ފަންނީ އުފެއްދުންތައް ގިންތި ކުރުމަށް ހުށައެޅުން: މެމްބަރުންނާއި ކަމާއި ގުޅުންހުރި އިދާރާތަކުގެ މެދުގައި ޚިޔާލު ތަފާތު
އާންމު ކުރުމުގެ 10 ދުވަސް ކުރިން ބިއުރޯއަށް ހުށައެޅުމަށް ވަނީ އިސްލާހު ގެނެސްފައި
ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީއިން، މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖް އަދި އެޓާރނީ ޖެނެރަލްގެ އޮފީހުގެ ބޭފުޅުންނާއި ބައްދަލުކުރެއްވުން
ފަންނީ އުފެއްދުންތައް ގިންތި ކުރުމުގެ ބިލަށް ކޮމިޓީން ހުށައެޅި އިސްލާހާއި ގުޅޭ ގޮތުން އެޓާރނީ ޖެނެރަލްގެ އޮފީހާއި، ހެރިޓޭޖް މިނިސްޓްރީއާއެކު ގައުމީ ތަރައްގީއާއި ތަރިކައިގެ ކޮމިޓީން ބައްދަލުކޮށްފިއެވެ.
ބުދަ ދުވަހު ކުރިއަށްގެންދިޔަ މި ބައްދަލުވުމުގައި ހެރިޓޭޖް މިނިސްޓަރު ޔުމްނާ މައުމޫން ވިދާޅުވީ، ކޮންމެ ޤައުމެއްގައިވެސް ކްލެސިފިކޭޝަނަށް ޚާއްސަ ބޯޑެއް ނުވަތަ އިދާރާއެއް އޮންނަ ކަމަށެވެ. އެހެންކަމުން ރާއްޖޭގައިވެސް ގިންތި ކުރުމަށް ޚާއްސަ ބިއުރޯއިން ފަަންނީ އުފެއްދުންތައް ގިންތި ކުރުމަށް އަލުން ބިލަށް އިސްލާހު ގެންނަން ޖެހޭ ކަމަށް ޔުމްނާ ވިދާޅުވިއެވެ.
ކްލެސިފިކޭޝަންގެ ބޭނުމަކީ މުޖުތަމައުގެ އަޚްލާގީ މިންގަޑު ހިފެހެއްޓުން ކަމުގައި އޭޖީ އޮފީހުން ބުނެއެވެ. އަދި މިހާރު އޮތް ގޮތުން، އުފައްދާ ފަރާތަށް ކްލެސިފިކޭޝަން ޙައްޤުތައް ދޫކޮށްލުމުން ޤާނޫނުގެ މަޤްސަދު ހާސިލު ނުވާކަމަށާއި، އެ ޙައްޤު އޮންނަން ވާނީ ސަރުކާރުގެ އަތުގައި ކަމަށްވެސް އޭޖީ އޮފީހުން ބުނެއެވެ.
އޭޖީ އޮފީހުގެ ފަރާތުން މިކޮމިޓީގައި ވާހަކަފުޅުދައްކަވަމުން އެއޮފީހުގެ ކައުންސެލް ޖެނެރަލް އައިޝާ ނައީމް ވިދާޅުވީ، ކުރިން ކްލެސިފައި ކުރުމަށް ހުށައަޅާ އެކަން ކުރުމާއި، މުޖުތަމައުގެ މަސްލަހަތު ހިމާޔަތް ކުރުން އެއީ ދައުލަތުގެ ޒިންމާއެއް ކަމަށެވެ. އެހެންކަމުން ކުރިން ބިލު ފަރުމާކޮށްފައި އޮތް ގޮތަށް ބޭވުމަށް އޭޖީ އޮފީހުންވަނީ ކޮމިޓީގައި އެދިފައެވެ. ފަންނީ އުފެއްދުން އުފައްދާ ފަރާތަށް ގިންތި ކުރުމުގެ ބާރު ދީފިނަމަ، ވިޔަފާރި ކުރިއެރުވުމަށް އަމިއްލަ މަސްލަހަތު އިސްކުރުމާއި، ފަހުން އިޔާދަނުކުރެވޭނެ ފަދަ ގެއްލުންތަކެއް ކުޑަކުދިންނަށް ލިބިގެން ހިނގައިދާނެ ކަމަށް އައިޝާ ވިދާޅުވިއެވެ.
