އަސާސީ ތަމްރީން ޕްރޮގްރާމް އިތުރަށް ހަރުދަނާކުރުމުގެ މަސައްކަތް މިހާރުވެސް ދަނީ ކުރަމުން: ކޮމިޝަނަރ އޮފް ޕްރިޒަންސް
16 އެޕްރީލު 2022 | ހޮނިހިރު 10:07ޢެންމެ ބޮޑު އެއް ވާޖިބުކަމަށް ދެކެވަޑައިގަންނަވަނީ، ބައިނަލްއަގުވާމީ މިންގަނޑުތަކަށް ފެތޭ، ހަރުދަނާ ޕްރިޒަން ސަރވިސްއެއް ގާއިމުކުރުމަށް
އަސާސީ ތަމްރީން ޕްރޮގްރާމްގެ 25 ވަނަ ބެޗްގެ ދަސްވެނިވުމުގެ ރަސްމިއްޔާތުގެ ތެރެއިން
އަސާސީ ތަމްރީން ޕްރޮގްރާމް އިތުރަށް ހަރުދަނާކުރުމުގެ މަސައްކަތް މިހާރުވެސް ކުރަމުންދާ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ހުކުރު ދުވަހުގެ ރޭ ދަސްވެނިންނަށް ތަހުނިޔާވިދާޅުވެ, އޭނާ ވިދާޅުވީ މި މަސައްކަތަކީ މަސްއޫލިއްޔަތު ބޮޑު, ތަކުލީފު ބޮޑު، މުހިއްމު މަސައްކަތެއް ކަމަށާއި, މިއަދުން ފެށިގެން އެއީ ޕްރިޒަން އޮފިސަރުން ކަމަށާއި ދިވެހި ރާއްޖޭގެ ޖަލުތަކާއި ޕެރޯލް ގާނޫނުން މަތިކޮށްފައިވާ ޕްރިޒަން އޮފިސަރެއްގެ މަސްއޫލިއްޔަތާއި ޒިންމާ އަދާކުރުމަށް ބޭނުންވާ ހުނަރާއި މަައުލޫމާތާއި އެހެނިހެން ކަންތައްތައް ދަސްވެނިވި އޮފިސަރުންނަށް ދަސްކޮށްދެއްވާފައިވާ ކަމަށެވެ.
މޯލްޑިވްސް ކަރެކްޝަނަލް ސަރވިސްގެ އަސާސީ ތަމްރީން ޕްރޮގްރާމަކީ 2007 އަހަރުން ފެށިގެން ފަރުމާކުރެވި ހިނގަމުން އަންނަ ތަމްރީން ޕްރޮގްރާމެއްކަމަށާއި, މިއީ ރާއްޖޭގައި މިގޮތަށް ހިންގޭ ފުރަތަމަ ޕްރޮގްރާމްކަމަށް ފާހަގަކުރައްވައި ސީޕީ ވިދާޅުވީ, މި ޕްރޮގްރާމަށް 15 އަހަރު ފުރިގެން ދާއިރު، މިހާރު މި ޕްރޮގްރާމަކީ އެމްކިއުއޭއިން ގަބޫލުކުރާ ފެންވަރަށް ފަރުމާކުރެވިގެން ހިންގޭ ޕްރޮގްރާމެއް ކަމަށާއި, މިއީ މި ޕްރޮގްރާމް ހަރުދަނާކުރުމަށް ކުރެވިފައިވާ މުހިއްމު މަސައްކަތެއް ކަމަށެވެ. އަދި މި ޕްރޮގްރާމަށް ގެންނަންޖެހޭ ބަދަލުތައް ދެނެގަނެ، އިތުރަށް ހަރުދަނާކުރުމަށް މިހާރުވެސް މަސައްކަތް ކުރައްވަމުންދާ ކަމަށާއި, މިކަމުގައި އައިކޯސްޓްގެ މުވައްޒަފުންނާއި ޑައިރެކްޓަރ ކުރައްވަމުން ގެންދާ މަސައްކަތް ފާހަގަކުރައްވައި، އެފަރާތްތަކަށް އޭނާ ޝުކުރު އަދާކުރެއްވިއެވެ.
މި ޕްރޮގްރާމަކީ ބައިނަލްއަގުވާމީ މިންގަނޑުތަކަށް ފެތޭ ޕްރޮގްރާމަކަށް ހެދުމަށްޓަކައި ވޭތުވެ ދިޔަ ދެ އަހަރުތެރޭގައި މަސައްކަތްތަކެއް ކުރެވިފައިވާ ކަމަށާއި, އެގޮތުން މި ކޯހުގެ ބައިވެރިން ޔޫ.އެން.ގެ, ދަ ނެލްސަން މަންޑޭލާ ރޫލްސް އީ-ކޯސް ފުރިހަމަކުރުމަކީ މެންޑޭޓަރީ ކަމެއް ކަމަށާއި, މިގޮތުން ފާއިތުވި ދެ ބެޗް ވަނީ މި އީ-ކޯސް ފުރިހަމަކޮށްފައިކަމަށް ކޮމިޝަނަރ ވިދާޅުވިއެވެ. އެކި ފަންތީގެ މުވައްޒަފުންނަށް އެމުވައްޒަފުންގެ މަސައްކަތާގުޅޭ ދާއިރާތަކުން ތަމްރީން ޕްރޮގްރާމްތައް ހިންގުމާއެކު ތަމްރީނު ދެވޭނެ ފުރުސަތުތައް މިހާރަށްވުރެ ބޮޑަށް މުހިއްމު ކަމަށާއި, އެމްސީއެސްގެ އެންމެ މުހިއްމު އަދި އެންމެ ބޮޑު އެއް ވާޖިބުކަމަށް ދެކެވަޑައިގަންނަވަނީ, ބައިނަލްއަގުވާމީ މިންގަނޑުތަކަށް ފެތޭ ހަރުދަނާ ޕްރިޒަން ސަރވިސްއެއް ގާއިމުކުރުންކަމަށް ކޮމިޝަނަރ ފާހަގަކުރެއްވިއެވެ.
