މަޝްރޫއުތައް އެއްކޮށް ނިންމާލެވޭ ވަރަށް ބަޖެޓްގައި ފައިސާ ހިމެނިފައި ނުހުރޭ - މަހްލޫފް
ފުޓުބޯޅަ ސްޓޭޑިއަމެއްގެ ސަބްބޭސް އަޅައި ޓާފް އަޅައި ފެންސް ޖެހުމަށްވެސް ޖުމްލަ އެކީގައި 8.5 މިލިއަނެއްހާ ރުފިޔާ ހޭދަވޭ
މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަޙްމަދު މަޚްލޫފް
މަޝްރޫއުތައް އެއްކޮށް ނިންމާލެވޭ ވަރަށް ބަޖެޓްގައި ފައިސާ ހިމެނިފައި ނެތުމަކީ މަޝްރޫއުތައް ބާރު ސްޕީޑްގައި ނިންމުމަށް އޮތް ގޮންޖެހުމެއްކަމަށް ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެއެވެ.
ޔޫތު މިނިސްޓަރު މިހެން ވިދާޅުވީ، މެމްބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. މިނިސްޓަރު ވިދާޅުވީ، ޔޫތް މިނިސްޓްރީގެ ބަޖެޓްގައި އެއްވެސް މަޝްރޫއެއް ދާގޮތަށް ގޮސް ނިންމާލާވަރަށް ބަޖެޓް ކުރެވިފައި ނޯންނަ ކަމަށެވެ. އެހެންކަމުން މަސައްކަތް ކުރަން ޖެހެނީ، މަޝްރޫއުތައް އިއުލާންކޮށް އެންމެ ބާރަަށް ކުރިއަށްދާ މަޝްރޫއަކަށް އެހެނިހެން މަޝްރޫއުތަކުން ފައިސާ ނަގައިގެން ކަމަށެވެ. މިއަހަރުވެސް ގިނަ މަޝްރޫއުތަކެއް ހިންގުމަށް ނިންމާފައިވާކަން ފާހަގަކުރައްވަމުން މިނިސްޓަރު ވިދާޅުވީ، ހުރިހާ މަޝްރޫއެއްވެސް އަވަހަށް ނިންމުމަށް މަސައްކަތް ކުރައްވާ ކަމަށެވެ.
ފުޓުބޯޅަ ސްޓޭޑިއަމެއްގެ ސަބްބޭސް އަޅައި ޓާފް އަޅައި ފެންސް ޖެހުމަށްވެސް ޖުމްލަ އެކީގައި 8.5 މިލިއަނެއްހާ ރުފިޔާ ހޭދަވާއިރު ބައެއް މަޝްރޫއުތައް ހިންގުމަށް ލައްކައެއްހައި ރުފިޔާ ބަޖެޓުގައި ހިމަނާފައިވާކަމަށް ވިދާޅުވިއެވެ. އެހެންކަމުން މަޝްރޫއުތައް ބޭނުންވާ ދުވެލީގައި ހިންގުމަށް ދަތިތަކެއް ކުރިމަތިވާކަަމަށް ވިދާޅުވިއެވެ.
މިނިސްޓަރު ވިދާޅުވީ، އިންފްރާސްޓަރަކްޗަރުގެ އިތުރުން މި އަހަރުގެ އެންމެ ބޮޑު އަމާޒަކީ ބައިނަލްއަގުއާމީ ކުޅިވަރު އިވެންޓްތައް ރާއްޖޭގައި ބޭއްވުން ކަމަށެވެ.