ސަރުކާރުން ހުށައެޅި ބިލުގައި ބުނެފައިވަނީ، ފަންނީ އުފެއްދުންތައް އާންމު ކުރެވޭނީ ކްލެސިފިކޭޝަން ބިއުރޯއަށް ހުށައަޅައި ގިންތި ކުރުމަށް ފަހުގައި ކަމަށެވެ. ކޮމިޓީން މިކަމަށް އިސްލާހު ގެނެސްފައިވަނީ، ފަންނީ އުފެއްދުންތައް ހުށައަޅައިގެން ގިންތި ކުރުމުގެ ބަދަލުގައި އުފައްދާ މީހާއަށް އެ ޒިންމާ ދިނުމަށެވެ. އޭޖީ އޮފީހުން ބުނީ، ކޮމިޓީން ބިލަށް ގެނެސްފައިވާ މި އިސްލާހަކީ ރަނގަޅު އިސްލާހެއް ނޫން ކަމަށެވެ.
އަދި ހަމައެއާއެކު އާންމު ކުރުމުގެ 10 ދުވަސް ކުރިން ބިއުރޯއަށް ހުށައެޅުމުން އެކަން އިސްލާހުކުރަން ޖެހޭނަމަ އެ ފުރުސަތު ބިއުރޯއަށް ލިބޭ ގޮތަށްވެސް ވަނީ އިސްލާހެއް ހުށައަޅާފައެވެ.
ހޯރަފުށި ދާއިރާގެ މެމްބަރު އަހުމަދު ސަލީމް ވިދާޅުވީ، ޓީވީ ޗެނަލްތަކުން ދައްކާ ކޮންޓެންޓް އުމުރާ ނުގުޅޭ ކުދިންނަށް ފެނުމުން އެ ލިބޭ ގެއްލުން މާ ބޮޑުކަމަށެވެ. ބްރޯޑްކާސްޓް ކުރުމާއި އޮންލައިން ކޮންޓެންޓަށް ވަކި ގޮތެއް އޮވެފައި، ފިލްމާއި ޑްރާމާ އަދި ފޮތް ނެރޭ މީހުންނަށް ވަކި ގޮތެއް އޮތުމަކީ އިންސާފުވެރި ގޮތެއްނޫން ކަމަށް ސަލީމް ވިދާޅުވިއެވެ.
ސަލީމްގެ ވާހަކަފުޅަށް އެހެން މެމްބަރުންވެސް ތާއީދު ކުރެއްވިއެވެ.
މި ކަމާ ގުޅޭގޮތުން އޭޖީ އޮފީހުން ބުނީ، ބޭރު ޤައުމުތަކުންވެސް ވަކި އިދާރާއަކުން ކްލެސިފައި ކުރަން އޮންނަނީ ވަކި މަޤްސަދެއްގައި ކަމަށެވެ. އަދި އުފައްދާ ފަރާތައް އެ ޙައްޤުތައް ދިނުމަކީ ޤާނޫނޫގެ މަސްލަހަތު ފުށުއަރާ ކަމެއް ކަމަށެވެ.
ސަލީމް ވިދާޅުވީ، މިހާރުވެސް އުފެއްދުންތަކުގައި ނުހިމެނޭނެ މަންޒަރާ އަޑު އަދި އެއަށް ކަނޑައެޅޭ އަދަބުތައްވެސް ކަނޑައެޅިފައި ވަކިން ފާހަގަކޮށްފައި އޮންނައިރު އޭގެ ޒާތުގައި އެއޮތީ ރެގިއުލޭޓް ކުރެވިފައި ކަމަށެވެ.
މަޝްވަރާތަކަށްފަހު އޭޖީ އޮފީހުން ބުނީ، ރީ-ބްރޯޑްކާސްޓް ކުރާ ޗެނަލްތަކަކީ، ގިންތި ކުރެވިގެން ދައްކާ ޗެނަލްތައް ކަމަށެވެ. އެއަށްފަހު ދެން ކުއްޖާއަށް އެ ޗެނަލް ދެއްކުމާއި ނުދެއްކުން އެއީ ބެލެނިވެރިންގެ ޒިންމާއެއް ކަމަށެވެ.
މިހާރު ބިލަށް ގެނެސްފައިވާ އިސްލާހުގައިވާ ގޮތަށް 10 ދުވަސް ކުރިން އުފެއްދުންތައް ހުށައަޅަން އޮތް އޮތުމަކީ ރަނގަޅު ނިންމުމެއް ކަމަށާއި، އެ އާއި ގުޅިގެން ދެން އަމަލުކުރަން ޖެހޭ ގޮތުގެ އިތުރު ތަފްސީލުތައް އަންނަން ޖެހޭ ކަމަށްވެސް އޭޖީ އޮފީހުން ފާހަގަކުރިއެވެ.