މި ބަދަލުތައް ގެނައުމަށްޓަކައި ގުޅުންހުރި މުވައްސަސާތަކާއި ޖަމްއިއްޔާތަކާ ގުޅިގެން މިކަންތައްތައް ކުރުމަށް މަސައްކަތްކުރެވެމުންދާ ކަމަށާއި, އެގޮތުން ދަ ނެލްސަން މަންޑޭލަ ރޫލްސްގެ ހަމަތަކާއި އުސޫލުތަކަށް ފެތޭގޮތަށް ގައިދީންގެ އަސާސީ ހައްގުތަކާއި އިނާޔަތްތަކުގެ ގަވާއިދުތައް އިސްލާހުކުރެވެމުން ދިއުމާއި, މަންޑޭލާ ރޫލްސް ދިވެހި ބަހަށް ތަރުޖަމާ ކުރެވި، އެރޫލްސްއަށް ޕްރިޒަން އޮފިސަރުން އަހުލުވެރި ކުރުމުގެ ގޮތުން ޓީއޯޓީ ޕްރޮގްރާމް ހިންގައި, ޓީއޯޓީއާއެކު ޕްރިޒަން އޮފިސަރުން އެން.އެމް.އާރަށް އަހުލުވެރިކުރެވެމުންދާ ކަމަށާއި, މިހާތަނަށް ނިސްބަތުން މުޅި މުއައްސަސާގެ ތިންބައިކުޅަ އެއްބައި މަންޑޭލާ ރޫލްސްއަށް އަހުލުވެރިކުރެވިފައިވާކަން ކޮމިޝަނަރ ފާހަގަކުރެއްވިއެވެ. އަދި މުވައްޒަފުންގެ ކަންތައްތައް ރަނގަޅުކުރުމުގެ ގޮތުން މުވައްޒަފުންގެ ސިއްހީ ދުޅަހެޔޮކަން ބިނާކުރުމުގެ ގޮތުން ޕްރިޒަން ކޯޕަރޭޓިވް ސޮސައިޓީގެ އެހީތެރިކަމާއެކު މިއަހަރުގެ ޖެނުއަރީ މަހުން ފެށިގެން ހުރިހާ މުވައްޒަފުންނަށް ހެލްތު އިންޝުއަރަންސް ޕެކޭޖެއް ގާއިމްކުރެވި ޚިދުމަތް ފޯރުކޮށްދެވެމުންދާކަމަށާއި, އޭގައި އާއިލާތައްވެސް ހިމަނާފައިވާކަމަށް ވިދާޅުވެ، ޕްރިސްކޯއަށް ސީޕީ ޝުކުރުއަދާކުރެއްވިއެވެ.
ބައިނަލްއަގުވާމީ ޖަމްއިއްޔާތަކުގެ އެހީތެރިކަމާއެކު ތަފާތު ރޮނގުތަކުން މުވައްޒަފުން ތާޒާކޮށް ތަރައްގީކުރުމުގެ ތަފާތު ޕްރޮގްރާމްތައް ހިންގެމުންދާކަން ފާހަގަކުރައްވައި, ޔޫ.އެން.އޯޑީސްއަށްވެސް ކޮމިޝަނަރ ޝުކުރު ދެންނެވިއެވެ. ކޮމިޝަނަރގެ ވާހަކަފުޅު ނިންމަވާލައްވަމުން, ދަސްވެނިވިވި ޕްރިޒަން އޮފިސަރުންނަށާއި ޖުމްލަކޮށް ހުރިހާ މުވައްޒަފުންނަށް ވިދާޅުވީ, އެންމެ މުވައްޒަފަކު ކުރާ ކަމެއްގެ ސަބަބުން މުޅި މުއައްސަސާއަށް އާންމު ރައްޔިތުންކުރާ އިތުބާރު ގެއްލިގެންދާކަމަށެވެ. ވީމާ މިފަދަ ކަންކަމުން ދުރުހެލިވެ، އަމިއްލަ ފަރުދެއްގެ ހައިސިއްޔަތުން މުއައްސަސާ އިތުރު އުސް ހަރުފަތްތަކަށް ގެންދިއުމުގައި އިތުރަށް މަސައްކަތް ކޮށްދިނުމަށާއި, ޒިންމާދާރުކަމާއެކު، ވީހާވެސް ޕްރޮފެޝަނަލްކޮށް މަގާމުގެ މަސްއޫލިއްޔަތުތައް އަދާކުރުމަށާއި, ގައިދީން ހަރުދަނާ ބައެއްގެ ގޮތުގައި އަލުން އަނބުރާ މުޖުތަމައަށް ނެރުމަށްޓަކައި ރިވެތި އަޚުލާގާއި ސުލޫކު ހިފަހައްޓައި, ގައިދީންނަށް ނަމޫނާއާއި މިސާލު ދައްކުވައިދޭ ބަޔަކަށް ވުމަށް ކޮމިޝަނަރ އިލްތިމާސް ކުރެއްވިއެވެ.
