ޑޮކްޓަރުންގެ ދުވަސް ފާހަގަަކުރުމުގެ ގޮތުން ޚާއްސަ މަސް ރޭހެއް ބާއްވައިފި
15 އެޕްރީލު 2022 | ހުކުރު 18:57ދިވެހި ޑޮކްޓަރުންގެ ދުވަހުގެ ގޮތުގައި ފާހަގަކުރަމުން އަންނަނީ އެޕްރީލް މަހުގެ 18ވަނަ ދުވަސް
ދިވެހި ޑޮކްޓަރުންގެ ދުވަސް ފާހަގަކުރުމަށް ބޭއްވި ޚާއްސަ މަސް ރޭހުގެ ތެރެއިން
މިއަހަރުގެ ދިވެހި ޑޮކްޓަރުންގެ ދުވަސް ފާހަގަަކުރުމުގެ ގޮތުން ޚާއްސަ މަސް ރޭހެއް ބާއްވައިފިއެވެ.
މޯލްޑިވިއަން މެޑިކަލް އެސޯސިއޭޝަނުން މި އަހަރުގެ ދިވެހި ޑޮކްޓަރުންގެ ދުވަސް ފާހަގަކުރުމަށް ހިންގާ ހަރަކާތުގެ ތެރެއިން ޑޮޮކްޓަރުންނަށް ޚާއްސަކޮށްގެން ހިންގި މި ހަރަކާތަށް ބޮޑު ތަރުހީބެއް ލިބުނު ކަމަށް އެ އެސޯސިއޭޝަނުން ފާހަގަކުރެއެވެ.
މި އަހަރުގެ މަސްރޭހުގައި ބައިވެރިވެފައިވަނީ 6 ޓީމަކުންނެވެ.
މަސް ރޭސް ކާމިޔާބު ކުރީ ރެސްޕިރޭޓަރީ ޑިޕާޓްމެންޓްގެ “ޓީމް ގިލްސް”އެވެ.
މޯލްޑިވިއަން މެޑިކަލް އެސޯސިއޭޝަންގެ ރައީސާ ޑރ.އައިމިނަތު ޒޭބާ ވިދާޅުވީ، މި ހަރަކާތަކީ ޑޮކްޓަރުންގެ ދުވަސް ފާހަގަކުރުމަށް އެ އެސޯސިއޭޝަނުން ހިންގާ ހަރަކާތުގެ ތެރެއިން ޑޮކްޓަރުންގެ މެދުގައި އެކުވެރިކަމާއި އެއްބައިވަންތަކަން އުފެއްދުމުގެ މަގްސަދުގައި ހިންގި ހަރަކާތެއް ކަމަށެވެ. އަދި ފުރަތަމަ ފަހަރަށް ބޭވުނު މި ހަރަކާތަށް ޑޮކްޓަރުންގެ ފަރާތުން ބޮޑު ތަރުހީބެއް ލިބުނު ކަމަށް ވިދާޅުވިއެވެ.
މީގެ އިތުރުންވެސް ޑޮކްޓަރުންގެ ދުވަހާއި ގުޅުވައިގެން މި ރަމަޟާން މަހު ޚާއްސަ ދީނީ ކުއިޒެއްވެސް ކުރިއަށްގެންދާނެ ކަމަށް ވިދާޅުވިއެވެ. އަދި ޑޮކްޓަރުންނަށް ދުޅަހެޔޮ ސިއްޚަތެއްގައި ތިބުމަށް ބާރު އެޅުމުގެ ގޮތުން "ބިގެސްޓް ލޫޒަރ" ޕްރޮގްރާމެއްވެސް ކުރިއަށް ގެންދިޔުމަށް ނިންމާފައިވާ ކަމަށް ޑރ. ޒޭބާ ވިދާޅުވިއެވެ.
އެ އެސޯސިއޭޝަންގެ ސްޕޯކްސްޕާރސަން ޑރ.ސައުސަން ވިދާޅުވީ، އުންމީދަކީ އަންނަ އަހަރު އަތޮޅު ތެރޭގައި މަސައްކަތްކުރާ ދިވެހި ޑޮކްޓަރުންވެސް ހިމެނޭ ގޮތަށް މި ޕްރޮގްރާމް ކުރިއަށް ގެންދިޔުން ކަމަށެވެ.
ދިވެހި ޑޮކްޓަރުންގެ ދުވަހުގެ ގޮތުގައި ފާހަގަކުރަމުން އަންނަނީ އެޕްރީލް މަހުގެ 18 ވަނަ ދުވަހެވެ.
