ވިލިމާލެ ޑަބްލިޔުޑީސީ ބައި އިލެކްޝަން އޮންނާނީ މޭ 14 ގައި

މޭ 16 ވާ ހޯމަ ދުވަހު ބޭއްވުމަށް ހަމަޖެހިފައިވާ ވިލިމާލެ ދާއިރާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރު ހޮވުމަށް ބާއްވާ ބައި އިލެކްޝަން މެއި މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.

އީސީން ބުނީ މޭ 16 ވާ ހޯމަ ދުވަހަކީ ރަސްމީ ދުވަހަކަށް ވުމުން ގިނަ އަދަދެއްގެ ރައްޔިތުންނަށް ވޯޓުލާން ދިޔުމަށް ދަތިތަކެއް ދިމާވެދާނެކަމަށް ކޮމިޝަނަށް ފެންނާތީއާއި ވޯޓުލާ މަރުކަޒުތައް ގާއިމްކުރުމަށް ބޭނުންވާ ތަން ލިބުމުގައި ދަތިތަކެއް ދިމާވެފައިވާތީ، ވިލިމާލެ ދާއިރާގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރު ހޮވުމަށް ބާއްވާ ބައި-އިލެކްޝަންގެ ވޯޓުނެގުމަށް ހަމަޖެހިފައިވާ ތާރީޚާއި ގަޑި މޭ 14 ވާ ހޮނިހިރު ދުވަހުގެ ހެނދުނު 8:00 އިން ހަވީރު 4:00 އަށް ބަދަލުކޮށްފައިވާކަމަށެވެ.

މި އިންތިޚާބު ބޭއްވުމަށް އެންމެ ކުރިން ހަމަޖެހިފައި އޮތީ 14 މޭ ގައެވެ. ނަމަވެސް، އެ ދުވަހު ސިޔާސީ ޕާޓީއެއްގެ އެތެރޭގެ ބޮޑު އިންތިޚާބެއް ބާއްވަން ނިންމާފައިވާތީ، އިންތިޚާބު ބާއްވައިފިނަމަ އިދާރީގޮތުން ދަތިތަކެއް ކުރިމަތި ވެދާނެކަމަށް ކޮމިޝަނަށް ފެންނާތީ ފަހުން މޭ 16ށް އިންތިޚާބު ފަސްކުރީއެވެ. މޭ 14 ވަނަ ދުވަހު އޮންނަނީ ވެރިކަން ކުރާ މައި ޕާޓީ އެމްޑީޕީގެ ޗެއާޕަރސަން ހޮވުމަށް ބާއްވާ އިންތިޚާބެވެ.

ބައި އިލެކްޝަންގައި ވާދަކުރަނީ ޕީޕީއެމް އާއި އެމްއެންޕީގެ ދެކެންޑިޑޭޓުންނެވެ. ކެންޑިޑޭޓް ނަންބަރު އެކެއް ލިބިފައިވަނީ ޕީޕީއެމް ކެންޑިޑޭޓް ފާތިމަތު ނާޒިމް އަށެވެ. ކެންޑިޑޭޓް ނަންބަރު ދޭއް ލިބިފައިވަނީ އެމްއެންޕީގެ ކެންޑިޑޭޓް އާމިނަތު ޝީޒާއަށެވެ. އެމްޑީޕީއިން ފޯމު ހުށަހަޅާފައިވަނީ ސުންގަޑި ހަމަވިފަހުންނެވެ.

އެގޮނޑި ހުސްވެފައިވަނީ ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި ކޮމިޓީގެ މެމްބަރު، އައިމިނަތު އީމާން ނިޔާވުމާއި ގުޅިގެންނެވެ.