އަނެއްކާވެސް އަދުރޭގެ ހަޑިހުތުރު އެއްޗެހި ގޮވުމުގެ މައްސަލައެއް، މިފަހަރު ރޯދަމަހު ދުވާލު
ހަޑިހުތުރު އެއްޗެހި ގޮވުމުގެ މައްސަލައެއްގައި ކުރިންވެސް އަދުރޭއަށް ދައުވާކުރި
އަދުރޭ ހަޑިހުތުރު ބަސް ބޭނުން ކުރެއްވި މައްސަލައެއް މީގެ ކުރިންވެސް ފުލުހުން ތަހުގީގުކުރި
އިދިކޮޅު ޕީޕަލްސް ނެޝަނަލް ކޮންގްރެސް (ޕީއެންސީ)ގެ ރައީސް އަބްދުލްރަހީމް އަބްދުﷲ ހަޑިހުތުރު ބަސް ބޭނުންކުރެއްވި މައްސަލައެއް ފެންމަތިވުމާއެކު، އާންމުންގެ އެތައް ބަޔަކު އަދުރޭއަށް ފާޑުކިޔައިފިއެވެ.
އަދުރޭ ހަޑިހުތުރު ބަސް ބޭނުންކުރައްވާފައިވަނީ އިދިކޮޅުން ހިންގާ އިންޑިއާ އައުޓް ކެމްޕޭންގެ ދަށުން ޕީޕީއެމް އޮފީހާއި, އިދިކޮޅު ލީޑަރު އަބްދުﷲ ޔާމީންގެ ގެކޮޅުގައި ހަރުކޮށްފައިވާ ބެނަރތައް ނެގުމަށް ފުލުހުން ހަރަކާތެރިވި ވަގުތުއެވެ. އެވަގުތު އެތަނުގައި ތިބި ފުލުހުންނާ ދެއްކެވި ވާހަކައިގައި، އަދުރޭ ވަނީ ރައީސް އިބްރާހީމް މުހައްމަދު ސޯލިހުގެ ތައިރޮއިޑް ފަރުވާއާ ގުޅޭގޮތުން ހަޑިހުތުރު ބަހުން ވާހަކަދައްކަވާފައެވެ.
މީގެ ކުރިންވެސް އަދުރޭގެ މިފަދަ މައްސަލަތަކެއް ފެންމަތިވެފައިވާއިރު، އޭގެ ތެރެއިން އެއް މައްސަލައިގައި އޭނާގެ މައްޗަށް ދައުވާވެސް އުފުލާފައިވެއެވެ. އެއީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ހުކުމްކުރުމަށް ކްރިމިނަލް ކޯޓުގައި 28 ނޮވެމްބަރު 2019 ވަނަ ދުވަހު ބޭއްވި ޝަރީއަތް ކުރިއަށްދަނިކޮށް، ކްރިމިނަލް ކޯޓު ސަރަހައްދުގައި ހިނގަމުންދިޔަ މުޒާހަރާގައި ހުންނަވައިގެން، ފަނޑިޔާރުންނަށް ނިސްބަތް ކުރައްވައި ހަޑިހުތުރު ބަސް ބޭނުން ކުރެއްވުމުގެ މައްސަލައެކެވެ.
ދައުވާގައި ބުނެފައިވަނީ، ރައީސް ޔާމީންގެ މައްސަލަ ކްރިމިނަލް ކޯޓުގައި ބެލި 5 ފަނޑިޔާރުންނަށް ނިސްބަތްވާގޮތަށް ހަޑިހުތުރުބަސް ބޭނުންކުރައްވައި، އެބޭފުޅުންގެ ވެރިކަމެއްގައި އެ 5 ފަނޑިޔާރުން ޖަލަށްލާނެކަމަށް އަބްދުއްރަހީމް ވިދާޅުވެފައިވާކަމަށެވެ.
ކްރިމިނަލް ކޯޓުގެ ސަރަހައްދުގައި ހުންނަވައިގެން ބޭއަދަބީ ބަސްތައް ބޭނުންކުރި މި މައްސަލަ ފުލުހުންނަށް ހުށައެޅީ ޑީޖޭއޭގެ ފަރާތުންނެވެ.
އެ މައްސަލަ ކޯޓުން ބޭރުކޮށްލާފައިވާއިރު، އަދުރޭ ރައްޔިތުންގެ މަޖިލީހުގައި އުޅުއްވިއިރުވެސް، އަވަގުރާނަ ގޮވުމުގެ އެތައް މައްސަލައެއް ފެންމަތިވެފައިވެއެވެ.
އޭގެ އިތުރުން، ކުރީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނެރުއްވި "ދެ ރަދުން" ފޮތާ ގުޅުވައިގެން މީޑިއާތަކުގެ ކުރިމަތީގައި ހަޑިހުތުރު އެއްޗެހި ގޮވުމުގެ މައްސަަލައެއްގައިވެސް ގިނަ ބައެއްގެ ފާޑުކިއުން އަމާޒުވެފައިވެއެވެ.
