ރައީސް އޮފީހުން ނޫސްތަކަށް ފައިސާ ދިން މައްސަލަ އޭސީސީއަށް ހުށައަޅައިފި
15 އެޕްރީލު 2022 | ހުކުރު 14:50ފާއިތުވި އަހަރު ރައީސް އޮފީހުން މީޑިއާތަކަށް 1.2 މިލިއަން ރުފިޔާ ދީފައިވޭ
އޭސީސީއަށް އައްޔަންކުރެވުނު މެންބަރުން މަގާމާއި ހަވާލުވެވަޑައިގެންނެވުމުގެ ރަސްމިއްޔާތުގެ ތެރެއިން
ރައީސް އޮފީހުން ނޫސްތަކަށް ފައިސާ ދިން މައްސަލައެއް އެންޓި ކޮރަޕްޝަން ކޮމިޝަން އޭސީސީއަށް ހުށައަޅައިފިއެވެ.
އޭސީސީން ބުނީ މި ފަދަ މައްސަލައެއް އޭސީސީއަށް އަމިއްލަ ފަރާތަކުން ހުށައަޅައި މިހާރު ރަޖިސްޓަރ ކޮށްފައިވާ ކަމަށެވެ. އެހެންނަމަވެސް އެ މައްސަލަ ބެލުމާމެދު އަދި ވަކި ގޮތެއް ނުނިންމާކަމަށްވެސް އޭސީސީން ބުނެއެވެ. މިހާރު ކުރިއަށްދަނީ އަމިއްލަ ފަރާތަކުން ހުށައަޅާފައިވާ މި ޝަކުވާ އިވެލުއޭޓް ކުރުމުގެ މަސައްކަތް ކަމަށް އޭސީސީން ބުނެއެވެ.
ސަރުކާރު ޕްރޮމޯޓު ކުރަން ރައީސް އޮފީހުން، ދިވެހިރާއްޖޭގައި ހިންގާ ބައެއް ނޫސްތަކާއި ޓީވީތަކަށް ފާއިތުވެ ދިޔަ އަހަރާއި މި އަހަރު ގިނަ އަދަދެއްގެ ފައިސާ ދީފައިވާކަމަށް އޮންލައިން ނޫހަކުން ވަނީ ރިޕޯޓު ކޮށްފައެވެ. އޭގައި ވާގޮތުން އެ މައުލޫމާތު ހާމަވީ މައުލޫމާތު ހޯދާ ލިބިގަތުމުގެ ހައްގުގެ ދަށުން އެ ނޫހުން އެ މައުލޫމާތުތައް ހޯދުމަށް ރައީސް އޮފީހުގައި އެދުމުންނެވެ. އެ ނޫހަށް ދީފައިވާ މައުލޫމާތުގައި، ރައީސް އޮފީހުން ހާމަކޮށްފައިވާ ގޮތުގައި، ފާއިތުވި އަހަރު ރައީސް އޮފީހުން ވަނީ މީޑިއާތަކަށް 1.2 މިލިއަން ރުފިޔާ ދީފައެވެ. އަދި މިއަހަރުގެ މިހާތަނަށް 150،000ރ ރުފިޔާ ދީފައިވެއެވެ.
އެ ނޫހުގައި ރިޕޯޓުކޮށްފައިވާ ގޮތުން ރައީސް އޮފީހުންވަނީ 3 ކަމަކާއި ގުޅިގެން ނޫސްތަކަށް ފައިސާ ދީފައެވެ. އެއީ ރައީސް ސާލިހު އދ. ގެ އާންމު މަޖިލީހަށް ވަޑައިގަތުމަށް އެމެރިކާއަށް ކުރެއްވި ދަތުރުފުޅު ކަވަރު ކުރުމަށާއި، ސްކޮޓްލޭންޑުގައި އޮތް ތިމާވެއްޓާއި ބެހޭ ސަމިޓަށް ރައީސް ސާލިހު ކުރެއްވި ދަތުރުފުޅު ކަވަރު ކުރުމަށާއި، އަދި ސަރުކާރުން ކޮށްފައިވާ މަސައްކަތްތަކާއި ކުރިއަށް ގެންދިޔަ މަޝްރޫއުތަކުގެ މައުލޫމާތު ފޯރުކޮށްދިނުމަށެވެ.
މިކަމާއި ގުޅޭ ގޮތުން ރައީސް އޮފީހުން ބުނެފައިވަނީ، ފައިސާ ޚަރަދު ކޮށްފައިވަނީ އެކަން ކުރަން އޮންނަ އުސޫލުގެ ތެރެއިން ކަމަށެވެ.
