްސަސާގައި އަންހެނުންގެ ބައިވެރިވުން އިތުރުވަމުންދާކަމަށް އެމްއެންޑީއެފުން ބުނެފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން ލެފްޓިނެންޓް ކާނަލް ޑރ. ފާތިމަތު ތަހުސީނާ އިބްރާހީމް ވިދާޅުވީ، މީގެ 33 އަހަރުކުރިން އަންހެން ސިފައިން މި ދާއިރާގައި ހަރަކާތްތެރިވާން ފެށީއްސުރެ، ހަވާލުކުރި ކޮންމެ ޒިންމާއެއްވެސް ފުރިހަމައަށް އަދާކުރަމުންދާކަމަށެވެ.

އެއީ ކޮންމެ ބާވަތެއްގެ ވަޒީފާއެއް ނަމަވެސް، އެންމެ ފުރިހަމައަށް ޒިންމާތައް އަދާ ކުރުމުގައި އަންހެން ސިފައިންވެސް ދެމިތިބޭކަން އޭނާ ފާހަގަކުރެއްވިއެވެ.

ތަހުސީނާ އިތުރަށް ވިދާޅުވީ، ޒަމާނާއި މުޖުތަމައަށް އަންނަ ބަދަލާއެކު އަދި މިހާރުގެ ލީޑަރޝިޕުން މިންތީގެ ހަމަހަމަކަމަށް ދެއްވާ އިސްކަމެއްގެ ސަބަބުން، މިހާރު ސިފައިންގެ މުއައްސަސާގައި އަންހެނުންގެ ބައިވެރިވުން ނެތް ދިމާލެއް ނެތްކަމަށެވެ.

އެގޮތުން ފަންނީ ދާއިރާއާއި، އަސްކަރީ ދާއިރާއާއި، ކޮމާންޑް ޕޯސްޓުތަކާއި، ދިރާސާ ކޮމިޓީތަކުގެ އިތުރުން، ލަފާދޭ ކޮމިޓީތަކާއި، އެންމެ މަތީ ލަފާދޭ މަޖިލީހުގައިވެސް އަންހެން ސިފައިންގެ ބައިވެރިވުން ހިމެނޭކަން އޭނާ ފާހަގަ ކުރެއްވިއެވެ.

އޭނާ އިތުރަށް ވިދާޅުވީ، މި ދާއިރާއަކީ އަންހެނުންނަށް ފުރުސަތު ގިނަ ދާއިރާއެއް ކަމަށެވެ. ވަކިން ޚާއްސަކޮށް، ބޭރުގެ އަސްކަރިއްޔާއާއި ގުޅުން ބަދަހިކުރުމަށް ކުރާ މަސައްކަތުގެ ދަށުންވެސް، ގިނަ ތަމްރީނު ފުރުސަތުތަކެއް ފަހިވަމުންދާކަން އޭނާ ފާހަގަކުރެއްވިއެވެ.

އޭނާ ވިދާޅުވިގޮތުގައި, އޭގެ ތެރެއިން ބައެއް ކޯސްތަކަކީ ސީދާ އަންހެން ކެނޑިޑޭޓުންގެ ނަން ހުށައެޅުމަށް ފުރުސަތު ހުޅުވާލާ ކޯސްތަކެއްކަމަށެވެ.