ޕީއެސްޖީގެ އޯނަރާއި ބައްދަލުކުރުމަށް އެޓީމަށް ކުޅެމުން އަންނަ ޒުވާން ތަރި ކީލިއަން އެމްބާޕޭގެ މަންމަ ފައިޒާ ލަމާރީ ގަތަރަށް ގޮސްފިއެވެ.
ޕީއެސްޖީއާއެކު އެމްބާޕޭގެ މަންމަ ބައްދަލުކުރުމަށްފަހު މިއަންނަ ހަފްތާގައި ރެއާލް މެޑްރިޑާއި ބައްދަލުކުރާނެއެވެ. ރިޕޯޓް ތައް ބުނާ ގޮތުން އެމްބާޕޭ އަދިވެސް ބޮޑަށް ބޭނުންވަނީ ރެއާލް މެޑްރިޑަށް ބަދަލުވާށެވެ. ނަމަވެސް ގޮތް ނިންމާނީ ދެކްލަބާއި މަޝްވަރާ ކުރުމަށްފަހުއެވެ.
ޕީއެސްޖީން ވަނީ އެމްބާޕޭއަށް ބްލޭންކް ޗެކެއްވެސް ދީފައެވެ. ނަމަވެސް މިވަގުތު އޭނާއަށް މުހިންމީ ފައިސާ ނޫންކަމުން އެމްބާޕޭ އެހުށަހެޅުމަށް ދެކޮޅުހެދީއެވެ. ރިޕޯޓުތައް ބުނާ ގޮތުން އޭނާ ބަދަލުވާނީ އެންމެ ރަނގަޅު ސްޕޯޓިންގ ޕްރޮޖެކްޓެއް ހުށަހަޅާ ކްލަބަކަށެވެ.
ކުރިއަށް އޮތް ސަމަރ ޓްރާންސްފަރ މާކެޓަށް ވާއިރަށް ޕީއެސްޖީއާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު ހަމަވާނެއެވެ. އޭރުން ފްރީ ޓްރާންސްފާއެއްގައި އޭނާ ބޭނުން ކްލަބަކަށް ދިއުމުގެ ފުރުސަތު އޮންނާނެއެވެ. މިދިޔަ ޓްރާންސްފާ މާކެޓުގައިވެސް އެމްބާޕޭ ހޯދުމަށް ރެއާލްއިން ތިންފަހަރުގެ މަތިން ޕީއެސްޖީއަށް ހުށަހެޅިއެވެ. ނަމަވެސް ޕީއެސްޖީން އެމްބާޕޭ ދޫނުކުރީއެވެ. މިހާރުވެސް އެކްލަބުން މަސައްކަތް ކުރަމުން އަންނަނީ ކޮންޓްރެކްޓް އައުކޮށް ޓީމުގައި އެމްބާޕޭ ބެހެއްޓުމަށެވެ.
