"ޕްރެކްޓިސް ޕާލިމެންޓް ފޯ ވިމެން"ގެ އިތުރު ޕްރޮގްރާމެއް ބޭއްވުމަށް ނިންމައި ބައިވެރިވުމުގެ ފުރުސަތު ހުުޅުވާލައިފި
19 އެޕްރީލު 2022 | އަންގާރަ 08:49ޕްރޮގްރާމް ކުރިއަށްގެންދަނީ 2 ބަޔަކަށް
ރައްޔިތުންގެ މަޖިލީހުގެ އިދާރާ
"ޕްރެކްޓިސް ޕާލިމެންޓް ފޯ ވިމެން"ގެ އިތުރު ޕްރޮގްރާމެއް ބޭއްވުމަށް ނިންމައި ބައިވެރިވުމުގެ ފުރުސަތު ހުުޅުވާލައިފިއެވެ.
މިއީ ޒުވާނުން އަދި އަންހެނުން ސިޔާސީ ހަރަކާތްތަކުގައި ބައިވެރިވުމަށް ހިތްވަރުދީ، އެހީތެރިވެ އަދި ކުރިމަގުގައި ސިޔާސީ މަގާމަށް ކުރިމަތިކުމަށް ބާރު އެޅުމުގެ ގޮތުން، ރައްޔިތުންގެ މަޖިލީހާއި ޔޫއެންޑީޕީ މޯލްޑިވްސް ގުޅިގެން އޮސްޓްރޭލިއާގެ ޑިޕާޓްމެންޓް އޮފް ފޮރިން އެފެއާޒް އެންޑް ޓްރޭޑްގެ އެހީތެރިކަމާއެކު ކުރިއަށްގެންދާ ޕްރޮގްރާމެކެވެ.
ޕްރޮގްރާމް ބާއްވަން ހަމަޖެހިފައިވަނީ މެއި 22-28 އަށެވެ. އެ ބެޗުގައި ބައިވެރިވުމަށް ފޯމު ހުށަހެޅުމަށް އޮތް ފަހު މުއްދަތަކީ މިމަހުގެ 30 ވަނަ ދުވަހެވެ. ފުރުސަތު ހުޅުވާލާފައިވަނީ 25 އަހަރުން މަތީގެ އަންހެނުންނަށެވެ.
ޚާއްސަ އެހީއަށް ބޭނުންވާ މީހުންނަށް ވަކި ޖާގަތަކެއް ކަނޑައެޅިފައިވާނެ ކަމަށް މަޖިލީހުގެ އިދާރާއިން ބުނެއެވެ. އިޝާރާތުން ވާހަކަދެއްކުން އަދި ތަރުޖަމާކުރުން ފަދަ އިތުރު އެހީތެރިކަމަށް ބޭނުންވާ މީހުންނަށް އެ ހަރަކާތުގެ ތެރެއިން އެ އެހީތެރިކަން ވެސް ފޯރުކޮށްދޭނެ ކަމަށް މަޖިލިސް އިދާރާއިން ބުނެއެވެ.
"ޕްރެކްޓިސް ޕާލިމެންޓް ފޯ ވިމެން"ގެ ފުރަތަމަ ޕްރޮގްރާމް ބާއްވާފައިވަނީ ފާއިތުވި އަހަރުގެ ޑިސެމްބަރު މަހުގައެވެ.
ޕްރެކްޓިސް ޕާލިމެންޓު ހަރަކާތަކީ މަޖިލީހުގެ މަސައްކަތްތައް ކުރިޔަށްދާ ގޮތް ރަނގަޅަށް ދަނެގަނެ، ގިނަ ޒުވާނުންނާއި އަންހެނުން މަޖިލީހަށް ކުރިމަތިލާން ހިތްވަރުދިނުމަށް ކުރިޔަށް ގެންދާ ޕްރޮގްރާމެއް ކަމަށް ރައްޔިތުންގެ މަޖިލިސް އިދާރާއިން ބުނެއެވެ. އަދި، މަޖިލީހުގެ ސިޔާސަތުތަކުގައި ހުރި އުނިކަންކަން ދަނެގަނެ އެކަންކަން ބަދަލުކުރުމަށް މަސައްކަތްކުރާ ހަރަކާތެެއް ކަމަށް ވެސް އެއިދާރާއިން ބުނެއެވެ.
ޕްރޮގްރާމް ކުރިއަށްގެންދަނީ 2 ބަޔަކަށެވެ. އެއީ ސިޔާސަތުތަކާއި މަޖިލީހުގެ މަސައްކަތް ކުރިއަށްދާ ގޮތުގައި މައުލޫމާތު ދިނުމާއި ރައްޔިތުންގެ މަޖިލީހުގެ ނަމޫނާ މާދިރީ އެކެވެ.
އެ ޕްރޮގްރާމުގެ ދެވަނަ ބެޗެއް ބޭއްވުމަށް ހަމަޖެހިފައިވާއިރު، އެ ބެޗުގައި ބައިވެރިވުމަށް އޮގަސްޓު މަސް ތެރޭގައި ހުޅުވާލާނެ ކަމަށް މަޖިލީހުގެ އިދާރާއިން ބުނެއެވެ.
"ޕްރެކްޓިސް ޕާލިމެންޓް ފޯ ވިމެން"ގެ ފުރަތަމަ ޕްރޮގްރާމްގައި ފަސް އަތޮޅަކުން ޖުމްލަ 48 ފަރާތުން ބައިވެރިވެފައިވާއިރު އޭގެތެރޭގައި ޚާއްސަ އެހީއަށް ބޭނުންވާ 2 ފަރާތްވެން ހިމެނެއެވެ.
