ހާލަންޑް ހޯދުމުގެ ރޭހުން ރެއާލް ބޭރުނުވޭ!

ބޮރޫޝިޔާ ޑޯޓްމަންޑްގެ ޒުވާންތަރި އާލިން ހާލަންޑް ހޯދުމަށް ކްލަބުތަކުން ކުރާ މަސައްކަތުގެ ރޭހުން ސްޕެއިންގެ ރެއާލް މެޑްރިޑް ބޭރުނުވާކަމުގައި ހާލަންޑް ބައްޕަގެ ގާތް ރަހުމަތްތެރިއަކު ބުނެފިއެވެ.

މިފަހުން ފެނުނު މަންޒަރުތަކަށް ބަލައި، ގިނަ ބަޔަކަށް ގަބޫލު ކުރެވިފައި އޮތީ ހާލަންޑު ހޯދުމުގެ ރޭހުން ރެއާލް ބޭރުވެފައިވާ ކަމަށެވެ. ނަމަވެސް ނޯވޭގެ ގައުމީ ޓީމަށް ކުރިން ކުޅުނު ޖެން އާގޭ ފިއޯޓޮފް ކުރި ޓްވީޓެއްގައި އޭނާ ބުނީ މި ރޭހުން ރެއާލް ބޭރުވެފައިވާ ކަމަށް ދެކެވޭ ވާހަކައަކީ ދޮގެއް ކަމަށާއި، ރެއާލް މި ރޭހުން އަދި ބޭރުނުވާ ކަމަށެވެ. ޖެންއަކީ ހާލަންޑް ބައްޕަގެ ގާތް ރަހުމަތްތެރިއެކެވެ.

މި ސީޒަން ނިމުމަށްފަހު ކުރިއަށް އޮތް ސަމަރ ޓްރާންސްފަރ މާކެޓުގައި ހާލަންޑް ޑޯޓްމަންޑާއި ވަކިވާނެ ކަމަށް ރިޕޯޓުތައް ބުނެއެވެ. ނަމަވެސް އޭނާ ދާނީ ކޮން ކްލަބަކަށް ކަމެއް މިހާތަނަށް ހާމަކޮށްފައެއް ނުވެއެވެ. ހާލަންޑް ހޯދުމަށް ރެއާލްގެ އިތުރުން މެންޗެސްޓަރ ސިޓީންވެސް އަންނަނީ މަސައްކަތް ކުރަމުންނެވެ.

އުމުރުން 21 އަހަރުގެ ހާލަންޑުގެ އިތުރުން ރެއާލްއިން އަންނަނީ ޕީއެސްޖީއަށް ކުޅެމުން އަންނަ ކީލިއަން އެމްބާޕޭ ހޯދުމަށްވެސް މަސައްކަތް ކުރަމުންނެވެ. ކުރިއަށް އޮތް ޓްރާންސްފަރ މާކެޓުގައި ފްރީ ޓްރާންސްފާއެއްގައި އެމްބާޕޭ ބޭނުން ކްލަބަކަށް ދިއުމުގެ ފުރުސަތު އެބައޮތެވެ. އަދި އޭނާ ހޯދުން އެންމެ ގާތީވެސް ރެއާލްއެވެ.