ފްލެޓު ނުލިބޭ މައްސަލައިގައި އިހުތިޖާޖުކުރަން ގޮވާލުމުން، ޑްރަގް ކޯޓުގެ ގާޒީ ނައީމުގެ ސުލޫކީ މައްސަލައެއް ބަލަނީ

ފަނޑިޔާރުންނަށް ފްލެޓު ނުލިބޭ މައްސަލައިގައި އިހުތިޖާޖަށް ނުކުންނެވުމަށް ގޮވާލެއްވުމާއި ގުޅިގެން ޑްރަގް ކޯޓުގެ ގާޒީ މުހައްމަދު ނައީމްގެ ސުކޫލީ މައްސަލައެއް ޖުޑީޝަލް ސަރވިިސް ކޮމިޝަން (ޖޭއެސްސީ) އިން ތަޙުޤީޤުކުރަން ފަށައިފިއެވެ.

މިކަމާއި ގުޅޭގޮތުން ޖޭއެސްސީން އަންގާރަ ދުވަހު ބުނެފައިވަނީ، ގާޒީ ނައީމު ފަނޑިޔާރުންގެ ސޯޝަލް މީޑިއާ ގްރޫޕެއްގައި ފޮނުވާފައިވާ މެސެޖެއްގައި، ފަނޑިޔާރެއްގެ ސުލޫކާ ޚިލާފުވާފަދަ ބަސްތަކެއް ބޭނުން ކުރައްވާފައިވާ ކަމަށެވެ.

ވުމާއެކު، އެ މައްސަލަ ކޮމިޝަނުން އިސްނަގައިގެން ބަލާ ޝަކުވާއެއްގެ ގޮތުގައި ތަހުޤީޤުކުރުމަށް 2022 އޭޕްރީލް 17 ވަނަ ދުވަހު ބޭއްވި ކޮމިޝަނުގެ މިއަހަރުގެ 27 ވަނަ ޖަލްސާގައި ވަނީ ނިންމާފައެވެ.

ޖޭއެސްސީން މިހާރު ވަނީ މި މައްސަލަ ތަހުޤީޤު ކުރުމަށް ތަޙްޤީޤު ކޮމިޓީއެއްވެސް އެކުލަވާލާފައެވެ.

ފަނޑިޔާރުންގެ ވަޓްސްއަޕް ގްރޫޕަށް ފޮނުއްވި މެސެޖެއްގައި ގާޒީ ނައީމު ވަނީ އުއްތަމަ ފަނޑިޔާރާއި ޖުޑިޝަރީގެ ވެރިންގެ ކަރު ބުޑުގައި ރަހަލާ ވަރުކޮށްގެން މެނުވީ ކަންކަން ރަނގަޅު ނުވާނެ ކަމަށެވެ. އެގޮތުން ގާޒީ އެހެން ވިދާޅުވެފައިވަނީ އެޗްޑީސީގެ މުވައްޒަފުންނަށް ދައުލަތުން ފްލެޓް ދިނުމަށް ނިންމުމާއި ގުޅޭ ޚަބަރެއް އެ ގްރޫޕަށް އެހެން ފަނޑިޔާރަކު ޝެއަރ ކުރެއްވުމުންނެވެ.

ގާޒީ ނައީމު ވަނީ ހިތްވަރެއް ހުރިނަމަ އިހުތިޖާޖަށް ނުކުންނެވުމަށް ގޮވާލައްވާފައެވެ.

ގާޒީ ނައީމްގެ މައްސަލަތަކެއް މީގެ ކުރިންވެސް ބަލާފައިވެއެވެ. އެގޮތުން ކުރީގެ ބަންޑާރަ ނައިބު ޑރ. އަހުމަދު އަލީ ސަވާދަށް ރުހުން ނުލިބެނީސް ދައުލަތް ހިމެނޭ މައްސަލައެއް ނުބައްލަވަން ގާޒީ މުހައްމަދު ނައީމް ނިންމެވި މައްސަލައެއްގައި، އެކަމުގެ އަދަބެއްގެ ގޮތުން އޭނާ ޖުވެނައިލް ކޯޓަށް ބަދަލު ކުރައްވާފައިވެއެވެ. އޭރު ގާޒީ ނައީމް ހުންނެވީ ސިވިލް ކޯޓުގައެވެ.