ޕާޓީއަކަށް މީހަކު ވެއްދުމާއި އުނިކުރުމުގެ ބާރު އީސީއަށް ލިބިގެނެއް ނުވޭ: ކޮމިޝަން
18 އެޕްރީލު 2022 | ހޯމަ 23:44ފޯމެއް ނެތި ޕާޓީތަކަށް މީހުން ވެއްދުމާއި ޕާޓީން ވަކިކުރުމުގެ މަސައްކަތެއް ނުކުރާނެ
އިލްކެޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ
ސިޔާސީ ޕާޓީއަކަށް މީހަކު ވެއްދުމަށް އަދި ޕާޓީއަކުން މީހަކު އުނިކުރުމުގެ ބާރު އިލެކްޝަންސް ކޮމިޝަނަށް ލިބިގެން ނުވާކަމަށް އެ ކޮމިޝަނުން ބުނެފިއެވެ.
ޕާޓީތަކަށް ނޭނގި އެ ޕާޓީއެއްގައި ތިބޭ މީހުން އެހެން ޕާޓީތަކަށް ބަދަލުކުރަމުންދާކަމަށް ބުނާ މައްސަލަ ބޮޑުވެފައިވާ މިދަނޑިވަޅުގައި، ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަަޑައިގެން އިލްކެޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ، ޕާޓީތަކަށް މީހުން ވެއްދުމާއި ޕާޓީން ވަކިކުރުމުގެ މަސައްކަތަކީ ބަޔަކު އެކަމަށް އެދި ފޯމު ހުށަހެޅުމުން ވާ ކަންކަން ކަމުގައެވެ.
އިލެކްޝަންސް ކޮމިޝަންގެ ނިޒާމު ރޭވިފައި އޮތް ގޮތުން މިކަންކަމަކީ އިލެކްޝަންސް ކޮމިޝަނަށް ބޭނުން ގޮތަކަށް ކުރެވޭނެ ކަންކަމެއް ނޫން ކަމުގައި ޒަކަރިއްޔާ ވިދާޅުވިއެވެ. އަދި ސިޔާސީ ޕާޓީއަކުން ހުށަހަޅާ ފޯމެއް ނެތި ޕާޓީތަކުގެ މެމްބަރުން އެއް ޕާޓީން އަނެއް ޕާޓީއަށް ބަދަލުކޮށްފައި ނުވާނެ ކަމުގެ ޔަޤީންކަން ޒަކަރިއްޔާ ވަނީ ދެއްވާފައެވެ. މުޅި އިލެކްޝަންސް ކޮމިޝަންގެ އޮޑިޓެއް ހެދިޔަސް މިއީ ހިނގާފައިވާނެ ކަމެއް ނޫންކަން އެނގޭނެ ކަމަށް އޭނާ ވިދާޅުވިއެވެ.
މީގެއިތުރުން ދެ ޕާޓީއެއްގައި އެކަކަށް ނުހުރެވޭނެ ކަމަށްވެސް ޒަކަރިއްޔާ ވިދާޅުވިއެވެ. އޭނާ ވިދާޅުވީ އީސީގެ ޕާޓީ ސިސްޓަމުގައި އެމީހެއްގެ އައިޑީކާޑު ނަންބަރު ޖަހާ ހިސާބުން، އެމީހަކު ޕާޓީއެއްގައި ރަޖިސްޓްރީވެފައިވާނަމަ އެކަން އެނގޭނެ ކަމަށެވެ. އަދި އަނެއް ޕާޓީއަށް ރަޖިސްޓްރީވެވޭނީ ކުރިން އޮތް ޕާޓީން ވަކިވެގެން ކަމަށްވެސް އޭނާ ވިދާޅުވިއެވެ.
އެހެންނަމަވެސް އިލެކްޝަންސް ކޮމިޝަންގެ ދަފްތަރުން ބޭރުން، ސިޔާސީ ޕާޓީތަކުން ބަލަހައްޓާ އެޕާޓީއެއްގެ އަމިއްލަ ދަފްތަރުގައި އެކަކު ދެ ޕާޓީއެއްގައި ރަޖިސްޓްރީވެފައި އޮތްކަން އެނގެން އޮވެދާނެ ކަމަށް ޒަކަރިއްޔާ ވިދާޅުވިއެވެ. ނަމަވެސް އިލެކްޝަންސް ކޮމިޝަންގެ ދަފްތަރުގައި މިކަން މިގޮތަށް ވެފައި ނުވާނެކަން ޔަޤީންކުރައްވާ ކަމުގައި އޭނާ ވިދާޅުވިއެވެ.
އިދިކޮޅު ޕީޕީއެމްގެ 5،000 މެމްބަރުން އޮޅުވާލައިގެން އެހެން ޕާޓީތަކަށް ވައްދާފައިވާކަމުގެ ތުހުމަތު އެޕާޓީން ގެންދަނީ ކުރަމުންނެވެ. ޕީޕީއެމްގެ ސެކްރެޓަރީ ޖެނަރަލް މުހައްމަދު ތޮލާލް ކުރެއްވި ޓްވީޓްއެއްގައި ވިދާޅުވީ, 2021 ވަނަ އަހަރުގެ އޮކްޓޯބަރުން ފެށިގެން އެހެން ޕާޓީތަކަށް މެމްބަރުންގެ ރަޖިސްޓްރޭޝަން ވަގަށް ގެންގޮސްފައިވާ ކަމަށެވެ. އަދި އިލެކްޝަންސް ކޮމިޝަނުން އެކަން ބަލަންޖެހޭކަމަށް ބުނެ އޭނާ ވަނީ މައްސަލަވެސް ހުށަހަޅުއްވާފައެވެ.
މި ޝަކުވާތައް ބޮޑުވުމާއެކު އިލެކްޝަންސް ކޮމިޝަނުން މިހާރު ވަނީ އެ ކޮމިޝަންގެ ރެޖިސްޓްރޭޝަން ސެކްޝަންގެ އޮޑިޓެއް ހަދަން ނިންމާފައެވެ. މި އޮޑިޓުގެ ތެރެއިން ޕާޓީތަކުގެ ފޯމުތައް ބަލައިގެންފައިވަނީ ޤާނޫނާއި ޤަވާއިދާ އެއްގޮތަށް ތޯ ބަލާނެއެވެ.
