ވިލިމާލެ ދާއިރާގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި އިލެކްޝަންގައި ބައިވެރިވުމަށް ހުޅުވާލި މުއްދަތުގައި ފޯމު ހުށަހަޅާފައިވަނީ ޕީޕީއެމްއާއި އެމްއެންޕީންކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.
ފޯމު ހުށަހެޅުމަށް ހުޅުވާލާފައިވަނީ ބުރާސްފަތި ދުވަހުގެ މެންދުރު 12 ޖެހުމާ ހަމައަށެވެ. ރާއްްޖެއެމްވީއާ ވާހަކަދައްކަވަމުން ފުއާދު ވިދާޅުވީ, އެދާއިރާގެ ބައި އިލެކްޝަންގައި ބައިވެރިވުމަށް އެމްޑީޕީންވެސް ފޯމު ހުށަހެޅިކަމަށެވެ. ނަމަވެސް އެމްޑީޕީން ފޯމު ހުށަހަޅާފައިވަނީ ސުންގަޑި ހަމަވިފަހުންކަމަށް ފުއާދު ވިދާޅުވިއެވެ. އެހެންކަމުން އެމްޑީޕީން ހުށަހެޅި ފޯމު ބަލައިނުގަންނަކަމަށް ފުއާދު ވިދާޅުވިއެވެ. ފުއާދު ވިދާޅުވީ ސުންގަޑި ހަމަވާފަހުން ހުށަހަޅާ ފޯމުތައް ބަލައިނުގަތުމަށް ކޮމިޝަނުން ނިންމާފައިވާކަމަށެވެ.
ވިލިމާލެ ދާއިރާގެ ބައި އިލެކްޝަންގައި ވާދަކުރުމަށް ބޭނުންވާ ފަރާތްތަކަށް އެމްޑީޕީން ފުރުސަތު ހުޅުވާލާފައިވަނީ އޭޕްރީލް 13 ވަނަ ދުވަހު, ހަމަ އެދުވަހު ފޯމު ހުށަހަޅާގޮތަށެވެ.
ވިލިމާލެ ދާއިރާގެ ޑަބްލިޔުޑީސީގެ ބައި އިލެކްޝަން ބޭއްވުމަށް ހަމަޖެހިފައިވަނީ މެއި މަހުގެ 16 ވަނަ ދުވަހުއެވެ.
