ހުޅުމާލެ ޕޮލިސް ފްލެޓް ސަރަހައްދުގައި ޓެކްސީއަކާއި ބެޓެރީ ސައިކަލެއް ޖެހި ހިނގި އެކްސިޑެންޓްގައި ހަތަރު މީހަކަށް އެކި ވަރުގެ އަނިޔާ ލިބިގެން ފަރުވާދެމުންދާކަމަށް ފުލުހުން ބުނެފިއެވެ.
މިއެކްސިޑެންޓާއި ގުޅިގެން ފުލުހުން ބުނީ އެކްސިޑެންޓް ހިނގާފައިވާކަމުގެ މައުލޫމާތު ފުލުހުންނަށް ލިބިފައިވަނީ ހޮނިހިރު ދުވަހުގެ ރޭ 21:20 ހާއިރުކަމަށެވެ. އެކްސިޑެންޓްވި ބެޓެރި ސައިކަލު ދުއްވަން އިން ބިދޭސީ ފިރިހެން މީހާއަށް އަނިޔާވެގެން ހުޅުމާލެ ހޮސްޕިޓަލްގައި އަންނަނީ ފަރުވާދެމުންކަމަށް ފުލުހުން ބުނެއެވެ. މިމީހާއަށް ސީރިއަސް އަނިޔާތަކެއް ލިބިފައިވާކަމަށް ފުލުހުން ބުނެއެވެ.
އެކްސިޑެންޓްގައި ޓެކްސީ ގައި ތިބި އުމުރުން 18 އަހަރުން ދަށުގެ އަންހެން ކުއްޖަކާއި ފިރިހެން ކުއްޖަކަށް އަދި އުމުރުން ދުވަސްވީ އަންހެނަކަށްވެސް އެކިވަރުގެ އަނިޔާލިބިގެން ހުޅުމާލެ ހޮސްޕިޓަލްގައި ފަރުވާދެމުންދާކަމަށް ފުލުހުން ބުނެއެވެ.
އެކްސިޑެންޓާ ގުޅިގެން އިތުރަށް ބަލަންޖެހޭކަންކަން ފުލުހުން އަންނަނީ ބަލަމުންނެވެ.
ހުޅުމާލޭގައި އެކްސިޑެންޓެއް ހިނގާފައިވާއިރު ހުކުރު ދުވަހުގެ ރޭ މާލޭގައި ވަނީ ބަހަކާއި ސައިކަލެއް ޖެހި އެކްސިޑެންޓެއް ހިނގާފައެވެ. އެއެކްސިޑެންޓްގައިވެސް މީހަކަށް އަނިޔާވެފައިވެއެވެ.
