މިހާތަނަށް 40 ފުޓުބޯޅަ ދަނޑު ނިމިފައިވާކަމަށް ޔޫތު މިނިސްޓަރު ވިދާޅުވެއްޖެ
18 އެޕްރީލު 2022 | ހޯމަ 07:40މިހާރުވެސް އެކި މަރުހަލާތަކުން 50ވަރަކަށް ދަނޑުގެ މަސައްކަތް ކުރިއަށްދޭ
މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފްއާއި ސުވާލުކުރެއްވުން
މިހާތަނަށް 40 ފުޓުބޯޅަ ދަނޑު ނިންމާލެވިފައިވާ ކަމަށް ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެއެވެ.
ރައްޔިތުންގެ މަޖިލީހުގައި މެމްބަރުންގެ ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ، މީގެ ކުރީ ސަރުކާރުތަކުން އެންމެ ފުޓުބޯޅަ ދަނޑެއްވެސް ގާއިމުކޮށްފައިނުވާ ކަމަށެވެ. އެހެންކަމުން މިއަދުގެ ސަރުކާރުން މިހާތަނަށް ގިނަ އަދަދެއްގެ ފުޓުބޯޅަ ދަނޑުތައް ނިންމާލެވިފައިވާތީ އެކަމާއި އުފާކުރައްވާ ކަމުގައި މިނިސްޓަރު ވިދާޅުވިއެވެ.
ޔޫތު މިނިސްޓަރު މަހުލޫފު ވިދާޅުވީ، ކޮވިޑްގެ ބަލި މަޑުކަމުގައި ތާށިވެފައި އޮވެމެވެސް 40 ދަނޑު ނިންމާލެވުމަކީ ކުޑަ ކަމެއް ނޫން ކަމަށެވެ.
މިހާރުވެސް އެކި މަރުހަލާތަކުން 50ވަރަކަށް ދަނޑުގެ މަސައްކަތް ކުރިއަށްދާ ކަމަށް މިނިސްޓަރު ވިދާޅުވިއެވެ. އަދި މިއީ ދުނިޔޭގެ ނިސްބަތުންވެސް ބޮޑު އަދަދެއް ކަމަށްވެސް ވިދާޅުވިއެވެ.
އިންޑިއާގެ ލައިން އޮފް ކްރެޑިޓްގެ ދަށުން ކުރުމަށް ނިންމާފައިވާ މަސައްކަތުގެ ތެރޭގައި ހިމެނޭ އިންޑޯރ ވޮލީ، ބާސްކެޓް ކޯޓުތައް އަދި ގަލޮޅު ދަނޑުގެ މަސައްކަތް ނިމުމުން ގާތްގަނޑަކަށް ރާއްޖޭގެ އެކި ކަންކޮޅުތަކުގައި ކުޅިވަރުގެ ވަސީލަތްތައް ގާއިމްކޮށް ނިމުނީ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ، ދެން އޮންނާނީ އެތަންތަން މެއިންޓެއިން ކުރުމުގެ މަސައްކަތް ކަމަށެވެ.
މިހާރު ދިމާވާ ގޮންޖެހުމަކީ، ކޮންޓްރެކްޓް ކޮށްފައިވާ މުއްދަތުގައި މަސައްކަތް ނުނިމުން ކަމުގައި މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ، ބަޖެޓްގައި ދަނޑުތަކާއި ކޯޓުތައް މަރާމާތުކުރުމަށް ވަކި ބަޖެޓެއް ކަނޑައެޅިފައި ނެތުމުން ކުޅިވަރަށް ކަނޑައަޅާފައިވާ ބަޖެޓް ތެރެއިން އެކަންކަމަށް ޚަރަދު ކުރަން ޖެހުމަކީ ކަންބޮޑުވާ ކަމެއް ކަމަށެވެ. އެހެންނަމަވެސް އެކަން އެހެން ކުރަން މިހާރު މަޖުބޫރު ކަމަށާއި، މުސްތަގުބަލުގައި ބަޖެޓްގައި އެކަން ހިމަނުއްވައި ދެއްވުމަށް މިނިސްޓަރު އެދިވަޑައިގެންނެވިއެވެ.
