ޚިޔާލުފާޅު ކުރުމުގެ މިނިވަންކަން ކަށަވަރު ކޮށްދިނުމުގައްޔާއި، ޖުޑިޝަރީ އިސްލާހު ކުރުމަށް ސަރުކާރު ފެއިލްވެފައިވާ ކަމަށް ބުނެ އިދިކޮޅުން ހުށައެޅި މައްސަލަ މަޖިލީހުން ބޭރުކޮށްލައިފިއެވެ.

މައްސަލަ ހުށަހެޅުއްވީ، ފަރެސް މާތޮޑާ ދާއިރާގެ މެމްބަރު ހުސައިން މުހައްމަދު ލަތީފެެވެ.

މައްސަލައިގައި ބުނެފައިވަނީ، އެއްވެ އުޅުމުގެ މިނިވަންކަމާއި ޚިޔާލު ފާލުކުރުމުގެ މިނިވަންކަން ރައްޔިތުންނަށް ކަށަވަރުކޮށްދިނުމުގައްޔާއި އަދި ޖުޑީޝަރީ އިސްލާހުކުރުމުގައި ސަރުކާރު ފެއިލްވެއްޖެ ކަމަށް ބުނެ، އިންސާނީ ޙައްޤުތަކަށް މަސައްކަތްކުރާ ބައިނަލްއަޤްވާމީ ޖަމްޢިއްޔާ ހިއުމަން ރައިޓްސް ވޮޗްއިން ރާއްޖޭގެ ޙާލަތާއި ގުޅޭގޮތުން ރިޕޯޓެއް ނެރެފައިވާ ކަމަށެވެ. މި ރިޕޯޓްގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ވެރިކަމާއި ހަވާލުވެވަޑައިގަތް ފުރަތަމަ ދުވަހު ޤާއިމުކުރެއްވި ގެއްލިފައިވާ މީހުންނާއި ގޮތް ނޭނގޭ މަރުތަކުގެ މައްސަލަ ބަލާ ކޮމިޝަނުން މިދިޔަ ތިން އަހަރު ދުވަހުގެ ތެރޭ އެކަންކަން ތަހުގީގު ކުރުމުގައި ކުރިއެރުމެއް ހޯދިފައި ނުވާކަމަށާއި، ރާއްޖޭގެ ޝަރުއީ ދާއިރާ އިސްލާހުކުރުމަށް މި ސަރުކާރުން ވީ ވައުދު، ސަރުކާރުގެ ދައުރުން ހަތަރު އަހަރު ފާއިތުވާން ކައިރިވެފައިވާއިރު އަދި މިހާތަނަށް ފުއްދާފައިނުވާ ކަމަށް މައްސަލައިގައި ބުނެފައިވެއެވެ.

ޖުޑީޝަލް ސާވިސް ކޮމިޝަން އެކުލެވިގެންވާ ގޮތް އިސްލާހުކުރެއްވުމަށް ރައީސް ވައުދުވެވަޑައިގެންނެވި ނަމަވެސް، އެ ކޮމިޝަން ސިޔާސީ މީހުންނަށް ޖާގަ އޮންނަ ގޮތަށް އޮތުމުން ޝަރުއީ ދާއިރާގެ މިނިވަންކަން ގެއްލިފައިވާ ކަމަށާއި، ސިޔާސީ ފަރާތްތަކުން ޖިނާއީ އަދުލުގެ ނިޒާމަށް ނުފޫޒު ފޯރުވާކަމުގެ ތުހުމަތުތަކެއް ވެސް އެ ކޮމިޝަނާއި ގުޅިގެން ކުރެވިފައިވާ ކަމަށް ބުނެފައިވެއެވެ.

މައްސަލައިގައި މެމްބަރު ވިދާޅުވީ، ރައީސް ޞާލިޙު އެމަނިކުފާނުގެ ރިޔާސީ ކެމްޕޭނުގައި އެއްވެއުޅުމަށް ހުރަސްއެޅޭ ގޮތަށް ހުރި ޤާނޫނުތައް އުވާލައްވާނެކަމަށް ވައުދުވެވަޑައިގެންނެވި ނަމަވެސް، ވެރިކަމުގެ ދައުރު ދެބައިވެގެން ދިޔައިރު އަދިވެސް އެ ޤާނޫނުތައް އުވާނުލައްވާކަމަށާއި، މުޒާހަރާތަކާއި އިހުތިޖާޖަށް ހުރަސްއެޅުމުގެ ސަބަބެއްގެ ގޮތުގައި ކޮވިޑުގެ ބަލިމަޑުކަން ބޭނުންކޮށްފައިވާ ކަމަށެވެ. މުޒާހަރާ ކުރާ ފަރާތްތަކާއި ދެކޮޅަށް ޙާލަތާ ނުބައްދަލު ބާރު ފުލުހުން ބޭނުންކޮށްފައިވާ ކަމަށާއި، ސަރުކާރުން ޚިޔާލު ފާޅުކުރުމާއި އެއްވެއުޅުމުގެ މިނިވަންކަމަށް ހުރަސް އަޅަމުންދާ ކަމަށާއި އަދި މިކަންކަމަށް ހުރަސް އަޅަނީ އަޅަނީ ބާރުގަދަ ސިޔާސީ މީހުންނާއި ދީނީ ޖަމާޢަތްތަކުގެ ފިއްތުންތަކުގެ ސަބަބުން ކަމަށް ބުނެފައިވެއެވެ.

ދިވެހިރާއްޖެއަކީ ތިން ބާރު ވަކިވެފައިވާ ނިޒާމެއް ގާނޫނު އަސާސީން ކަނޑައެޅިފައިވާ ނިޒާމެއް އޮތް ގައުމަކަށްވެފައި، ތިން ބާރު މަސްހުނިވެ އިންސާފު ގާއިމު ނުކުރެވި ޤާނޫނު އަސާސީން ލިބިދޭ ހައްގުތައް ނިގުޅައިގަންނަމުންދާތީ، އެކަންކަން އިސްލާހު ކުރުމަށް ގޮވާލާ ކަމަށް މެމްބަރު ހުސައިން ހުށައެޅުއްވި މައްސަލައިގައި ބުނެފައިވެއެވެ.

މައްސަލައަށް ބަހުސްކުރުމަށް ނުފެންނަ ކަމަށް 32 މެމްބަރުން ވޯޓު ދެއްވިއެެވެ. ބަހުސް ކުރުމަށް ފެންނަ ކަމަށް ވޯޓު ދެއްވީ 8 މެމްބަރުންނެވެ. އެހެންކަމުން މައްސަލައަށް ބަހުސް ކުރުމަށް ފާހެއް ނުވެއެވެ.

ފަހަކަށް އައިސް އިދިކޮޅުން އަންނަނީ ގިނަ އަދަދެއްގެ ކުއްލި މައްސަލަ މަޖިލީހަސް ހުށައަޅަމުންނެވެ.