ޓޫރިޒަމާ ބެހޭ ގާނޫނަށް އިސްލާހު ގެނައުމުގެ ބިލު އިގްތިސާދީ ކޮމިޓީއަށް

ޓޫރިޒަމާ ބެހޭ ގާނޫނަށް އިސްލާހު ގެނައުމުގެ ބިލު އިގްތިސާދީ ކޮމިޓީއަށް ފޮނުވައިފިއެވެ.

ސަރުކާރުގެ ފަރާތުން ބިލު ހުށައެޅުއްވީ، ހިތަދޫ މެދު ދާއިރާގެ މެމްބަރު އަހުމަދު ރަޝީދުއެވެ.

މި އިސްލާހު ތަކުގެތެރޭގައި މީހުން ދިރިއުޅޭ ރަށްތަކުން ކުއްޔަށް ދޫކޮށްފައިވާ ބިންތަކުގެ ހައްގުތައް ބަދަލުކުރުމުގައި ހުއްދަ ދެވޭ ފަރާތަކީ ކައުންސިލްތައް ކަމުގައި ހިމަނާފައިވެއެވެ. މިއި ކައުންސިލްތަަކަށް ލާމަރުކަޒީ ގާނޫނުގެ ދަށުން ލިބިދޭ ބާރު ފުރިހަމަ ގޮތުގައި ބޭނުން ކުރުމަށް ގެނެވޭ އިސްލާހެއް ކަމަށް މެމްބަރުންވަނީ ވިދާޅުވެފައެވެ.

މީހުން ދިރިއުޅޭ ރަށްރަށުގައި ޓޫރިޒަމްގެ ބޭނުމަށް ތަރައްގީކުރާ ތަަންތަން ފިޔަވައި ޓޫރިޒަމްގެ ބޭނުމަށް ތަރައްގީ ކުރެވޭ ތަންތަނާއި ސަރަަހއްދުތައް ކަނޑައަޅާނީ ރައީސުލްޖުމްހޫރިއްޔާކަމަށް ބިލުގައި ބުނެފައިވެއެވެ.

މިނިމަމް ވޭޖް ތައާރަފް ކުރުމުން ރިސޯޓުތަކަށް މާލީ ގޮތުން ކުރާ އަސަރު ކުޑަކުރުމުގެ ގޮތުން ބިމު ކުއްޔަށް ބަދަލު ގެނައުމާ ގުލޭ އުސޫލުތައްވެސް އިސްލާހުގައި ބަޔާންކޮށްފައިވެއެވެ. މިކަމާ ގުޅޭގޮތުން މެމްބަރުން ވިދާޅުވީ، އެތައް މިލިއަން ޑޮލަރެއްގެ އާމްދަނީއެއް ލިބޭ ރިސޯޓުތަކުން މިނިމަމް ވޭޖު ދޭން ލާޒިމުވާތީ، ރިސޯޓުތަކަށް ސަބްސިޑީއެއް ދިނުމަކީ ދެކޮޅުޖެހޭ ކަމެއް ނޫން ކަމަށެވެ. މިކަމާ ގުޅޭގޮތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، ބިލާ މިނިމަމް ވޭޖާ ގުޅުމެއް ނެތް ކަމަށެވެ.

މި ބިލުގެ ބޭނުމަކީ ފަތުރުވެރިކަމުގެ ސިނާއަތަށް ޒަމާނާއެކު އަންނަ ބަދަލުތައް ގާނޫނީ ހަމަތަކަށް ފެއްތުމެވެ.